مەملەكەت باسشىسى پايدالانىلماعان سۋارمالى جەرلەردى اينالىمعا ەنگىزۋ ماسەلەلەرىنە ايرىقشا نازار اۋدارۋدى تاپسىردى
بۇل تۋرالى اقوردانىڭ باسپا ءسوز قىزمەتىنەن حابارلادى.
ي. ابىشيەۆ مەملەكەت باسشىسىنا سۋ شارۋاشىلىعىن دامىتۋدىڭ نەگىزگى ماسەلەلەرى مەن رەسپۋبليكانىڭ سۋ قورىن ءتيىمدى پايدالانۋ جانە قورعاۋ جۇمىستارى جونىندە باياندادى.
قازاقستان پرەزيدەنتى ەلىمىزدە سۋمەن قامتاماسىز ەتۋ ماسەلەسى اسا وزەكتى ەكەنىن اتاپ ءوتتى.
- ەلىمىزدە جالپى سۋ تاپشىلىعى ماسەلەسى بار. جاڭا بوگەتتەر قۇرىلىسىن سالۋ قاجەتتىلىگىن انىقتاپ، جەراستى سۋلارىن پايدالانۋ، جايىلىمداردى سۋلاندىرۋ جونىندە زەرتتەۋلەر جۇرگىزۋ كەرەك، - دەدى مەملەكەت باسشىسى.
نۇرسۇلتان نازاربايەۆ ەلىمىزدە سۋ شارۋاشىلىعىن دامىتۋ ءۇشىن ۇلكەن جۇمىستار اتقارىلىپ جاتقانىنا توقتالدى.
- ارال تەڭىزىنىڭ سولتۇستىك بولىگىن ساقتاۋ جونىندە اۋقىمدى شارالار قابىلدانۋدا. مەملەكەتتەن بولىنگەن قوماقتى قاراجاتتىڭ ارقاسىندا ارالدىڭ سولتۇستىك بولىگى ارال قالاسىنا جاقىندادى. وسىنىڭ ءبارى جەرگىلىكتى حالىقتىڭ تۇرمىسىن جاقسارتۋعا وڭ ىقپالىن تيگىزدى، بالىق اۋلاۋعا، جۇمىس ورىندارىن قۇرۋعا مۇمكىندىك بەردى. قىزىلوردا وبلىسىنىڭ سۋ رەسۋرستارىنا دەگەن زارۋلىگىن وتەۋ ءۇشىن كوكساراي سۋ قويماسى سالىندى. ول ءوڭىردى جىلداعى سۋ باسۋ قاۋپىنەن قۇتقاردى. ماقتاارال اۋدانىنداعى گيدرومەليوراتسيا جۇمىستارىنا دا ەداۋىر قاراجات جۇمسالدى، - دەدى قازاقستان پرەزيدەنتى.
كەزدەسۋ بارىسىندا مەملەكەت باسشىسى پايدالانىلماعان سۋارمالى جەرلەردى اينالىمعا ەنگىزۋ، كورشى ەلدەرمەن ترانسشەكارالىق وزەندەردى ءتيىمدى پايدالانۋ بويىنشا ءتيىمدى ءىس- قيمىل جاساۋ ماسەلەلەرىنە دە ايرىقشا نازار اۋداردى.
ي. ابىشيەۆ سۋمەن قامتاماسىز ەتۋ ماسەلەلەرىنىڭ بىرتىندەپ شەشىلۋىن اۋىل تۇرعىندارى وڭ باعالاپ وتىرعانىن ايتتى. ول سونداي- اق قازىرگى كەزدە سۋ رەسۋرستارىن باسقارۋ جونىندەگى مەملەكەتتىك باعدارلاماعا سايكەس، ەلدىڭ بارلىق سۋ كوزدەرىن تۇگەندەۋ ءجۇرىپ جاتقانىن اتاپ ءوتتى.
كەزدەسۋدىڭ قورىتىندىسى بويىنشا مەملەكەت باسشىسى ءبىرقاتار ناقتى تاپسىرمالار بەردى.
