كەلەسى جىلى قازاقستاندا حالال- دارىلەر پايدا بولادى

استانا. قازاقپارات - جاقىن ارادا قازاقستاندىق فارماتسيەۆتيكالىق نارىققا اراب مەملەكەتىندەگى حالال- پرەپاراتتاردى ءوندىرۋشى كومپانيا كىرۋى مۇمكىن، دەپ حابارلادى «مەگاپوليس» گازەتى.

 يوردانيالىق فارمكومپانيا ءبىر جىلدىڭ ىشىندە ەلىمىزگە حالال دارىلىك پرەپاراتتاردى جەتكىزۋدى وڭ جولعا قويىپ، قازاقستاندا فيليال اشۋدى كوزدەپ وتىر.

 «Kazakhstan International Halal Expo-2014» IV حالىقارالىق كورمەسىنە قاتىسۋشى، 1994 - جىلدان جۇمىس ىستەپ كەلە جاتقان كومپانيا وكىلى، كومپانيانىڭ ەكسپورت بويىنشا مەنەدجەرى احمەد جابەر حابارلاعانداي، ونىڭ ەلىندەگى فارميندۋستريا نارىعىندا بارلىق پرەپاراتتار حالال. ولاردىڭ قاراپايىم دارىلەردەن ەرەكشەلىگى - قۇرامىندا شوشقا مايى مەن الكوگولدىڭ جوقتىعى.

يوردانيادا حالال دارىلەر شىعاراتىن وزگە ەلدەردە سياقتى فارمنارىق قاتاڭ باقىلانادى. ساپاسىن راستايتىن ءتيىستى سەرتيفيكات بولماعان جاعدايدا پرەپارات ساتىلمايدى.

 «قازاقستاننىڭ فارممەديندۋسترياسى» قاۋىمداستىعىنىڭ ءتوراعاسى سەرىك سۇلتانوۆ ايتقانداي، وتاندىق ءدارىحانالاردا ازىرگە حالال پرەپاراتتار ساتىلمايدى. ەگەر ەلدىڭ فارمنارىعىندا تاعى ءبىر كومپانيا پايدا بولعان جاعدايدا، وسى سالانى رەتتەيتىن زاڭناماعا تولىقتىرۋلار ەنگىزۋ قاجەت. مۇندا دا ماسەلەلەر پايدا بولۋى مۇمكىن.

 ەسكە سالا كەتەيىك، رەسپۋبليكادا رەسمي تۇردە حالالدىڭ شۇجىق ءونىمى مەن قوناق ءۇي قىزمەتىنىڭ ستاندارتى قابىلداندى. قالعاندارى: حالال كونفەتتەر، حالال سۋ بۇل بيزنەسمەندەردىڭ ويلاپ تاپقانى.