دۋباي - بىرىككەن اراب امىرلىكتەرىندەگى ەڭ ۇلكەن ءارى ەڭ اسەم قالا - فوتو
وسىعان وراي، تۋريستەردىڭ سۇيىكتى دەمالىس ورتالىعىنا اينالعان بىرىككەن اراب امىرلىكتەرىندەگى دۋباي قالاسى شىن مانىسىندە قانداي قالا؟ ول وزىنە ساياحاتشىلاردى نەسىمەن باۋراپ الادى؟ بۇگىنگى بىرىككەن اراب امىرلىكتەرى تۋرالى وقىرماندارىمىزعا ازداپ ماعلۇماتتار بەرگەندى ءجون كوردىك.
دۋباي - بىرىككەن اراب امىرلىكتەرىندەگى ەڭ ۇلكەن قالا.
كوپتەگەن ساياحاتشىلار مۇندا دۋباي ساۋدا ورتالىقتارىن، دجۋمەيرا مەشىتىن، سايد پاتشاسىنىڭ سارايىن تاماشالاۋ ءۇشىن جانە قالانى ەكى بولىككە بولەتىن سۋ ارناسىندا «دوۋ» كەمەسىمەن ءجۇزۋ، «اربا» تاكسيىمەن قىدىرۋ، سونىمەن قاتار، پاب، بار، تۇنگى كلۋب، ديسكوتەكا سەكىلدى دۋبايدىڭ تۇنگى قىزىعىنا بولەنۋ ءۇشىن ات تەرلەتىپ كەلەدى.
ەندى بىرىككەن اراب امىرلىگى تۋرالى قىسقاشا توقتالىپ وتسەك:
رەسمي استاناسى - ابۋ- دابي قالاسى بولىپ تابىلادى. ال تۋريستىك جانە ساۋدالىق ورتالىعى - دۋباي شاھارى.
ساياسي احۋالى
1971-جىلى قۇرىلعان فەدەراتيۆتى مەملەكەت بىرىككەن اراب امىرلىكتەرى - جەتى تاۋەلسىز امىرلىكتەن تۇراتىن جاس ەل، ءار امىرلىك نەگىزگى قالاسىنىڭ اتىمەن اتالادى: ابۋ-دابي، دۋباي، شاردجا، ادجمان، ۋم-ال كۋۆەين، راس- ەل- حايما جانە فۋدجەيرا. ءار ءبىر امىرلىكتىڭ ءامىرشىسى - شەيح، ال جالپى مەملەكەتتىك باسقارۋ بيلىگى جوعارعى كەڭەسكە بەرىلگەن.
حالقى
حالىقتىڭ %80 ى باسقا ەلدەن كەلۋشىلەر بولىپ تابىلادى. 2000-جىلعى ساناق بويىنشا ەتنيكالىق ارابتار بارلىق تۇرعىننىڭ %48,1 (ونىڭ ىشىندە ب ا ءا ارابتارى - %12,2، بەدۋيندەر - %9,4، ەگيپەتتىك ارابتار - %6,2، ومان ارابتارى - %4,1، ساۋد ارابتارى -%4) ، وڭتۇستىك ازيادان كەلگەندەرى - %35,7، يراندىقتار - %5، فيلليپيندىكتەر - %3,4، ەۋروپالىقتار - %2,4، باسقالار - %5,4 بولىگىن قۇرادى.
ءدىنى
ب ا ءا- نىڭ ءدىنى - يسلام. دەگەنمەن، باسقا دىندەرگە دە رۇقسات بەرىلگەن.
ءتىلى
اراب ءتىلى، سونىمەن بىرگە اعىلشىن ءتىلى دە كەڭ تارالعان.
مەرەكەلەرى مەن دەمالىستارى
1- قاڭتار - جاڭا جىل، 11- اقپان - قۇربان ايت، 5- ءساۋىر - حيجرا بويىنشا جاڭا جىل، 14- ماۋسىم - مۇحاممەد پايعامباردىڭ تۋىلعان كۇنى، 25- قازان - لەلات ال - ميرادج، ميراج ءتۇنى، 27- قاراشا - راماداننىڭ باستالۋى (مولشەرمەن) 2-3- جەلتوقسان - ۇلتتىق كۇن. مەرزىمدەرى وزگەرمەلى ءدىني مەرەكەلەر دە بار.
ءدىني مەرەكەلەردىڭ مەرزىمى يسلامدا قابىلدانعان ايلىق كۇنتىزبە بويىنشا بەلگىلەنەدى. كۇندىك كۇنتىزبەگە قاراعاندا ايلىق كۇنتىزبەنىڭ جىلدىق اينالىمى 11 كۇنگە قىسقا بولىپ كەلەدى.
