اۆتوكولىكتەردىڭ ەڭ تانىمال تۇستەرى انىقتالدى
مۇنداي مالىمەتتەردى ءوزىنىڭ زەرتتەۋىندە كولىك شىعارۋشىلارعا لاك- بوياۋ ماتەريالدارىنىڭ ءىرى جەتكىزۋشىسى PPG Industies كومپانياسى جاريالادى.
ساراپشىلار اق ءتۇستى كولىكتەر ەرەكشە تانىمال بولىپ جۇرگەنىن اتاپ ءوتتى. وتكەن جىلدىڭ قورىتىندىلارىمەن سالىستىرعاندا، وسىنداي كولىكتەردىڭ سانى ءۇش پايىزعا ارتتى. بۇل رەتتە كۇمىس ءتۇستى كولىك قۇرالدارى اۆتوموبيلشىلەرگە كوپ ۇناي قويمايتىنى انىقتالدى: وتكەن ەكى جىل بويىنشا ولاردى ۇناتۋ دەڭگەيى جەتى پايىزعا تومەندەگەن.
PPG Industies ماماندارىنىڭ بولجامىنشا، 2015 - جىلى تابيعي بوياۋ تۇرلەرى، مىسالى، قوڭىر جانە سارعىلت تۇستەر ەرەكشە تانىمال بولادى. مەتالل تۇستەس تۇستەرگە بويالعان كولىكتەرگە (قالايى، قولا، التىن جالاتىلعانداي تۇستەر) دە سۇرانىستىڭ ارتۋى كۇتىلۋدە.
سوڭعى اتالعان تۇستەردىڭ تانىمالدىلىعى وسىنداي تۇستەردىڭ زەرگەرلىك بۇيىمداردا، جيھاز جانە ونەركاسىپ ديزاينىندا ءجيى كەزدەسۋىمەن تۇسىندىرىلەدى.
ەستەرىڭىزگە سالا كەتەيىك، 2013 - جىلى دا كولىك قۇمارلار اراسىندا اق ءتۇس ەڭ تانىمال ءتۇس بولعان. ونىڭ ۇلەسى بارلىق اۆتوموبيلدەردىڭ 25 پايىزىن قۇرادى. ەكىنشى ورىندى (19 پايىزدان) كۇمىس تۇستەس جانە قارا ءتۇستى كولىكتەر السا، سۇر ءتۇستى كولىكتەردىڭ ۇلەسى 12 پايىزدى قۇراعان.
