قازاقستاندىق باپكەر «اق بارس» شابۋىلشىسىمەن توبەلەسكەن رىسپايەۆتى باتىر دەپ اتادى

استانا. قازاقپارات - «بارىس» ح ك باس باپكەرى اندرەي نازاروۆ قازاقستاندىق كلۋب جاس قورعاۋشىسى دامير رىسپايەۆ پەن قازاننىڭ «اق بارسىنىڭ» فورۆاردى الەكساندر سۆيتوۆ اراسىنداعى توبەلەس جونىندە تۇسىنىك بەردى.

بۇل تۋرالى Tengrinews.kz حابارلايدى.

«19 جاستاعى جاڭا ويىنشىمىز تۋرالى ايتقىم كەلەدى. «بارىستىڭ» جارتىسى جاراقات الىپ، كوماندا سەگىز كۇن ىشىندە ءوزىنىڭ سىرت الاڭداعى ءتورتىنشى كەزدەسۋىن وتكىزگەن قيىن جاعدايدا ول شەبەر ءۇن قاتىپ، جەكپە- جەككە ءوڭ بەرۋگە تىرىستى. قازاقستاندا ايتىپ جاتقانداي، رىسپايەۆ - باتىر!» - دەدى «بارىس» ح ك تالىمگەرى.

«بارىس» ح ك قورعاۋشىسى كيەۆين داللمەننىڭ ايتۋىنشا، بۇل جاقسى توبەلەس بولدى. «ءبىز ماتچ الدىندا توبەلەس تۋرالى ەشتەڭە بىلمەدىك. حوككەي ماتچتارىندا ونداي بولىپ تۇرادى. جاقسى توبەلەس بولدى، ەكەۋى دە بەرىسپەدى»، - دەدى ول. ەسكە سالا كەتەيىك، «بارىس» ح ك جاس قورعاۋشىسى دامير رىسپايەۆ «اق بارس» شابۋىلشىسى الەكساندر سۆيتوۆپەن توبەلەسىپ قالعان ەدى. توبەلەس ماتچتىڭ 13- سەكۋندىندا بولدى. حوككەيشىلەر ءبىر- بىرىنە بىرنەشە سوققى بەردى، ەشكىم جەڭىلمەدى. قازىلار توبەلەستى توقتاتتى. ايتا كەتەيىك، «بارىس» ح ك بۇل كەزدەسۋدە 2:3 ەسەبىمەن جەڭىلىپ قالعان بولاتىن.