ءدىني مەرەكەلەر كەزىندە رەستوراندار جۇمىس ىستەمەيدى نەمەسە وندا تەمەكى شەگۋگە، سپيرتتىك يشىمدىكتەر ىشۋگە تىيىم سالىنادى. رامادان مەرەكەسىن الىپ قارايىق. بۇل ايدا دۇكەندەردىڭ جۇمىس ۋاقىتى قىسقارتىلىپ، قوعامدىق ورىنداردا ءىشىپ-جەۋگە، تەمەكى شەگۋگە بولمايدى. بۇل تالاپتار وتەل تەرريتوريالارىنا تاراتىلمايدى. بۇل شەكتەۋلەر ءار ەميراتتا وزگەشە بولىپ كەلەدى. بۇل ەلدە دەمالىس كۇنى جۇما كۇنى بولىپ بەلگىلەنگەن.
ۇلتتىق تاعامى
اراب اسحاناسىندا كەلەسى تاعامدار كەڭ ورىن العان: حومۋس - بۇرشاق پەن كۇنجىت ۇرىعىنان جاسالعان پاستا، تاببۋلە - ۇساقتالعان جۇمساق ەت، اق جەلكەن مەن مايدالانعان بيداي، گۋزي - جاڭعاق پەن كۇرىش قوسىلعان قوزى ەتى. حاريس - ارنايى دايىندالعان بيداي قوسىلىپ پىسىرىلگەن ەت.
اراب امىرلىكتەرى - تەڭىز ەلى، سوندىقتان مۇندا ەت تاعامدارىنان باسقا تەڭىز جانۋارلارىنان جاسالعان تاعامدار وتە كوپ. تاڭ شايان، اسشايان، ومار، تۋنا - بۇلار كۇرىش جانە ارنايى ءدام قوسارلارمەن بىرگە بەرىلەتىن تاعامدار.
اراب ەلىنىڭ ءداستۇرلى جەڭىل تاماعى - شاۋىرما، قالانىڭ ءار بۇرىشىندا ساتىلادى.
جەرگىلىكتى دەسەرتتەر وتە ءدامدى - ۋم الي، ەش اسايايا (بەتىنە كرەم جاعىلعان ءتاتتى ىرىمشىك ءبالىشى)، مەحالابيا - (قىزعىلت سۋ جانە پىستەلەر سەبىلگەن بوتقا).
كوفە تاعايىنداۋ - بۇل ەلدەگى ۇلكەن ونەر بولىپ ەسەپتەلەدى. ەڭ قادىرلىسى - اراۆيالىق، اشىق ءتۇستى. ول جارتىلاي قىزدىرىلعان داننەن جاسالادى. ەلدەگى كافەلەردىڭ كەز كەلگەنىنەن ونىڭ ءدامىن تاتۋعا بولادى.
ب ا ءا مۇسىلمان ەلى بولعاندىقتان، سپيرت ىشىمدىكتەرى مەيرامحانالار مەن سىراحانالاردا، قوناق ۇيلەردە عانا ساتىلادى. تەك شاردج امىرلىگىندە عانا الكوگولگە مۇلدە تىيىم سالىنعان.
دۋباي - ەڭ دەموكراتيالىق قالا بولىپ سانالادى. قوعامدىق ورىنداردا، كوشەدە، جاعاجايدا الكوگولدى پايدالانۋعا بولمايدى. ماس كەزىندە ترانسپورت جۇرگىزۋگە مۇلدەم تىيىم سالىنعان. بۇل ءۇشىن ۇلكەن ايىپپۇل سالىنادى، ءتىپتى قاماۋعا الۋى دا مۇمكىن.
قۇبىردان سۋ ءىشۋ زياندى ەمەس. شولمەكتەگى سۋدى دا پايدالانۋعا بولادى.
ب ا ءا كليماتى
ب ا ءا ناعىز قۇرعاق سۋبتروپيكالىق كليماتىمەن ەرەكشەلەنەدى (جىلىنا جاۋىن- شاشىن دارەجەسى - 13س م). جاز مەزگىلى وتە ىستىق بولادى (+48°س-گە دەيىن). جىلىنا 360 كۇن اسپان بۇلتسىز جانە شايداي اشىق تۇرادى. ب ا ءا- دە تۋريستىك ماۋسىم جازعى اپتاپ ازايعان كەزدە قىركۇيەك ايىنىڭ سوڭىندا باستالىپ، مامىر ايىنىڭ ءبىرىنشى جارتىسىنا دەيىن سوزىلادى.
