ەلباسى اقوردادا پرەزيدەنتتىڭ بايراعىن كوتەرۋگە ارنالعان سالتاناتتى راسىمگە قاتىستى - فوتو رەپورتاج

استانا. قازاقپارات - مەملەكەت باسشىسى نۇرسۇلتان نازاربايەۆ قازاقستان رەسپۋبليكاسى پرەزيدەنتىنىڭ بايراعىن كوتەرۋ جانە مەملەكەتتىك كۇزەت قىزمەتىنىڭ تۋىن تاپسىرۋ راسىمىنە قاتىستى، دەپ حابارلادى اقوردانىڭ باسپا ءسوز قىزمەتى.

ەلباسى شاراعا قاتىسۋشىلارعا ارناعان سوزىندە تاۋەلسىز ەلىمىزدىڭ تاريحىندا العاش رەت مەملەكەتتىك كۇزەت قىزمەتى قۇرىلعانىن ايتتى.

- سىزدەر تاۋەلسىزدىكتى نىعايتۋعا اتسالىساسىزدار، مەملەكەتتىك مەحانيزمنىڭ تۇراقتى جۇمىسىن قامتاماسىز ەتە وتىرىپ، قاۋىپ- قاتەرلەرگە قارسى تۇراسىزدار. سىزدەردىڭ قىزمەتتەرىڭىزدى، بالكىم، بۇكىل حالىق كورمەيتىن بولار، ءبىراق سىزدەر جاۋاپكەرشىلىك اۋقىمى زور جۇمىس اتقاراسىزدار. قىزمەتتى لايىقتى اتقارۋ ءۇشىن ءتارتىپ، ۇلكەن ماشىق پەن جوعارى مورالدىق دايىندىق قاجەت. وزدەرىڭىزگە جۇكتەلگەن سەنىمدى ابىرويمەن اقتايتىندارىڭىزعا سەنىمدىمىن، - دەدى مەملەكەت باسشىسى.

نۇرسۇلتان نازاربايەۆ سونداي- اق قازاقستاندىقتاردىڭ 23 جىل بۇرىن تاريحتا ءبىرىنشى رەت بۇكىل حالىقتىق داۋىس بەرۋ ارقىلى مەملەكەت باسشىسىن سايلاعانىنا توقتالدى.

- بۇكىل حالىقتىق سەنىمگە ارقا سۇيەي وتىرىپ، مەن 16- جەلتوقساندا ەلىمىزدىڭ تاۋەلسىزدىگىن جاريالادىم. سول سەبەپتى دە تۇڭعىش پرەزيدەنت كۇنى مەن الداعى ۇلتتىق مەرەكە - تاۋەلسىزدىك كۇنى اراسىندا تىعىز بايلانىس بار، - دەدى قازاقستان پرەزيدەنتى.

سوڭىندا مەملەكەت باسشىسى وفيتسەرلەرگە مىقتى دەنساۋلىق، وتانىمىزدىڭ يگىلىگى جولىنداعى جاۋاپتى قىزمەتتەرىنە تابىس تىلەدى.

ءراسىم بارىسىندا مەملەكەتتىك ءانۇراننىڭ اۋەنىمەن رەزيدەنسيا الدىنداعى تۋ تۇعىرعا قازاقستان رەسپۋبليكاسى پرەزيدەنتىنىڭ بايراعى كوتەرىلدى.

قازاقستان رەسپۋبليكاسىنىڭ رامىزدەرىنە اسكەري قۇرمەتىن وتەگەن پارادتىق ەسەپ توپ ساربازدارى «اقوردا» الدىنداعى الاڭدا ساپ تۇزەپ ءوتتى.

بايراق رەسپۋبليكا ەلورداسىنداعى قازاقستان پرەزيدەنتىنىڭ رەزيدەنسياسىندا تۇرادى، ال مەملەكەت باسشىسىنىڭ ساپارلارى كەزىندە باسقا رەزيدەنسيالاردا، رەسپۋبليكا پرەزيدەنتىنىڭ كولىكتەرىندە بولادى.