موڭعولياداعى قازاق ستۋدەنتى توپ جاردى

 استانا .قازاقپارات - موڭعولدىڭ ۇلتتىق جوعارعى وقۋ ورنىندا وقيتىن قازاق ستۋدەنتى ءداستۇرلى ونەر بايقاۋىندا ۇلتتىق مۋزىكا جانرى بويىنشا قازاقتىڭ قارا دومبىراسىمەن كۇي ورىنداپ، جەڭىمپاز اتاندى.

 ون ەكى مىڭ ستۋدەنت وقيتىن موڭعول ەلىنىڭ ەڭ ۇلكەن جوعارعى وقۋ ورنىنىڭ ءبىرى ول -  موڭعولدىڭ ۇلتتىق جوعارعى وقۋ ورنى. بۇگىندە وسى ۋنيۆەرسيتەتتىڭ 1-كۋرس قازاق ستۋدەنتى قانداسىمىز نۇربەك جاناربەك ۇلى وقۋ ورداسى ۇيىمداستىرعان ءداستۇرلى ونەر بايقاۋىندا ۇلتتىق مۋزىكا جانرى بويىنشا قۇرمانعازىنىڭ «بالبىراۋن» ، «ەركە سىلقىم» كۇيلەرىن الەم كلاسسيكتەرىمەن قوسىپ پوپۋري ورىنداپ باس جۇلدەنى جەڭىپ الدى.

 نۇربەك كۇيدەن بولەك انگە دە جاقىن، قازىرگى تاڭدا ماتەماتيكا ماماندىعى بويىنشا ءبىلىم الۋدا. سپورتتى جانى سۇيەتىن قانداسىمىز بوكسقا قۇمار. تاۋعا شىققاندى دا جانى سۇيەدى ەكەن.

ءبىر جىلدارى اۆستراليادان كەلگەن قوس الپينيستى ەرتىپ، الدىمەن تسامباگارۆ تاۋىن، كەيىن بەسبوعدا بيىگىن باعىندىرعانى مىنا سۋرەتتەردەن بەلگىلى.

كۇيشىلىكتەن بولەك كولىنە اققۋ قاز قونعان، قاڭباعىن ءتۇرىپ قۋعان جەل، كوڭىلى كوكتەم جاز بولعان، ىستىقسىڭ ماعان تۋعان جەر دەپ انگە سالاتىن ادەتى بار. ارينە ونىڭ ارمانى اتامەكەندى كورۋ. بۇگىندە پيانينومەن الەم كلاسسيكتەرىنىڭ شىعارمالارىن ويناپ ۇيرەنۋ ۇستىندە ەكەن. نۇربەك موڭعوليادا وتكەن بىرنەشە حالىقارالىق جارىستاردىڭ جەڭىمپازى. ۇلانباتىردا جىل سايىن وتەتىن «دۋۋلاح ءوۆ-2011» جارىسىنىڭ جۇلدەسىن ايماقتان جەڭىپ الىپ، رەسپۋبليكالىق دەڭگەيگە كوتەرىلگەن ەدى. قانداسىمىزدىڭ ونەرى وركەندەي بەرسىن دەيمىز!.

 

 Baq.kz