ب ا ءا- دە جەلتوقسان مەن قاڭتار ەڭ سالقىن ايلار بولىپ ەسەپتەلەدى. بۇل كەزدەگى اۋا تەمپەراتۋراسى كۇندىز +28°س، تۇندە +18°س كورسەتەدى.
ب ا ءا- نىڭ شيپاجايلارى
ب ا ءا - الەم تۋريستەرى ەڭ تارتىمدى ەل. پارسى شىعاناعىنىڭ جىلى سۋلارى، قۇمدى جاعاجايلارى، شولەيتتى تابيعي كورىنىستەرى، جەلكەندى قۇرما، بانان جانە ليمون شوقتارىنىڭ ىلعالدى القاپتارى، قازىرگى كەزەڭگى ءومىر ءتارتىبى، حالىقتىڭ ۇلتتىق داستۇرگە دەگەن سەنىمى، ەۋروپالىق تاماشا سۋپەرماركەتتەرى مەن شىعىس بازارلارى - بۇنىڭ ءبارى ساياحاتشىلار ءۇشىن قيال الەمى.
ساياسي قۇرىلىمى
مەملەكەت باسشىسى - پرەزيدەنت. سونىمەن بىرگە ءار امىرلىكتىڭ وزىنە تاۋەلدى قىزمەتتەرى، جەكە ۇكىمەتى بار.
بانكتەرى
ب ا ءا - دەگى جانە جەرگىلىكتى شەتەل بانكتەرى قارجى قىزمەتتەرىنىڭ بارلىق تۇرلەرىن كورسەتەدى. بانكتەردىڭ جۇمىس ۋاقىتى: سەنبىدەن سارسەنبىگە دەيىن 8.00-13.00، بەيسەنبى كۇنى 8.00-12.00 دەيىن. كەيبىر بانكتەر ساعات 16.00-17.00 گە دەيىن اشىق بولادى. ايىرباستاۋ بولىمشەلەرى 8.00-13.00 جانە تۇستەن كەيىن 16.00-20.30 ارالىعىندا جۇمىس ىستەيدى. اقشا بىرلىگى - ديرحام.
اينالىمدا 5، 10، 20، 50، 100، 200، 500، 1000، 5000 ديرحامدىق اقشالار جۇرەدى. سونىمەن بىرگە 1 ديرحامدىق مەتالل تيىندارى دا بار، ونىڭ سىرتىندا قۇمان بەينەلەنگەن.
ب ا ءا - نىڭ ايىرباستاۋ پۇلى - فيلز دەپ اتالادى. ءبىر ديرحام 100 فيلزدى قۇرايدى. مۇنايلى اۋە بەينەلەنگەن 50 فيلز كەڭ قولدانىلادى. ۇساق اقشالار قۇنىنىڭ تومەندىگىنە بايلانىستى سيرەك قولدانىلادى. 25 فيلزدىك اقشادا - ەلىك، 5 فيلزدە - بالىق بەينەسى سۋرەتتەلگەن.
قوناق ۇيلەردىڭ كوپشىلىگىندە، ساۋدا ورتالىقتارىندا، ءىرى دۇكەندەردە American Express, Master Card, Visa, Dinners Club تولەم كارتالارى قابىلدانادى، ال بانكوماتتاردى كەز كەلگەن حالىق ءىرى قونىستانعان ورتالىقتاردان تابا الادى. شەتەل جانە ۇلتتىق پۇلدى ەنگىزۋگە جانە شىعارۋعا شەكتەۋلەر قويىلمايدى.
ەلەكتر جارىعى - 220 ۆ، 50 گ ت س.
ب ا ءا - نىڭ سالت- داستۇرلەرى
بىرىككەن اراب امىرلىكتەرىنىڭ سالت-داستۇرلەرى يسلام دىنىمەن ساباقتاس. سوندىقتان، بۇل ەلمەن ءتۇسىنىسىپ، كەلىسىمگە كەلۋ ءۇشىن جانە جاقسى دەم الۋ ءۇشىن وسى حالىقتىڭ ءداستۇرىن سىيلاۋىڭىز قاجەت.
يسلام شارتتارى، اسىرەسە، قاسيەتتى رامادان ايىندا قاتاڭ ساقتالىنادى.
ەگەر جول ءتۇسىپ، ءدام تارتىپ، دۋبايعا بارا قالساڭىز، وندا جوعارىداعى اتاپ وتكەن مالىمەتتەرگە ءمان بەرگەنىڭىز ءجون.
كۇنسۇلتان وتارباي
