ماعان قازاقستاننىڭ جالپى حالىقتىق سەنىمى زور قۋات بەردى - ن. نازاربايەۆ
بۇگىن استانادا 1 - جەلتوقسان - ق ر تۇڭعىش پرەزيدەنتى كۇنىن مەرەكەلەۋ اياسىنداعى باستى ءىس- شارالاردىڭ ءبىرى - «ءبىر وتان! ءبىر تاعدىر! ءبىر ەلباسى!» مەرەكەلىك كونسەرتىنە قاتىسىپ، وندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.
ءوز سوزىندە ەلباسى ن. نازاربايەۆ وسىدان 23 جىل بۇرىن 1991 - جىلدىڭ ءبىرىنشى جەلتوقسانىندا قازاقستاننىڭ تۇڭعىش پرەزيدەنتى بولىپ سايلانعانىن، سوسىن وسى تاريحي كۇننەن 15 كۇن وتكەن سوڭ ەلىمىزدىڭ تاۋەلسىزدىگى جاريالانعانىن اتاپ ءوتتى.
«بۇكىل حالىقتىق داۋىس بەرۋ بارىسىنداعى ماعان كورسەتىلگەن جالپى حالىقتىق سەنىم ەرەكشە جىگەر، زور قۋات بەردى. مىنە، وسىدان بەرى 23 جىل بويى ءبىز ءوز ەلىمىزدىڭ تاۋەلسىز دامۋ داڭعىلىمەن ءجۇرىپ كەلەمىز» - دەدى مەملەكەت باسشىسى. سونىمەن قاتار، ەلباسى تاريحي كەزەڭمەن سالىستىرعاندا اسا قىسقا ۋاقىت ارالىعىندا قازاقستان الەمگە تانىمال ەلدىڭ بىرىنە اينالعانىن اتاپ ءوتتى.
«تاۋەلسىزدىك جىلدارىندا بۇگىنگىدەي باقىتتى ادامداردىڭ جاڭا تولقىنى ءوسىپ جەتىلدى. ولاردىڭ الدىندا ءالى دە ۇلكەن اسۋلار، جاڭا جەتىستىكتەر كۇتىپ تۇر»، - دەدى نۇرسۇلتان ءابىش ۇلى جاستارعا قاراتا ايتقان سوزىندە.
ەسكە سالا كەتەيىك، بىلتىر بۇل اتاۋلى كۇن «قازاقستان - 2050» ۇرانىمەن وتكەن بولسا، بيىلعى شارا «ماڭگىلىك ەل» ۇرانىمەن ءوتىپ جاتىر.
ايتا كەتەيىك، مەرەكەلىك شارا كەشقۇرىم «استانا وپەرا» وپەرا جانە بالەت تەاترىنىڭ الدىندا ەلباسىنىڭ قاتىسۋىمەن جاڭا جىلدىڭ باستى شىرشاسىن جاعۋ سالتاناتىنا ۇلاسادى. «باقىت قۇسى» دەپ اتالاتىن باستى شىرشانىڭ بيىكتىگى 25 مەترگە سوزىلعان. مۇنىمەن قوسا بۇگىن ەلوردا تۇرعىندارى مەن قوناقتارى «ەلباسى جولى» كينو ەپوپەياسىنىڭ جالعاسىن تاماشالايدى. بۇل كوركەم تۋىندى «قازاقستان» ورتالىق كونسەرت زالىندا كورسەتىلەدى.
اۆتور: قانات مامەتقازى ۇلى 
