قاراشىعاناق تۇبىندە بالالاردىڭ جاپپاي تالىپ قالۋىنا قاتىستى جاڭا مالىمەتتەر پايدا بولدى
بۇل تۋرالى اتا-انالاردىڭ ءبىرى مەن ءبورىلى اۋدانى اكىمىنىڭ ورىنباسارى ازامات سافيماليەۆ "موي گورود" پورتالىنا حابارلادى.
"ولاردان اسقىنۋ انىقتالعان جوق. ج ر ۆ ي نەمەسە سۋىق تيۋ سياقتى اۋرۋ بەلگىلەرى بولعاندىقتان، بالالاردى قوسىمشا تەكسەرۋگە اۋىستىردىق"، - دەدى شەنەۋنىك.
اكىم ورىنباسارىنىڭ ايتۋىنشا، ءبورىلى ورتالىق اۋداندىق اۋرۋحاناسىندا قازىر ءتورت بالا جاتىر، ولاردان دا اسقىنۋ انىقتالعان جوق. "قالعان بالالار مەن مۇعالىمدەر كەشە كەشكىسىن اۋرۋحانادان شىعارىلدى. دارىگەرلەر ولاردى ۇيلەرىنە جىبەرۋ كەرەك دەگەن قورىتىندى شىعاردى. اكىمدىك اۆتوبۋس ءبولىپ، بالالار مەن اتا-انالار بەرەزوۆكاعا جونەلتىلدى"، - دەدى ول.
جەرگىلىكتى دەنساۋلىق ساقتاۋ باسقارماسىنىڭ باسپا ءسوز قىزمەتى التى بالانىڭ تورتەۋىنە دياگنوز قويىلعانىن ايتتى. قالعان ەكەۋى تەكسەرىلىپ جاتىر. "ءبىر بالادا - ورتا دەڭگەيدەگى قان ازدىق، تاعى ءبىر بالاعا ەپيلەپسيا(تالما) دياگنوزى قويىلدى. كەلەسى وقۋشىدان مي جاراقاتى، ەندى ءبىر بالادان گيپوتالاميا سيندرومى انىقتالدى"، - دەپ حابارلادى باسقارما ماماندارى.
ەسكە سالا كەتەيىك، جۋىردا بەرەزوۆكا ەلدى مەكەنىندەگى مەكتەپتە بالالاردىڭ جاپپاي ەسىنەن تانا باستاعانى حابارلانعان ەدى. 28 - قاراشا كۇنى جەرگىلىكتى اۋرۋحاناعا، نەگىزىنەن، 11 مەن 16 جاستاعى 19 بالا جانە ءۇش مۇعالىم جەتكىزىلدى. ولاردىڭ باسى اينالىپ، دەنەسى قۇرىسقان. دارىگەرلەر "زورىعۋ" دەگەن الدىن الا دياگنوز قويدى. ولار "باللونشادان شاشىلعان گازدان ۋلانۋ" دەگەن دياگنوزدى دا قاراستىرىپ جاتىر.
ءبىراق اتا-انالار بۇل پىكىرمەن كەلىسپەيدى، ولار بارىنە ەكولوگيا كىنالى دەپ ەسەپتەيدى - اۋىل ىرگەسىندە قاراشىعاناق كەن ورنى بار. مەكتەپتە مۇعالىم بولىپ جۇمىس ىستەيتىن الەكسەي كوبانىڭ جەتىنشى سىنىپتاعى بالاسى دا تالىپ قالعان. ول: "مۇنىڭ الدىندا بىرنەشە كۇن بۇرىن بالالار تالىپ قالا باستادى، دەنەلەرى قاتتى قۇرىستى، اۋىزدارىنان سىلەكەيى اعىپ، اياقتارى تارتىلدى. مەنىڭ ۇلىم دا اۋرۋحانادا. ول اۋىر حالدە جەتكىزىلىپ، بىردەن سيستەماعا جاتقىزىلدى"، - دەيدى.
كوبا بۇل وقيعاعا كەن ورنىنىڭ قاتىسى بارىنا سەنىمدى. "ءبىز كەن ورنىنىڭ، ونى بۇقتىرۋدىڭ نە ەكەنىن جاقسى بىلەمىز، توڭىرەكتە الاۋ جانىپ تۇرادى، تۇندە جارىق قاجەت ەمەس. سوڭعى كەزدەرى ءيىس شىقتى، بىرنەشە كۇن بۇرىن قاتتى دىبىس شىقتى. ءبىز قانشا رەت شاعىمدانساق تا، ەشكىم ءبىزدى تىڭداعىسى كەلمەيدى. ءبىز ءۇشىن ءومىرىمىز بەن بالالارىمىز بارىنەن قىمبات، قولىمىزدا بالامىز ءال ۇستىندە جاتقاندا نە ىستەرىڭدى بىلمەيسىڭ. جىلدام جەتىپ، كومەك كورسەتكەن دارىگەرلەرگە راقمەت"، - دەيدى الەكسەي كوبا.
28 - قاراشا كۇنى بەرەزوۆكا ەلدى مەكەنىنە Karachaganak Petroleum Operating B. V. كومپانياسىنىڭ ەڭبەك قاۋىپسىزدىگى جانە قاۋىپسىزدىك تەحنيكاسى جونىندەگى باسقارۋشىسى ستيۆ رايت كەلدى. ول بالالارى اۋرۋحاناعا تۇسكەن اۋىل تۇرعىندارىمەن كەزدەستى.
"بۇعان دەيىن مۇنداي وقيعا بولعان ەمەس. سانيتارلىق قورعاۋ ايماعى نورمالارعا سايكەس بەكىتىلگەن. بىزدە پەريمەتر بويىنشا ارنايى ەكولوگيالىق باقىلاۋ تۇراقتارى ورناتىلعان. ولار ءقاۋىپتى گازدار مەن يىستەردىڭ ءبارىن ءدال باقىلاپ، تىركەپ وتىرادى"، - دەدى رايت.
"تۇڭعىش جانە بەرەزوۆكا اۋىلدارى كوشىرىلۋى ءتيىس بولعان ەدى، ءبىراق تۇڭعىش اۋىلى كوشىرىلدى دە، ءبىز قالىپ قويدىق. اۋىلدىڭ كەن ورنىنان ءۇش شاقىرىم قاشىقتىقتا بولۋى قالىپتى جايت سانالدى. قايداعى قالىپتى جايت؟ لاس اۋا بەس-التى شاقىرىمعا تارالىپ جاتقان جوق پا؟" - دەيدى تۇرعىندار.
قازىرگى ۋاقىتتا وقيعا ورنىندا ارنايى قۇرىلعان كوميسسيا جۇمىس ىستەپ جاتىر. وعان وبلىس اكىمىنىڭ ورىنباسارى ارمان وتەعۇلوۆ ءتوراعالىق ەتەدى.
tengrinews.kz
