ءبىلىم مينيسترلىگى ۋنيۆەرسيتەتتەرگە عىلىمي اتاق تاعايىنداۋ قۇقىعىن ۇسىنادى

استانا. قازاقپارات - قازاقستانداعى ۋنيۆەرسيتەتتەرگە عىلىمي اتاق تاعايىنداۋ قۇقىعى بەرىلەدى.

بۇل تۋرالى بۇگىن ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ ماسەلەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى بارىسىندا ءمالىم بولدى.

ءبىلىم جانە عىلىم ۆيسە- ءمينيسترى تاحير بالىقبايەۆتىڭ ايتۋىنشا، مەملەكەت باسشىسى ۋنيۆەرسيتەتتەردىڭ دەربەس قىزمەتىن جۇزەگە اسىرۋعا ساتىلاپ كوشۋ تۋرالى تاپسىرما جۇكتەگەن. سوندىقتان دا، زاڭ جوباسىمەن ءبىلىم بەرۋ ۇيىمدارىنىڭ ەرەكشە مارتەبەسى مازمۇنىن جەتىلدىرۋ كوزدەلەدى.

«اتاپ ايتقاندا، ەرەكشە مارتەبەگە يە جوعارى وقۋ ورىندارىندا باكالاۆريات، ماگيستراتۋرا مەن دوكتورانتۋرا باعدارلامالارىن ءوز بەتىنشە ازىرلەپ، جۇزەگە اسىرۋ، مەملەكەتتىك ستاندارتتارعا سايكەس، اعىمداعى، ارالىق جانە قورىتىندى اتتەستاتسيالاردىڭ ەرەجەلەرىن ءوز بەتىنشە ايقىنداۋ، باعدارى مەن اتاعى بويىنشا PhD دوكتورى اتاعىن ءوز بەتىنشە بەرۋ قۇقىعى قامتىلادى. بۇدان بولەك، ەرەكشە مارتەبەگە يە ۋنيۆەرسيتەتتەر پروفەسسورلىق- وقىتۋشىلار قۇرامىنىڭ  بىلىكتىلىك سيپاتتارىن ءوز بەتىنشە بەكىتۋ قۇقىعىنا يە بولادى، سوسىن ءبىلىم بەرۋدىڭ جۇكتەمەسى، فورماسى مەن وقىتۋشىلار جالاقىسىنىڭ مولشەرى نەگىزىندە ءبىلىم بەرۋ قىزمەتىن جۇزەگە اسىراتىن بولادى»، - دەدى ت. بالىقبايەۆ.  

 اۆتور:   قانات مامەتقازى ۇلى