قازاقستان ءوز سۋپەركومپيۋتەرىن شىعاردى

استانا. قازاقپارات - عارىش تەحنيكاسى جانە تەحنولوگيا ينستيتۋتى مەن ق ر ۇلتتىق ينجەنەرلىك اكادەمياسى جۇمىس ىستەۋ مۇمكىندىگى 3,5 جانە 10,5 تەرافلوپسقا تەڭ ءوزىنىڭ ISTTHPC 2000 سۋپەركومپيۋتەرىن جاساپ شىعاردى جانە سىناقتان وتكىزدى، - دەپ حابارلايدى Tengrinews.kz «ۇلتتىق عىلىمي-تەحنيكالىق اقپاراتتار ورتالىعى» ا ق-نىڭ باسپا ءسوز قىزمەتىنە سىلتەمە جاساپ.

بۇل قۇرىلعى NVIDIA CUDA كومپانياسىنىڭ گرافيكالىق چيپتەر بازاسىندا جاسالعان. مامانداردان جاساقتالعان تەست كەزىندە ول كومپيۋتەر 2,74 تەرافلوپس دەڭگەيىندە جۇمىس ىستەي الاتىندىعىن كورسەتكەن. جۇمىس ىستەۋ بارىسىندا ول وزىنە قاجەتتى ءار ۆاتقا 1,71 گيگافلوپستى پايدالانعان. الداعى ۋاقىتتا سۋپەركومپيۋتەرلەردىڭ جەكەلەگەن تۇرىنەن باستاپ، كلاستەرلى جوعارى ءوندىرۋشى گيبريتتى وزىندىك تاجىريبەلى جۇيەسىن ۇيىمداستىرۋ جوسپارلانۋدا. ايتا كەتەيىك، قازاقستاندا بۇدان باسقا دا سۋپەركومپيۋتەرلەر بار. الايدا وزىمىزدە بار ءتورت قوندىرعى شەت ەلدەردە جاسالعان بولاتىن.

ماماندار مۇنداي سۋپەركومپيۋتەرلەردى مۇناي-گاز كەنورىندارىن مودەلدەۋگە قولدانۋعا بولاتىنىن ايتۋدا. «جوعارى ءوندىرىستى انىقتاۋ زاماناۋي عىلىمي-تەحنيكالىق پروگرەسستىڭ نەگىزگى بولىگى. ال ولاردى قولدانۋ بيولوگيا، حيميا، فيزيكا، گيدروديناميكا جانە باسقا دا عىلىمنىڭ جىلدام دامۋىنا بايلانىستى بولىپ وتىر. سۋپەركومپيۋتەرلەر كەز كەلگەن ەلدىڭ يننوۆاتسيالىق دامۋىنىڭ نەگىزى»، - دەدى سۋپەركومپيۋتەردى قۇراستىرعان توپتىڭ جەتەكشىسى داۋلەت احمەدوۆ.