الەمدەگى ەڭ ۇلكەن كۇن ەلەكتر ستانسياسى ىسكە قوسىلدى

استانا. قازاقپارات - ەلەكتر ەنەرگياسىن التەرناتيۆتى جولمەن ءوندىرۋ جالعاسىن تاۋىپ كەلەدى. جاقىندا كۇن ساۋلەسىنەن ەنەرگيا جينايتىن الەمدەگى ەڭ ۇلكەن ستانسيا ا ق ش- تا ءوز جۇمىسىن باستادى. عالامتورداعى اقپارات كوزىنە سەنەر بولساق، اتالعان ستانتسيا Topaz دەپ اتالادى ەكەن.

ەلەكتروستانسيانىڭ قۇرىلىسى ەكى جىل بۇرىن باستالىپ، ينجەنەرلەر كاليفورنيانىڭ 25 شارشى شاقىرىم جەرىنە 9 ميلليون كۇن پانەلىن ورنالاستىرعان. جالپى جوباعا $2,5 ميلليارد قارجى جۇمسالىپتى. Topaz-دىڭ ونىمدىلىك قۋاتى - 550 مەگاۆاتت.

عالىمداردىڭ ايتۋىنشا، Topaz ەلەكتر ستانسياسىنان شىققان كۇن ەنەرگياسىن پايدالانۋ جىلىنا 377 مىڭ توننا كومىرقىشقىل گازىنىڭ اۋاعا تاراۋىنىڭ الدىن الادى ەكەن.

ايتا كەتسەك، الىپ قۋات كەشەنى الەمدەگى ءبىرىنشى ورنىن كوپكە دەيىن ساقتامايتىن سەكىلدى. سەبەبى قۇراستىرۋشىلار ءدال سول كاليفورنيا جازىعىنان Topaz ەلەكتر ستانسياسىنان دا ۇلكەندەۋ ەتىپ تاعى ءبىر كەشەننىڭ قۇرىلىسىن باستاپ جىبەرگەن. ونىڭ جالپى ءوندىرۋ قۋاتى 579 مەگاۆاتت بولماق.

massaget.kz