مەملەكەت باسشىسى «تىعىرىقتان جول تاپقان» فيلمىنىڭ تۇساۋكەسەرىن تاماشالاۋدا – فوتورەپورتاج

استانا. قازاقپارات - بۇگىن استاناداعى «قازاقستان» ورتالىق كونتسەرت زالىندا ق ر تۇڭعىش پرەزيدەنتى جايلى تۇسىرىلگەن «تىعىرىقتان جول تاپقان» فيلمىنىڭ تۇساۋكەسەرى ءوتتى. ونىڭ العاشقى كورسەتىلىمىن ەلباسى نۇرسۇلتان نازاربايەۆ تاماشالادى.

ق ر مادەنيەت جانە سپورت مينيسترلىگىنىڭ تاپسىرىسىمەن شاكەن ايمانوۆ اتىنداعى قازاقفيلم كينوستۋدياسى تۇسىرگەن «تىعىرىقتان جول تاپقان» فيلمى «ەلباسى جولى» كينوەپوپەياسىنىڭ ءتورتىنشى ءبولىمى بولىپ تابىلادى.

وندا قازاقستان پرەزيدەنتى نۇرسۇلتان نازاربايەۆتىڭ 1970- جىلدارداعى ەڭبەك جولى، ساياساتقا ەندى عانا قادام باسقان ساتتەرى سۋرەتتەلگەن. فيلمنىڭ رەجيسسەرى - رۇستەم ءابدىراشوۆ.

ەسكە سالا كەتەيىك، 2011 - جىلدان بەرى «ەلباسى جولى» كينوەپوپەياسى ءتۇسىرىلىپ كەلە جاتىر. بۇنىڭ الدىندا كينوەپوپەياعا «بالالىق شاعىمنىڭ اسپانى» (2011) ، «وتتى وزەن» جانە «تەمىر تاۋ» (2013) فيلمدەرى ەنگەن بولاتىن.

«تىعىرىقتان جول تاپقان» فيلمىنىڭ ءتۇسىرىلىمى 2014 - جىلى اقپان ايىندا باستالدى.

 كينوعا قازاقستاندىق اكتەرلەرمەن بىرگە ۆالەنتين گافت، ەۆگەني سيديحين، ۆلاديمير ستەكلوۆ، ەۆگەني ستىچكين، ۆيكتور سۋحورۋكوۆ سىندى رەسەيلىك اكتەرلەر ءتۇستى. ەلباسىنىڭ بەينەسىن قازاقستاندىق اكتەر نۇرلان ءالىمجانوۆ سومدادى. فيلم كوپشىلىك نازارىنا 4 - جەلتوقساندا قازاقستاننىڭ 25 قالاسىندا 50 كينوتەاتردا تارتۋ ەتىلەدى دەپ جوسپارلانعان.

 

 اۆتور: جاسۇلان جولدىبايەۆ