قازاقستان مەن چەحياعا بىرلەسكەن كاسىپورىندار اشۋعا بولادى - ن. نازاربايەۆ

استانا. قازاقپارات - كەدەن وداعىنىڭ ۇلكەن الەۋەتىن ەسكەرە وتىرىپ، قازاقستان مەن چەحياعا بىرلەسكەن كاسىپورىندار اشۋ مۇمكىندىگىن قاراستىرۋعا بولادى.

بۇل تۋرالى بۇگىن قازاقستان- چەحيا بيزنەس-فورۋمىندا ق ر پرەزيدەنتى نۇرسۇلتان نازاربايەۆ ايتتى.

«بۇگىن ءبىز يندۋستريالاندىرۋدىڭ ەكىنشى بەسجىلدىعىن انىقتاۋ كەزىندە جالپى قۇنى 30 ميلليارد دوللاردى قۇرايتىن جوبالار جيىنتىعىن بەلگىلەدىك. ءبىرىنشى بەسجىلدىقتا بۇرىن قازاقستاندا بولماعان 700 كاسىپورىن سالدىق. 70 مىڭ جۇمىس ورنىن قۇردىق. ەكىنشى بەسجىلدىق تاپسىرماسى - 250 مىڭ جۇمىس ورنىن قۇرىپ، ەلىمىزدە بۇرىن بولماعان جاڭا كاسىپورىندار اشۋ. سوندىقتان بۇگىن چەح كومپانيالارىن ءبىزدىڭ باعدارلاماعا بەلسەنە قاتىسۋعا شاقىرۋ ءۇشىن ۇلكەن مۇمكىندىك تۋىپ وتىر. سىزدەردىڭ ەلدەرىڭىزدە ماشينا جاساۋ سالاسى جاقسى دامىپ جاتقانى بەلگىلى. وسىنداي دامۋ بىزگە دە قاجەت. وسى ورايدا كەدەن وداعىنىڭ ۇلكەن الەۋەتىن ەسكەرە وتىرىپ، بىرلەسكەن كاسىپورىندار اشۋ مۇمكىندىگىن قاراستىرۋعا بولادى. قازاقستاندا قىزمەت ەتەتىن چەح كومپانيالارى ەندى كەدەن وداعى شەڭبەرىندە رەسەي مەن بەلارۋس نارىعىنا ەركىن شىعا الاتىن بولادى»، - دەپ اتاپ ءوتتى مەملەكەت باسشىسى.

بيزنەس-فورۋمدا ق ر پرەزيدەنتى چەح كومپانيالارىنا ەلىمىزدىڭ ەكونوميكاسىنىڭ قانداي سالالارىنا ينۆەستيتسيا جاساۋعا بولاتىنىن ايتتى.

«ءبىزدىڭ مەملەكەتتەرىمىز بەن كاسىپكەرلەرىمىز بىرگە جۇمىس جاسايتىن قانداي سالالار بار دەگەن ماسەلەگە كەلەر بولساق، 2015-جىلدان باستاپ ءبىز ەلىمىزدىڭ يندۋستريالىق- يننوۆاتسيالىق دامۋ باعدارلاماسىنىڭ ەكىنشى بەسجىلدىعىن باستايمىز. وزدەرىڭىز بىلەسىزدەر، قازاقستان مينەرالدى رەسۋرستارعا باي. ءبىز مۇناي مەن گاز قورى بويىنشا الەمدەگى ون مەملەكەتتىڭ ىشىنە كىرەمىز. ۋراندى ءوندىرۋ جانە ساتۋ كورسەتكىشى بويىنشا الەمدە العاشقى ورىنداردامىز. مىس (جىلىنا 400 ميلليون توننا)، مىرىش، كۇمىس، التىن سياقتى باعالى مەتالداردى دا وتە ۇلكەن كولەمدە وندىرەمىز. بىزدە فوسفورلىق تىڭايتقىشتاردىڭ 6 ميلليارد توننالىق قورى بار. وسىلاردىڭ بارلىعى ءبىزدىڭ جەر قويناۋىمىزداعى بايلىقتار. بىزگە ولاردى ءالى دە يگەرۋ قاجەت»، - دەي كەلە ول كاسىپكەرلەر نازارىن قازاقستاننىڭ جاڭا ەكونوميكالىق ساياساتىنا اۋداردى.

«دەگەنمەن ءبىز وسىنداي بايلىققا يە بولىپ وتىرساق تا، جاڭا ەكونوميكا قۇرعىمىز كەلەدى. سوندىقتان مەنىڭ جارلىعىم بويىنشا ءبىز شيكىزاتتان تاپقان بارلىق تابىسىمىزدى ۇلتتىق دامۋ قورىنا جيناپ وتىردىق. قازىر وندا 100 ميلليارد ا ق ش دوللارىنان استام قاراجات بار. وسى قاراجات نەگىزىندە ءبىز جاڭا يندۋستريا قۇرىپ، قازاقستاننىڭ بولاشاقتاعى ينفراقۇرىلىمىن جاساعىمىز كەلەدى. مىنە، وسى جۇمىس بارىسىندا بارلىق ەكپىن وڭدەۋ ونەركاسىبىنە، مەتاللۋرگياعا، حيمياعا، مۇناي حيمياسىنا، ماشينا جاساۋعا، قۇرىلىس يندۋسترياسىنا جانە ازىق-تۇلىك ونەركاسىبىنە جاسالادى»، - دەدى مەملكەت باسشىسى.

 اۆتور: ءابۋ-اسقار مەكەش ۇلى