ءا. جاقسىبەكوۆ ق ر پرەزيدەنتىنە ساۋلەت جانە قالا قۇرىلىسى سالاسىندا جۇرگىزىلىپ جاتقان جۇمىستار جونىندە باياندادى

استانا. قازاقپارات - ەلباسى نۇرسۇلتان نازاربايەۆ «استانا باس جوسپارى عىلىمي-زەرتتەۋ جوبالاۋ ينستيتۋتى» ج ش س-دا بولدى، دەپ حابارلادى اقوردانىڭ باسپا ءسوز قىزمەتىنەن.

مەملەكەت باسشىسى وندا استانانىڭ ءبىرقاتار ينفراقۇرىلىمدىق جوبالارىنىڭ جۇزەگە اسىرىلۋ بارىسىمەن تانىستى.

استانا اكىمى ءا. جاقسىبەكوۆ قازاقستان پرەزيدەنتىنە ساۋلەت جانە قالا قۇرىلىسى سالاسىندا جۇرگىزىلىپ جاتقان جۇمىستار جونىندە باياندادى.

اتاپ ايتقاندا، جۇردەك اۆتوبۋس تاسىمالىن ىسكە قوسۋعا مۇمكىندىك بەرەتىن «BRT. استانا قالاسىنىڭ جاڭا كولىك جۇيەسى» جوباسىن جۇزەگە اسىرۋ جۇمىستارى جۇرگىزىلۋدە.

سونداي-اق نۇرسۇلتان نازاربايەۆقا «ەكسپو-2017» حالىقارالىق كورمەسى نىساندارى مەن جاڭا تەمىرجول ۆوكزالىنا تارتىلاتىن جولداردى جوبالاۋ مەن سالۋ بارىسى تۋرالى دا ايتىلدى.

سونىمەن قاتار، مەملەكەت باسشىسىنا ەلوردانىڭ جىلۋ ماگيسترالىنىڭ 4- جانە 5- كەزەگىن جوبالاۋ مەن سالۋ، ەنەرگەتيكا كوزدەرى عيماراتتارىن سالۋ مەن قايتا جوندەۋ جۇمىستارى جونىندە اقپارات بەرىلدى.

قازاقستان پرەزيدەنتى ورىنبور كوشەسىندەگى، سالتانات قاقپاسى ماڭىنداعى دوڭگەلەك الاڭ مەن مىڭجىلدىق اللەياسىنداعى قۇرىلىستاردى، تۇرعىن ءۇي قۇرىلىستارىن جۇزەگە اسىرۋ جوسپارىن، سونداي-اق استانا قالاسىنداعى ەسكى جانە اپاتتىق جاعدايداعى ۇيلەردى ءسۇرۋ جونىندەگى پيلوتتىق جوبانىڭ جۇزەگە اسىرىلۋ بارىسىن قاراپ شىقتى.

سوڭىندا مەملەكەت باسشىسى ەلوردانى بۇدان ءارى دامىتۋ بارىسىندا قاپەرگە الىنۋى ءتيىس ءبىرقاتار ماڭىزدى جايتتاردى ەسكەرتتى.