تۇركى الەمىندە وتكەن ءدۇبىرلى دودادا باعىمىز جاندى - جانار دۇعالوۆا
بۇل تۋرالى كەشە ورتالىق كوممۋنيكاتسيالار قىزمەتىندە وتكەن بريفينگتە تاتارستاننىڭ قازان قالاسىندا وتكەن حالىقارالىق «Turkvizyon-2014» ءان بايقاۋىندا قازاقستان نامىسىن قورعاپ، باس جۇلدەنى ۇتىپ العان جانار دۇعالوۆا ايتتى.
«تۇركى الەمىندە وتكەن ءدۇبىرلى دودادا باعىمىز جاندى. قۋانىشپەن، جەڭىسپەن ورالدىق. ءانشى رەتىندە، ەلىمنىڭ پاتريوتى رەتىندە مەن ءۇشىن بۇدان اسقان باقىت جوق. سايىستا ەلىمىزدىڭ بەدەلى مەن ابىرويىن اسقاقتاتۋعا بارىمدى سالدىم. اتا- بابامنىڭ رۋحىنا ارناپ شىعارعان ءانىم جەڭىس اكەلدى»، - دەپ اتاپ ءوتتى ول.
ءانشىنىڭ ايتۋىنشا، قازاقستاننىڭ مۇنداي ءىرى كونكۋرستارعا قاتىسۋى - ەلىمىزدىڭ بەيبىت ءومىر ءسۇرۋىنىڭ ارقاسى.
بۇگىندە ءبىز بەيبىت ەلدە ءومىر ءسۇرىپ جاتىرمىز. ەلىمىزدى، ەلباسىمىزدى بۇكىل الەم بىلەدى. وسىنداي حالىقارالىق سايىستارعا بارىپ ونەر كورسەتۋىمىزدىڭ ءوزى ەلباسىمىزدىڭ سىندارلى ساياساتىنىڭ ارقاسىندا دەپ ويلايمىن. جانە دە بۇل جەڭىسكە تۇڭعىش پرەزيدەنت كۇنى قارساڭىندا قول جەتكەندىكتەن، مەن بۇل جەڭىسىمدى تۇڭعىش پرەزيدەنتىمىزگە، ەلباسىمىزعا ارنايمىن!» - دەدى ج. دۇعالوۆا.
ايتا كەتەيىك، فينالدا ءۇشىنشى بولىپ ونەر كورسەتكەن جانار دۇعالوۆا 225 ۇپاي جينادى. ول بايقاۋدا رينات زايىتوۆتىڭ سوزىنە جازىلعان ءتول تۋىندىسى «ءىزىن كورەم» ءانىن ورىندادى.
جانار جارتىلاي فينالدان سوڭ ءۇشىنشى ورىندا تۇرعان بولاتىن. ول اقتىق سايىستا ەكىنشى ورىنداعى تاتارستان انشىسىنەن 24 ۇپاي ارتىق جينادى.
فينالدا ءانشى قىز كوز جاسىنا ەرىك بەرىپ، قازاق ەلىنىڭ بايراعىن كوككە كوتەردى.
اۆتور: ءابۋ- اسقار مەكەش ۇلى 
