پرەزيدەنت اۆتوبۋسقا وتىرىپ، حالىقتىڭ ارىز-شاعىمىن تىڭداپ قايتتى

استانا. قازاقپارات - كولۋمبيا پرەزيدەنتى حۋان مانۋەل سانتوس كوشەدەگى اۆتوبۋستاردىڭ بىرىنە ءمىنىپ، جولاۋشىلاردىڭ ارىز-شاعىمدارىن تىڭداپ قايتتى، دەپ حابارلايدى «الاش- اقپارات».

La Segunda پورتالىنىڭ حابارلاۋىنشا، سانتوس اۋدانارالىق باعداردى تاڭدادى. الدىمەن ول ءىرى اۆتوستانسيالارىنىڭ بىرىنە بارىپ، بيلەت الدى. سول جەردەن چاپينەرو اۋدانىنا قاتىنايتىن اۆتوبۋسقا ءمىندى. «پرەزيدەنت قوعامدىق كولىككە وققاعارلارىمەن بىرگە كىردى. دەگەنمەن، ولار وعان جولاۋشىلارمەن ەمىن-ەركىن سويلەسۋگە كەدەرگى جاساعان جوق. ادامدار سانتوسپەن فوتوعا ءتۇسىپ جاتتى. ءبىراق ولاردىڭ باسىم بولىگى ءوز ارىز-شاعىمدارىن ايتىپ، تالاپ-تىلەكتەرىن جەتكىزدى»، - دەپ جازدى La Segunda.

چاپينەرو ستانسياسىنا جەتكەننەن كەيىن سانتوس اۆتوبۋستان شىعىپ، اۋدان الاڭىنا دەيىن جاياۋ ءجۇردى. ول جەردە جەرگىلىكتى پوليتسيا وكىلدەرى الداعى مەرەكە كۇندەرى قوعامدىق قاۋىپسىزدىكتى قامتاماسىز ەتۋ جوسپارىن تانىستىرعان بولاتىن. كولۋمبيا پرەزيدەنتى جول-جونەكەي ءبىر دۇكەنگە كىرىپ، «ارەپا» دەپ اتالاتىن شەلپەكتى دە ساتىپ الدى. سونى الاڭعا جەتكەنشە جەپ، بارلىق ساتۋشىلار مەن جولاۋشىلارمەن امانداسىپ باردى.

اۆتور: ارمان اسقار

«الاش ايناسى»