الماتىداعى جارىلىس كۋاگەرى بولعان وقيعا تۋرالى شىن اقپاراتتى ايتىپ بەردى
«مۇعالىم قول گراناتاسىن قولىمىزعا بەرىپ، ءوزى بىردەڭە جازىپ وتىردى. ءبىراق، ول بۇل وقۋ گراناتاسى دەپ ايتتى. سوندىقتان، ءبىز ءبارىمىز اۋدارىپ- توڭكەرىپ قارادىق. ءبىر كەزدە ءبىر بالا كەلدى دە ساقيناسىن جۇلىپ الدى. ءبىرىنشى تارس ەتكەن دىبىس شىقتى. 3-4 سەكۋندتان كەيىن قاتتى جارىلىس بولدى. شامامىز كەلگەنىمىز قاشا جونەلدىك. كەيىن ەسىمنەن تانىپ قالىپپىن. كوزىمدى اشسام، دارىگەرلەر كومەك كورسەتىپ جاتىر»، - دەدى ول.
ونىڭ ايتۋىنشا، جارىلىس كەزىندە كلاستا 17 وقۋشى بولعان.
«كىشكەنە كەۋدەم اۋىرىپ تۇر. بىلاي دەنساۋلىعىم جامان ەمەس» ، - دەدى ايلينا.
«ب ا ق- تاعى جاڭالىقتاردان كورسەتكەندەي، مۇعالىم ەشقايدا قاشپاعان. ماستەر ەكەۋى دە سوندا بولدى. سوندىقتان، ەشكىمدى كىنالامايمىز»، - دەدى ونىڭ اناسى سۆەتلانا دجاكۋپايەۆا.
ەستەرىڭىزگە سالا كەتەيىك، 17- قاراشادا الماتىداعى كوللەدجدە قول گراناتاسىنىڭ جارىلۋى ورىن العان ەدى. وقىس وقيعا سالدارىنان 1 قىز قازا بولىپ، 12 بالا اۋرۋحاناعا ءتۇستى.
قالالىق دەنساۋلىق ساقتاۋ باسقارماسى باسشىسى جانات قاسىمجانوۆانىڭ ايتۋىنشا، ولاردىڭ 80 پايىزىنىڭ ەستۋ قابىلەتى ناشارلاپ كەتكەن.
«جارىلىس تولقىنى بالالاردىڭ ەستۋ قابىلەتىنە اسەر ەتكەن. ولاردىڭ 80 پايىزىندا ەستۋ قابىلەتىنىڭ ناشارلاعانىن بايقايمىز. قاتتى ءدۇمپۋدىڭ سالدارىنان قۇلاقتىڭ دابىل جارعاعىنا ءتۇرلى دارەجەدە زاقىم كەلگەن. بەلگىلى بولعانداي، بۇل بالالارعا كەيىن ەستۋ قابىلەتىن جاقسارتۋ ءۇشىن مەديتسينالىق كومەك تالاپ ەتىلەدى. ءبىز نەگىزى وسىلاي بولارىن شامالادىق»، - دەدى ج. قاسىمجانوۆا.
ونىڭ ايتۋىنشا، قازىر ناۋقاس بالالارمەن اۋديولوگتار، قۇلاق دارىگەرلەرى جۇمىس جاساپ جاتىر. بالالاردىڭ ەستۋ قابىلەتى قايتادان ورنىنا كەلەدى، دەيدى ماماندار.
قالالىق دەنساۋلىق ساقتاۋ باسقارماسى مامانى تىلەۋبەردى قۋاندىقوۆتىڭ ايتۋىنشا، قازىر جاعدايى اۋىر 5 ستۋدەنتتىڭ ۇشەۋى بولىمشەلەرگە اۋىستىرىلدى. ال قالعانىنىڭ جاعدايى وتە اۋىر.
«ولاردىڭ ءبىرى يساميددينوۆ يليار باسىنان جاراقاتتانعان. ميى زاقىمدانعان. مەتال جارىقشاقتارى باس سۇيەگىنە ەنگەن. ول قازىر ءبىزدى كورىپ ءتۇسىنىپ وتىر. ءبىراق، ميى ءىسىنۋى مۇمكىن.
