ۇكىمەت باسشىسى ەكونوميكانى دوللارسىزداندىرۋداعى باستى ماسەلەنى اتادى
«ورتالىق بانكتىڭ تەڭگە باعامى ساياساتىنا كەلسەك، ءبىز بۇل باعىتتا كونسۋلتاتسيالار جۇرگىزىپ كەلەمىز. جالپى، ۇكىمەت ۇلتتىق بانكتىڭ بۇگىنگى ۇستانىمىن، سونىڭ ىشىندە ورتاشا مەرزىمدىك كەزەڭدەگى ينفلياتسيالىق ستراتەگيالاۋعا اۋىسۋ جۇمىسىن قولدايدى. سونىمەن قاتار ۇلتتىق بانك ۇكىمەتتىڭ ەكونوميكانى دوللارسىزداندىرۋ جۇمىستارىن دا جالعاستىرۋى كەرەك»، - دەدى پرەمەر- مينيستر.
ۇكىمەت باسشىسىنىڭ پايىمىنشا، ەكونوميكانى دوللارسىزداندىرۋ ءۇشىن ءبىرقاتار ماسەلەلەر كەشەنىن شەشۋ كەرەك.
«مەنىڭ پايىمىمشا، بۇنداعى باستى ماسەلەلەردىڭ ءبىرى - ۇلتتىق بانكىلىك جۇيەنى ۇلتتىق ۆاليۋتادا، ياعني تەڭگەمەن قارجىلاندىرۋدى قامتاماسىز ەتۋ. ەگەر قورلاندىرۋ ۇلتتىق ۆاليۋتامىزدا جۇرەتىن بولسا، وندا كرەديتتەۋ دە ۇلتتىق ۆاليۋتادا جۇزەگە اسادى. ال ولاي بولسا، دوللار باعامىنىڭ قۇبىلۋى قانداي دا ءبىر ماسەلەنى شەشۋگە سونشالىقتى اسەر ەتپەس ەدى»، - دەدى ك. ءماسىموۆ.
اۆتور: قانات مامەتقازى ۇلى
