ەلباسى: وڭىردەگى تۇراقتىلىق پەن دامۋ قازاقستان مەن وزبەكستاننىڭ ۇستانىمدارىنا، ءوزارا جۇمىسىنا بايلانىستى
شاعىن قۇرامدا وتكەن كەزدەسۋدە ەكى مەملەكەتتىڭ باسشىلارى نۇرسۇلتان نازاربايەۆتىڭ 2013-جىلى ماۋسىمدا وزبەكستانعا بارعان ساپارىندا جاسالعان ۋاعدالاستىقتاردىڭ جۇزەگە اسىرىلۋ بارىسىن تالقىلادى.
سونداي-اق ساۋدا-ەكونوميكالىق، سۋ-ەنەرگەتيكالىق، كولىك جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ باسىمدىعى بار باعىتتارى قارالدى.
بۇعان قوسا، تاراپتار وڭىرلىك قاۋىپسىزدىكتىڭ نەگىزگى اسپەكتىلەرى مەن مەيلىنشە وزەكتى حالىقارالىق ماسەلەلەر تۋرالى ءسوز قوزعادى.
نۇرسۇلتان نازاربايەۆ قازاقستان مەن وزبەكستاننىڭ تاريحي جانە مادەني تۇرعىدان جاقىن ەلدەر ەكەنىنە توقتالىپ ءوتتى.
- كورشى بولعاندىقتان، ءبىز تاۋەلسىزدىك جاعدايىندا قارىم-قاتىناسىمىزدى دۇرىس قۇردىق. قازاقستان وزبەكستاندى ونىڭ بارلىق باستامالارىنا قاتىستى قولدايدى. ءبىز ەكى ەلدىڭ دوستىعىن نىعايتۋعا، ساۋدانى ۇلعايتۋعا، ءوزارا قارىم-قاتىناستاردى ىشكى جانە سىرتقى قاۋىپسىزدىك ماسەلەلەرى مەن وزگە دە باعىتتار بويىنشا دامىتۋعا نيەتتىمىز. ءبىزدىڭ ەلدەرىمىزدە قازىر وسى كەلىسسوزدەردى ءجىتى باقىلاپ وتىر، ويتكەنى بۇكىل وڭىردەگى تۇراقتىلىق پەن دامۋ قازاقستان مەن وزبەكستاننىڭ ۇستانىمدارىنا، ءوزارا جۇمىسىنا بايلانىستى، - دەدى مەملەكەت باسشىسى.
وزبەكستان پرەزيدەنتى ءوز كەزەگىندە بۇگىندە الەمدەگى جاعداي قارقىندى وزگەرىپ جاتقانىنا توقتالدى.
- مۇنداي جاعدايدا ءاربىر ەل وزىنە تايانىش ىزدەيدى، جوسپارلارىن ناقتىلايدى جانە تاياۋ كورشىلەرىنە ارقا سۇيەيدى. قازاقستان - ءبىز ءۇشىن ەڭ جاقىن ەل، اۋىر سىناقتار مەن قۋانىشتى كۇندەرى ىلعي دا بىزبەن بىرگە بولعان جاقىن حالىق. ءبىز ءاردايىم ءبىر-بىرىمىزگە كومەككە كەلدىك. وركەندەۋ جولىنا سەنىمدى قادام باسىپ بارا جاتقان قازاق حالقىنا زور قۇرمەتىمدى بىلدىرگىم كەلەدى. بىزگە «ساعاتىمىزدى تەڭەستىرىپ»، الداعى پەرسپەكتيۆالاردى انىقتاۋ ءۇشىن ءجيى كەزدەسىپ وتىرۋ قاجەت، - دەدى ي. كاريموۆ.
