ەلباسىمەن قۇرداس پرەزيدەنتتەر
تۇڭعىش پرەزيدەنتتەر
ميرچا سنەگۋر. مولدوۆا رەسپۋبليكاسىنىڭ تۇڭعىش پرەزيدەنتى. 1940 - جىلدىڭ 17 - قاڭتارىندا تۋعان. ماماندىعى - اگرونوم. كەڭەس وداعى ىدىراعان سوڭ، مولدوۆا رەسپۋبليكاسى 1991 - جىلدىڭ 17 - تامىزىندا ءوز تاۋەلسىزدىگىن جاريالادى. ال بۇدان ءبىر جىل بۇرىن، 3 - قىركۇيەكتە بيلىك باسىنا ميرچا سنەگۋر كەلگەن ەدى. ول 1997 - جىلدىڭ 15 - قاڭتارىنا دەيىن جەتى جىل پرەزيدەنتتىك قىزمەت اتقاردى.
قازاقستاننىڭ مولدوۆامەن اراداعى ديپلوماتيالىق قارىم- قاتىناسى 1992 - جىلدىڭ 27 - شىلدەسىنەن باستاپ، ياعني سنەگۋر تۇسىندا ورنادى.
بۇل ەلدىڭ ەكىنشى پرەزيدەنتى پەتر لۋچينسكي دە - ەلباسى نۇرسۇلتان نازاربايەۆتىڭ قۇرداسى.
ساپارمۇرات نيازوۆ. تۇرىكمەنستاننىڭ تۇڭعىش پرەزيدەنتى. 1990 - جىلدىڭ 27 - قازانىندا تۇرىكمەنستانعا باسشى بولعان س. نيازوۆ 1940 - جىلدىڭ 19 - اقپانىندا دۇنيەگە كەلگەن. ماماندىعى - ينجەنەر- ەنەرگەتيك. ساپارمۇرات اتاي ۇلى 2006 - جىلدىڭ 21 - جەلتوقسانىندا جۇرەك تالماسىنان قايتىس بولدى.
ءتۇبى ءبىر تۇركى ەلدەرى - قازاقستان مەن تۇرىكمەنستاننىڭ تاريحي- مادەني، ەكونوميكالىق- الەۋمەتتىك بايلانىستارى تەرەڭنەن باستالادى. ال رەسمي ديپلوماتيالىق قاتىناستارعا 2012 - جىلى 20 جىل تولدى.
ەكس- پرەزيدەنتتەر
تابارە ۆاسكەس. ۋرۋگۆاي شىعىس رەسپۋبليكاسىنىڭ 39 ىنشى پرەزيدەنتى.
2005-2010 - جىلدارى پرەزيدەنت قىزمەتىن اتقاردى. 1940 - جىلدىڭ 17 - قاڭتارىندا تۋعان. ماماندىعى - ونكولوگ. ۆاسكەستىڭ پرەزيدەنتتىگى تۇسىندا ۋرۋگۆاي راۋندى بويىنشا قابىلدانعان مىندەتتەمەلەر دەڭگەيىندە قازاقستان- ۋرۋگۆاي تاۋار اينالىمى دامي ءتۇستى.
ءابدۋرراحمان ۋاحيد. يندونەزيانىڭ ءتورتىنشى پرەزيدەنتى. 1940 - جىلدىڭ 7 - قىركۇيەگىندە تۋعان. 1999-2001 -جىلدارى يندونەزيا پرەزيدەنتى قىزمەتىن اتقاردى. ماماندىعى - ءدىنتانۋشى، جۋرناليست. ساياسات تانۋشىلار ءوز حالقىنان قولداۋ تاپپاعان ءۋاحيدتىڭ بيلىك باسىنداعى قىزمەتىنىڭ ءساتسىز بولعانىن ايتادى. ءتورتىنشى پرەزيدەنت 2009 - جىلدىڭ 30 - جەلتوقسانىندا دۇنيەدەن ءوتتى.
يندونەزيا - قازاقستان تاۋەلسىزدىگىن بىردەن - 1991 - جىلى العاش مويىنداعان مەملەكەتتەردىڭ ءبىرى. ەكى ەل اراسىندا ديپلوماتيالىق قاتىناس 1993 - جىلدىڭ 2 - ماۋسىمىندا ورنادى.
قازىرگى مەملەكەت باسشىلارى
يواحيم گاۋك. گەرمانيا فەدەراتيۆتى رەسپۋبليكاسىنىڭ پرەزيدەنتى. 1940 - جىلى 24 - قاڭتاردا تۋعان. ەڭبەك جولىن پروتەستانت شىركەۋىنىڭ پاستورى بولىپ باستاعان. ول پرەزيدەنت بوپ 2012 - جىلى سايلاندى.
قازاقستان گەرمانيا فەدەراتيۆتىك رەسپۋبليكاسىمەن 1992 - جىلدىڭ 11 - اقپانىنان باستاپ ديپلوماتيالىق قارىم- قاتىناس ورناتقان. سونداي- اق گەرمانيا قازاقستاننىڭ باتىستاعى ءىرى ساۋدا- ساتتىق ارىپتەسى بوپ سانالادى.
مۇحاممەد يۋسۋف ءال- ماكريف. ليۆيا رەسپۋبليكاسىنىڭ باسشىسى، ەلدىڭ جالپىعا ورتاق ۇلتتىق كونگرەسىنىڭ ءتوراعاسى. ۇزاق جىل ديپلوماتيالىق قىزمەت اتقارعان.
مۋاممار كاددافي ديكتاتۋراسىن قۇلاتقان ازاماتتىق سوعىستان كەيىن وتكەن سايلاۋدىڭ ناتيجەسىندە 2012 - جىلدىڭ 9 - تامىزىندا ۇلتتىق كونگرەسس باسشىسى بولدى.
قازاقستان مەن ليۆيا اراسىنداعى ديپلوماتيالىق قارىم- قاتىناس 1992 - جىلدىڭ 13 - ناۋرىزىنان باستاۋ الادى.
«الاش ايناسى»
اۆتور: بولاتبەك مۇحتاروۆ
