قىزدارعا ارنالعان فيلمدەر
بۇگىندە «نە كورەمىن؟» دەگەن سۇراق اكتۋالدى سۇراق ەمەس، عالامتوردى اقتارساڭ، سان ءتۇرلى قىزىقتى ۇسىنىس شىعادى. الايدا فيلمدەر بارلىق ادامعا بىردەي ۇنامدى دەپ ايتا المايمىز. سوندىقتان بۇل ماتەريالدا قىز-كەلىنشەكتەرگە فيلمدەر توپتاماسىن ۇسىنامىز.
ايەل زاتى «جىلاۋىق» فيلم كورگەندى ۇناتادى دەگەن ۇعىم شىندىققا جاقىن. ءبىراق قىز-كەلىنشەكتەر تەك درامالى فيلمدەردى كورەدى دەگەن قاتە.
«Titanic» (تيتانيك)
اتالعان فيلم الەمدە ەڭ تانىمال كينو تۋىندىسى ەكەنى بارىمىزگە ءمالىم. 1997-جىلى شىققان بۇل فيلمنىڭ باستى رولدەرىن سومداعان اكتەرلەرىن كۇنى بۇگىنگە دەيىن «تيتانيك» اتىمەن بىرگە ايتادى. سۇمدىق وقيعا، جاس ماحاببات، ەكى ءتۇرلى ءومىر وكىلدەرى، مۇنىڭ ءبارىن استاستىرا بەينەلەگەن فيلمدى قايتالاپ كورمەۋگە بولادى ما؟
8 femmes (ايەل)
كىم ايتتى ايەل زاتى دەتەكتيۆتەن الشاق دەپ؟! كەرىسىنشە، ەر ادامنىڭ كوزى جەتپەگەن نارسەنى ايەل كوزدىڭ قيىعىمەن-اق بايقاپ قالادى. بۇل فرانسۋزدىق فيلمنىڭ سيۋجەتى كورەرمەندى ويلاندىراتىنى راس. ءۇيدىڭ يەسى ءوز بولمەسىندە ءولى قالپىندا تابىلادى. تەلەفون ىستەمەيدى، كولىكتى بىرەۋ بۇزىپ قويعان. ۇيدە سەگىز ايەل ادام بار، ونىڭ ءبىرى - قىلمىسكەر! ۇرەيى ۇشقان ولار ءبىر-ءبىرىن تەرگەۋدى باستايدى. كىم ءولتىرۋشى؟ فيلم سوڭىندا اقيقات اشىلادى...
«Gone With The Wind» (جەل جوعالتقان)
رەسەي پروكاتىندا «ۋنەسەننىە ۆەتروم» اتاۋىمەن تانىلعان بۇل تۋىندى اڭىزدىق فيلمگە اينالدى. ماحاببات، سوعىس، رۋحتىڭ كۇشى تۋرالى حيكايا كورەرمەندى ريزا ەتەتىنىنە كۇمانىمىز جوق.
«Jeux d'enfants» (بالالىق ويىنى)
بۇل فيلم رەسەيدە «ۆليۋبيس ۆ مەنيا، ەسلي وسمەليشسيا» اتاۋىمەن تانىلعان ەدى. ءومىر بويىنا سوزىلعان ماحاببات حيكاياسىن اسەرلى بەينەلەگەن بۇل فيلمدى كوردىڭىز بە؟ بالا كەزىندەگى ويىندى ەرەسەك شاعىندا جالعاستىرعان ەكى ادامنىڭ بۇل ارەكەتىنىڭ ارتى نەگە اپاراتىنىن بىلگىڭىز كەلە مە؟ وندا فيلمدى كورىپ، العان اسەرىڭىزدى پىكىرگە قالدىرىپ وتىرىڭىز.
«Bridget Jones's Diary» (بريدجيت دجونس كۇندەلىگى)
ناعىز ايەل زاتىنا ارنالعان فيلم. بريدجيت ارتىق سالماق ءۇشىن ۋايىمداپ، كالوريلەرىن ساناپ جۇرەتىن قىز. كۇندەردىڭ كۇنىندە ول عاشىق بولادى. بۇل كەيىپكەردى باقىلاي وتىرىپ، ءبىز ءوزىمىزدى تانىپ قالامىز. كەز كەلگەن قىز ومىرىندە قاتەلىك جاسايدى، ءار قىزدىڭ دەرلىك جۇرەگى ءبىر رەت تە بولسىن جارالانعان ەدى، الايدا، ءبىز دەم الىپ، ەڭسەمىزدى كوتەرىپ، ارى قاراي ءومىر سۇرۋگە تالپىنامىز. اقىرىندا باقىتقا دا قولىمىز جەتەتىنى انىق. بۇل فيلمدى كورمەي وتپەڭىز!
«P.S. I love you» (پوستسكريپتۋم، مەن سەنى سۇيەمىن)
دۇنيەدەن كەتەر الدىندا سۇيىكتى ايەلىنىڭ قامىن ويلاپ، كۇيەۋى بىرنەشە حات قالدىرادى. ولاردىڭ ىشىندە ول كەلەسى ارەكەتتەردى ءتىزىپ وتىرادى. «انا دۇنيەدەن» كەلگەن حاتتاردىڭ ارقاسىندا جاس كەلىنشەك جۇدىرىعىنا كۇش جيناپ، جاستىقتان باسىن ايىرىپ، ءومىرىن جاڭادان باستايدى. كورەرمەننىڭ كوڭىلىنەن شىعاتىن، قاتتى اسەر بەرەتىن بۇل فيلم الەم بويىنشا مويىندالعان، ءارى سۇيىكتى كينو تۋىندىلارىنىڭ بىرىنە جاتادى. ءسىز كوردىڭىز بە؟
massaget.kz
