قورا ماڭىنداعى «كوك ەشكى» كىمدىكى؟

استانا .قازاقپارات - ميستيكالىق اڭگىمەلەردى جىبەرمەي وقيمىن. وقي ءجۇرىپ، نەبىر تىلسىم جايتتاردىڭ بارىنا سەنبەسكە ءلاج جوق. ەندىگى جەردە ءوزىمنىڭ بالا كەزدە باسىمنان كەشكەن جۇمباق وقيعانى بايانداۋدى ءجون كوردىم.

 التىنشى سىنىپتا وقيتىن كەزىم. 1983 - جىلدىڭ ماۋسىم ايى ەدى. سول ۋاقىتتارى ءبىزدىڭ باياناۋىل اۋدانى شامادان تىس جاۋىندى بولدى. جوسالىداعى (قازىرگى ج. ايماۋىتوۆ اۋىلى) ءبىزدىڭ ءۇي اۋىل شەتىندە- تىن. اپكەم زاۋرە ەكەۋىمىز ۇزاقتى كۇن ۇيدە وتىرىپ ءىشىمىز پىستى. كەشكىلىك مال كەلگەن ۋاقىتتى بارلىعىن قورالاپ، سيىردى ساۋىپ ۇيگە كىردىك. شەشەم اۋرۋحانادا جاتقان اكەمە كەتكەن بولاتىن.

ءسويتىپ، زاۋرە ەكەۋىمىز كارتا وينادىق.  قىزىعىنا ءتۇسىپ وتىرعاندا سىرتتا ەشكىنىڭ ماڭىراعانىن ەستىپ، ءبىر ءسات تىنا قالدىق. ءمان بەرمەي، ويىندىق قايتا جالعاستىرا بەرىپ ەدىك، ەشكى تاعى دا ماڭىرادى. قويلاردى قاماعاندا سىرتتا قالعان مال جوق، بۇل نە بولدى دەگەن ويمەن دالاعا شىقتىق. قورا شەتىندە ءبىر كوك ەشكى تۇر ەكەن. ويىمىزدا تۇك جوق، سىرتتا قالىپ قويعان ەكەن دەپ قاۋمالاپ قوراعا ايدادىق. ءبىراق وعان كونەتىن ەشكى جوق، كەرى قاشا بەردى. زاۋرە جىلدام ءارى جاقسى جۇگىرەتىن. ول ەشكىنى شارباقتى بۇرىشىنا قاراي ايداپ، كوز ىلەسپەس شاپشاڭدىقپەن ارقاسىنان شاپ بەرگەندە و توبا، سىزدەرگە وتىرىك، ماعان شىن ەشكى كوزدەپ عايىپ بولدى. ەلەس پە ەدى دەپ زاۋرە ەكەۋىمىز ءبىر- بىرىمىزگە قاراعان كۇيى مەلشيىپ تۇرىپ قالىپپىز. سول ساتتە ەشكىنىڭ ماڭىراعان داۋىسى ءۇي ىرگەسىنەن 300-400 مەتر جەردەگى ءدوڭ جاقتان شىقتى. زارەمىز ۇشقان ءبىز ۇيگە قاراي الدى- ارتىمىزعا قاراماي زىتىپ بەردىك.

شىنىن ايتقاندا قورىقتىق. ءتۇن ورتاسىندا شەشەم كەلگەنگە دەيىن كوز ىلمەدىك. شەشەمە ايتىپ، ەدىك ول كىسى كۇلدى دە قويا سالدى. سودان بەرى 31  جىل وتسە دە، الگى وقيعا ارا- تۇرا ەسكە تۇسەدى. ەشكىنى ۇستاپ الماق بولعان زاۋرە قازىر 45 جاستا، امان- ەسەن پاۆلوداردا تۇرىپ جاتىر. ءبىراق ەشكى تۋرالى ەكەۋىمىز اڭگىمە قوزعاساق، ونى ەلەس دەپ ايتا المايمىز. سەبەبى، ونىڭ داۋىسىن سول كەزدە ءبىز ۇيدە وتىرىپ ەستىدىك قوي. قىزىق.. .

اۆتور: اعنۇر شاۋەنتەگى، ەكىباستۇز قالاسى

«الاش ايناسى»