سوندىقتان، ونى ءالى دە مەديكامەنتوزدى ۇيقىدا ۇستاپ وتىرمىز.
ەكىنشى پاسيەنت - يۋليا كارپاچيەۆانىڭ جاراسى دا وتە اۋىر. ونىڭ ىشكى ورگاندارى ديافراگما، كوكباۋىر، بۇيرەك، وكپە زاقىمدانعان. ول قازىر وكپەنىڭ جاساندى دەمالۋ اپپاراتىنا قوسىلعان. وزىدىگىنەن دەمالا المايدى. ەسىنە كەلدى، ءبارىن بىلەدى. جاراقاتتىڭ سالدارىنان وتە كوپ قان جوعالتقان. قاتتى شوشىنعان. ەمى قارقىندى تۇردە ءجۇرىپ جاتىر. جازىلىپ كەتەدى دەگەن ۇمىتتەمىز»، - دەدى تىلەۋبەردى قۋاندىقوۆ.
ماماندار، سونداي- اق، جارىلىستان شاپا شەككەن جانە ءبىر ستۋدەنت ماكسيم ياروشوۆيچتىڭ ءبىر كوزى كورمەي قالعانىن ايتتى.
«بالانىڭ ءبىر كوزىنىڭ كورۋ قابىلەتى ناشارلاپ كەتكەن. ونى كوز اۋرۋلارى ينستيتۋتىنىڭ ماماندارى قاراپ جاتىر. تىم بولماسا ءبىر كوزىنىڭ كورۋ قابىلەتىن ساقتاپ قالۋ ءۇشىن كۇرەسىپ جاتىرمىز»، - دەدى باسقارما باسشىسى جانات قاسىمجانوۆا.
ال، ماكسيمنىڭ اناسى راۋشانگۇل دارىگەرلەر مەن اكىمدىك وكىلدەرىنىڭ كورسەتكەن كومەگىنە ريزاشىلىق تانىتتى.
«وسى 4 كۇننەن بەرى بالامىزدىڭ باسى- قاسىندا جۇرگەن بارلىق قىزمەتكەرلەرگە ايتار العىسىم شەكسىز. ءبىز ەشكىمدى كىنالامايمىز. مۇعالىم دە، ماستەر دە ساباقتا بولعان. ەشكىم وقيعا بولعان جەردى تاستاپ قاشقان جوق. ماستەردىڭ وزىنە كەيىن كومەك كورسەتىلدى. ولار ادەيى ىستەگەن جوق. ەشكىم، بالالارعا زۇلىمدىق جاساعان جوق»، - دەدى راۋشانگۇل.
جارىلىس بولعان ءسان جانە ديزاين كوللەدجدىڭ العاشقى اسكەري دايىندىق ساباعىنىڭ مۇعالىمى قاماۋعا الىنعان بولاتىن.
قازىر اتالعان دەرەك بويىنشا قالالىق ءى ءى د تەرگەۋ باسقارماسى ق ر ق ك 251- بابى (قارۋ مەن جارىلعىش زاتتاردى زاڭسىز ساقتاۋ، الۋ، ساتۋ، الىپ ءجۇرۋ) جانە 101- بابى (ابايسىزدا ادام ولىمىنە اكەلۋ) بويىنشا قىلمىستىق ءىس قوزعالدى.
تەرگەۋ بارىسىندا وقيعانىڭ ناقتى سەبەپتەرىن انىقتايتىن ءبىرقاتار ساراپتاۋلار تاعايىندالدى.
سونداي- اق، ق ر ق ك 132-بابىنا سايكەس العاشقى اسكەري دايىندىق ساباعىنىڭ مۇعالىمى ۋاقىتشا قاماۋ يزولياتورىنا توعىتىلدى. 1967 - جىلى تۋىلعان ازامات قازىر پروتسەسسۋالدى تارتىپتە تۇسىنىكتەمە بەرۋدە.
تەرگەۋ بارىسىندا قارۋدىڭ وقۋ ورنىندا قالاي پايدا بولعانى مەن كىمگە تيەسىلى ەكەندىگى تەكسەرىلمەك.
اۆتور: گۇلميرا عوسمانالي
