نۇرسۇلتان ءومىر بويى شىندىق ءۇشىن كۇرەسىپ كەلە جاتقان ادام - م. جولداسبەكوۆ

استانا. قازاقپارات - نۇرسۇلتان نازاربايەۆ ءومىر بويى شىندىق ءۇشىن كۇرەسىپ كەلە جاتقان ادام. «تىعىرىقتان جول تاپقان» فيلمىنىڭ تۇساۋكەسەر كورسەتىلىمىندە مەملەكەت جانە قوعام قايراتكەرى، عالىم، فيلولوگيا عىلىمىنىڭ دوكتورى، پروفەسسور، اكادەميك مىرزاتاي جولداسبەكوۆ وسىلاي ايتتى.

 «نۇرەكەڭ وتە جاس جەتىلدى. قازاق ازاماتتارىنىڭ قولىنان كەلمەگەن ۇلكەن ورتالىق پارتيا كوميتەتىنىڭ قابىرعاسىنىڭ وزىندە كۇرەستى. ول كەزدە جۇرت جالعان راپورت بەرۋگە اۋەس ەدى. شىندىقتىڭ بارلىعىن جاسىراتىن، جالعان سويلەيتىن. ال نۇرسۇلتان ءومىر بويى شىندىق ءۇشىن كۇرەسىپ كەلە جاتقان ادام. سول كۇرەستەن اقىر سوڭىندا باقىتىن تاپتى»، - دەدى ول تىلشىلەرگە بەرگەن سۇحباتىندا.

 ونىڭ ايتۋىنشا، ەلباسى حالىق تىزگىنىن ءبىر مەزەتتە العان جوق، وعان بۇل دەڭگەيگە جەتۋ ءۇشىن ۇلكەن تەر توگۋگە كەلدى.

 «نۇرسۇلتان نازاربايەۆ ءبىر كۇندە وسىلاي جەتىلىپ، جۇرت بىلەتىن پرەزيدەنت بولعان جوق. ونىڭ جولى وتە اۋىر بولدى. بۇرالاڭ بولدى. سول تىعىرىقتان جول تاپقان، ەلىن وسىنداي كوشكە باستاعان، ەڭ اۋىر كەزدە ەل تىزگىنىن قولىنا العان، تاعدىرىنا جاۋاپ بەرگەن، سونى موينىنا العان، حالىقتان شىققان كەمەڭگەر. سوندىقتان ەلىمىز مىنا جارقىن مەرەكە كۇنى قازاقستان تۇڭعىش پرەزيدەنتىنىڭ كۇنى نۇرەكەڭنىڭ ءوزى قاتىسىپ، بالا- شاعاسىمەن كەلىپ، ورتامىزدا وتىردى»، - دەيدى جازۋشى.

 «مەنىڭ تاڭعالاتىنىم بۇل ءارى دەرەكتى ءارى كوركەم فيلم. باسقاشا بولۋى مۇمكىن ەمەس تە ەدى. كرەملدى اۋزىنا قاراتۋ وڭاي ەمەس، سونى اۋزىنا قاراتقان ادام. مەن كوپشىلىككە، بارشا قازاقستان ازاماتتارىنا وسى فيلمنىڭ شىعۋىمەن قۇتتى بولسىن دەيمىن»، - دەپ ءتۇيدى ءسوزىن م. جولداسبەكوۆ.

 «تىعىرىقتان جول تاپقان» فيلمىنىڭ تۇساۋكەسەر كورسەتىلىمىنە ق ر پرەزيدەنتى نۇرسۇلتان نازاربايەۆتىڭ ءوزى قاتىسقاندىعىن ايتا كەتۋ كەرەك. كينوجوبانى ق ر مادەنيەت جانە سپورت مينيسترلىگىنىڭ تاپسىرىسىمەن شاكەن ايمانوۆ اتىنداعى قازاقفيلم كينوستۋدياسى تۇسىرگەن.

 وندا قازاقستان پرەزيدەنتى نۇرسۇلتان نازاربايەۆتىڭ 1970- جىلدارداعى ەڭبەك جولى، ساياساتقا ەندى عانا قادام باسقان ساتتەرى سۋرەتتەلگەن. فيلمنىڭ رەجيسسەرى - رۇستەم ءابدىراشوۆ.

 ەسكە سالا كەتەيىك، 2011 -جىلدان بەرى «ەلباسى جولى» كينوەپوپەياسى ءتۇسىرىلىپ كەلە جاتىر. بۇنىڭ الدىندا كينوەپوپەياعا «بالالىق شاعىمنىڭ اسپانى» (2011) ، «وتتى وزەن» جانە «تەمىر تاۋ» (2013) فيلمدەرى ەنگەن بولاتىن.

 «تىعىرىقتان جول تاپقان» فيلمىنىڭ ءتۇسىرىلىمى 2014 - جىلى اقپان ايىندا باستالدى. كينوعا قازاقستاندىق اكتەرلەرمەن بىرگە ۆالەنتين گافت، ەۆگەنيي سيديحين، ۆلاديمير ستەكلوۆ، ەۆگەنيي ستىچكين، ۆيكتور سۋحورۋكوۆ سىندى رەسەيلىك اكتەرلەر ەندى. ەلباسىنىڭ بەينەسىن قازاقستاندىق اكتەر نۇرلان ءالىمجانوۆ سومدادى. فيلم كوپشىلىك نازارىنا 4 - جەلتوقساندا قازاقستاننىڭ 25 قالاسىندا 50 كينوتەاتردا تارتۋ ەتىلەدى دەپ جوسپارلانعان.

 اۆتور: جاسۇلان جولدىبايەۆ