قازاقستان الەمدە ەنەرگيا رەسۋرستارىن وندىرۋشىلەردىڭ وندىعىنا ەنۋگە نيەتتى - ك. ءماسىموۆ
«ءبىز ءۇشىن بۇل ۇيىمعا ءتوراعالىق ەتۋ ۇلكەن مارتەبە. ەنەرگەتيكالىق نارىقتا باسقارۋدا، وسى نارىقتا بايلانىستاردى ورناتۋدا ەنەرگەتيكالىق حارتيا ۇلكەن ءرول اتقارادى.
بۇگىنگى جيىننىڭ تاقىرىبى ترانزيتتىك دالىزدەردى دامىتۋعا ارنالعانىنا توقتالعان ك. ءماسىموۆ، تەڭىزگە شىعار جولى جوق ءارى ەۋرازيانىڭ ورتاسىندا ورنالاسقان مەملەكەتتەر بۇل تاقىرىپتى باسىمدىقتى باعىت رەتىندە قاراستىراتىندىعىن اتاپ ءوتتى.
ۇكىمەت باسشىسىنىڭ پايىمىنشا، الداعى جىلدارى ەلىمىزدە ەنەرگيا رەسۋرستارىن ءوندىرۋ ارتاتىن بولادى.
«ءبىز ەنەرگيا رەسۋرستارى باعىتىندا 10 نەگىزگى وندىرۋشىلەردىڭ قاتارىنا ەنۋگە نيەتتىمىز، ونىڭ ىشىندە تابيعي گازدى ءوندىرۋ دە قامتىلادى. سونىمەن قاتار تاقتاتاس گازىن (سلانتسيەۆىي گاز) ءوندىرۋ بويىنشا جوبانى ازىرلەمەكپىز»، - دەدى ك. ءماسىموۆ.
ۇكىمەت باسشىسى ەنەرگەتيكالىق سالادا قازاقستاندا اۋقىمدى جوبالاردى جۇزەگە اسىرۋ ارقىلى كادرلار ماسەلەسى شەشىلىپ، تۇراقتى دامۋعا جاعداي جاسالعاندىعىن اتاپ ءوتتى.
پرەمەر- مينيستر ۇكىمەتتىڭ ءرولى كورسەتكىشتەردىڭ ارتۋىن قامتاماسىز ەتۋمەن قاتار، ەلدەگى بار رەسۋرستاردى ءتيىمدى پايدالانۋعا نەگىزدەلگەنىنە باسا توقتالدى.
اۆتور: رۋسلان عابباسوۆ
