باتىر اتاعىن ەكى رەت العان باتىردىڭ ەرلىگىنە نەگە كۇمان كەلتىردى؟

استانا. قازاقپارات - تالعات بيگەلدينوۆتىڭ جەسىرى ۇشقىشقا كەڭەس وداعىنىڭ باتىرى اتاعىنىڭ ەكى رەت بەرىلۋىنىڭ ءادىل بولعانىنا كۇمان كەلتىرگەن قوعامدىق قورعاۋشى ەرمەك نارىمبايەۆقا جاۋاپ قايتاردى،

 - دەپ حابارلايدى Tengrinews.kz ءتىلشىسى.

 بانكتەن زارداپ شەككەندەردى قورعاۋشى ەرمەك نارىمبايەۆ ۇشقىشتىڭ قازاسىنان كەيىن Facebook-تەگى پاراقشاسىنا ورىنسىز پوست جازدى. «بىلاي قاراعاندا، باتىر سياقتى. شىن باتىر، سوعىس كەزىندەگى جاس شاعىندا باتىر بولدى. ال كەيىن شە؟ تاشەنوۆ سولتۇستىك قازاقستاندى رەسەيگە بەرۋگە قارسى بولىپ، توبەلەسكەندە نەمەسە قونايەۆ وڭتۇستىك قازاقستاندى وزبەكستانعا بەرۋگە قارسى بولىپ، توبەلەسكەندە (...) نەمەسە ونەركاسىپتەر تيىنعا ساتىلعان كەزدە داۋىس كوتەردى مە؟ قايتا قۇرۋ كەزىندە، ەگەمەندىك كەزىندە ول تۋرالى نەنى بىلەتىن ەدىك؟ ەشتەڭە. بەيبىت زاماندا ول قانداي ەرلىك جاسادى؟ بىلمەيمىن، ەستىمەدىم»، - دەپ جازدى ول. ونىڭ ءسوزى ينتەرنەت قولدانۋشىلارىنىڭ نارازىلىعىن تۋعىزدى.

جارىنىڭ قازاسىنان كەيىن ارەڭ ساۋىققان ورىندىبيكە بيگەلدينوۆا بولسا، مۇنداي مالىمدەمەنى ناعىز ارانداتۋشىلىق دەپ اتادى. ونىڭ پىكىرىنشە، مۇنىڭ ءبارى قاساقانا جاسالىپ وتىر. «ول نە قىلعان ادام ءوزى؟ بۇل - بارىپ تۇرعان ارانداتۋشىلىق. اقىل- ەسى دۇرىس ادام بۇلاي جازبايدى، ەشكىم بۇلاي جازبايدى»، - دەدى بيگەلدينوۆا. ول نارىمبايەۆتىڭ سوزىنە جۇرتشىلىقتىڭ نارازىلىق ءبىلدىرىپ جاتقانىنا قاراماستان، وعان ءمان بەرۋدىڭ قاجەتى جوق دەپ ەسەپتەيدى. «ونى تالقىلاۋدىڭ قيسىنىن كورىپ تۇرعان جوقپىن»، - دەدى ول.

 نارىمبايەۆتىڭ ءوزى كەيىن Tengrinews.kz تىلشىسىنە جازباسىن باسقاشا ءتۇسىندىردى. «ماسەلە ول تۋرالى ەمەس، كەۋدەسىنە وردەن تاققان ءبىزدىڭ بارلىق زيالىمىزعا قاتىستى شىعار. اڭگىمە تالعات بيگەلدينوۆتىڭ تاپ ءوزى جايىندا ەمەس. ۇشقىشتىڭ 1943-1945 - جىلدارداعى قاھارماندىعىن ەشكىم جوققا شىعارا المايدى، وعان ءبارىمىز دە ريزامىز. مەن سوعىستى تۇگەل باستان وتكەرگەن جانە وق جاراقاتىنان قازا بولعان جاۋىنگەردىڭ نەمەرەسى رەتىندە بۇل ەرلىكتى قاشاندا باعالايمىن جانە قۇرمەتتەيمىن»، - دەدى ول.

 ەسكە سالا كەتەيىك، كەڭەس وداعىنىڭ ەكى مارتە باتىرى، داڭقتى ۇشقىش تالعات بيگەلدينوۆ 10- قاراشا كۇنى ومىردەن ءوتتى. ونىڭ جانازاسى 12- قاراشادا وفيسەرلەر ۇيىندە شىعارىلدى. باتىردى تۋىستارى مەن جاقىندارى، ارىپتەستەرى مەن باسقا دا جۇرتشىلىق وكىلدەرى اقتىق ساپارعا شىعارىپ سالدى.

تالعات بيگەلدينوۆ 1922 - جىلى 5 - تامىزدا اقمولا وبلىسىندا دۇنيەگە كەلدى. ونىڭ بالالىق جانە جاستىق شاعى بىشكەكتە ءوتتى. بولاشاق ۇشقىش 16 جاسىندا ايروكلۋبقا وقۋعا تۇسەدى. كەيىن ساراتوۆتاعى، چكالوۆتاعى ۇشقىشتار مەكتەبىندە ءبىلىمىن جەتىلدىرىپ، بىلىكتىلىگىن شىڭدادى. 1943 - جىلدىڭ قاڭتارىندا كالينين مايدانىنا الىنادى، وعان 296-ديۆيزيانىڭ 800- شابۋىلداۋشى اۆياتسيالىق پولكىنىڭ ي ل-2 شابۋىلداعىش ۇشاعىنىڭ تىزگىنى بەرىلەدى.

1944 - جىلدىڭ قازان ايىندا زنامەنكا جانە كيروۆوگراد قالالارىن جاۋدان ازات ەتۋدە ەرلىك پەن اسكەري شەبەرلىك كورسەتكەنى ءۇشىن جانە جاۋدىڭ ءتورت ۇشاعىن اتىپ تۇسىرگەنى ءۇشىن اعا لەيتەنانت بيگەلدينوۆ كەڭەس وداعىنىڭ باتىرى اتاعى اتاندى. داڭقتى ۇشقىش بەرليندى ازات ەتۋ ءۇشىن بولعان ۇرىسقا دا قاتىستى. 1945 - جىلدىڭ 27 - ماۋسىمىندا وعان كەڭەس وداعىنىڭ باتىرى اتاعى ەكىنشى رەت بەرىلدى.

اتى اڭىزعا اينالعان تالعات بيگەلدينوۆ اۋەدە بارلىعى 305 اسكەري تاپسىرمانى ورىنداعان. 2012 - جىلى اۆياتسيا مارشالى الەكساندر ەفيموۆ ومىردەن وتكەننەن كەيىن ول كەڭەس وداعىنىڭ باتىرى اتاعىن ەكى مارتە العانداردىڭ اراسىندا ۇلى وتان سوعىسى كەزىندەگى ەرلىگى ءۇشىن «التىن جۇلدىزدى» يەلەنگەن كوزى ءتىرى جالعىز ادام بولعان ەدى.