13:11, 20 - قاراشا 2014 | GMT +6
قىتايدا اۋرۋحانانىڭ جەتى قىزمەتكەرىن پىشاقتاپ كەتتى
استانا. قازاقپارات - قىتايدىڭ سولتۇستىك-شىعىسىنداعى بەيدايحە قالاسىندا بەيتانىس ەر ادام اۋرۋحانانىڭ التى مەدبيكەسى مەن تاعى ءبىر قىزمەتكەرىن پىشاقتاپ كەتتى، دەپ حابارلايدى ەلدىڭ مەملەكەتتىك اقپارات اگەنتتىگى.
شينحۋا اگەنتتىگىنىڭ اقپاراتىنا سايكەس، اقحالاتتىلارعا شابۋىل جاساعان ادام قولعا ءتۇستى، ونى بۇل قادامعا نە يتەرمەلەگەنى انىقتالىپ جاتىر.
سوڭعى ۋاقىتتارى قىتايدا مەديتسينا قىزمەتكەرىنە شابۋىل جاساۋ جاعدايى جيىلەپ كەتتى. ادام ومىرىنە اراشا تۇسەتىن ابزال جاندار ءتۇرلى زورلىق-زومبىلىقتىڭ قۇربانىنا اينالۋدا.
قىتايدا مەديتسينا سالاسىندا ەڭبەك ەتەتىندەردىڭ جالاقىسى سىن كوتەرمەيدى. سوندىقتان ولار ناۋقاستارعا قىمبات تۇراتىن دارىلەردى ادەيى جازىپ، زاڭسىز جولمەن اقشا جاسايدى دەگەن سىنعا ءجيى ۇشىراپ جاتادى.
BNews.kz
