بايان - ولگەي ايماعىنان ۇلتتىق جادىگەرلەرىمىز تابىلدى
فولكلورلىق ەكسپەديتسيا ءوز جۇمىسىن ەكى جىل بۇرىن باستاعان ەكەن. 2013-2014 - جىلدىڭ جاز ايلارىندا موڭعوليا جەرىندەگى قازاقتارمەن جۇزدەسىپ، بۇرىن- سوڭدى كەزدەسپەگەن حالىقتىق مۋزىكالاردى جازىپ الىپ قايتقان. ناتيجەسىندە «نازقوڭىر» CD ديسكىسى مەن «اقشوقى» نوتالىق كىتابى جارىق كورىپ وتىر. ۇلتتىق جادىگەرلەردىڭ تانىستىرىلىمىنا تۇركيا، موڭعوليا، قىرعىزستان، باشقۇرتستان ەلدەرىنەن ءداستۇرلى ورىنداۋشىلار كەلىپ، تۇركىتىلدەس حالىقتاردىڭ كونە اۋەن- سازدارىن ورىندادى. بۇل جوبانى بۇعان دەيىن قازىرگى مادەنيەت جانە سپورت ءمينيسترى ارىستانبەك مۇحامەدي ۇلى قولعا الىپتى.
«مۇنداعى ماقسات - قازاق دالاسىن ايتپاعاندا، شەت مەملەكەتتەردە ءالى دە حاتقا ءتۇسىرىلىپ، بىزگە جەتە قويماعان ۇلتتىق قۇندىلىقتارىمىزدى جيناستىرۋ. كەلەر ۇرپاققا اماناتتاپ قالدىرۋ. ەكى جىل ىشىندە بۇرىن- سوڭدى ءبىز ەستىمەگەن، ەستىسەك تە ءتۇپنۇسقالارى ساقتالماعان حالىق اندەرى مەن كۇيلەرىنىڭ جاڭا تۇرلەرى جازىلىپ الىندى. بىلتىرعى جىلدىڭ قورىتىندىسىندا حالىقارالىق كونفەرەنتسيا ءوتىپ، ادىستەمەلىك رەتىندە «ارناۋ» كۇي كىتابىن شىعاردىق. بيىل «اسىل مۇرا» تاقىرىبىندا حالىقارالىق دوڭگەلەك ۇستەل ۇيىمداستىرىپ، «اقشوقى» پارتيتۋرالار جيناعىن قۇراستىردىق» ، - دەيدى «ءداستۇرلى مۋزىكالىق ونەر» كافەدراسىنىڭ مەڭگەرۋشىسى، ءانشى رامازان ستامعازيەۆ. ەل اراسىندا ءالى دە قاعازعا تۇسپەگەن مۋزىكالىق مۇرالارىمىزدىڭ مول ەكەنىن ايتادى زەرتتەۋشىلەر. «بۇگىنگى زاماننىڭ ەڭ وزەكتى ماسەلەلەرىنىڭ ءبىرى - قازاقتىڭ ءداستۇرلى مادەنيەتىن قايتا جاڭعىرتىپ، حالىقارالىق دارەجەگە شىعارۋ. وسى تۇرعىدا قازاق مادەنيەتىنىڭ قايماعى بۇزىلماعان، اسپان استىنداعى مۋزەي ءتارىزدى بايان- ولگەي قازاقتارىنىڭ ۇلت ءۇشىن ءمانى وتە تەرەڭ. كەڭ- بايتاق دالانىڭ ءتول پەرزەنتى بولىپ تابىلاتىن، تۇركى دۇنيەسىنىڭ قارا شاڭىراعىندا ءومىر كەشىپ جاتقان موڭعوليانىڭ بايان- ولگەي ايماعىن مەكەندەيتىن قازاقتاردىڭ مۋزىكا مادەنيەتىندە ەرەكشە ورىن الاتىن رۋحاني بايلىقتارىنىڭ ءبىرى - ءان مەن كۇي. ەلىمىزدىڭ شىعىس وڭىرىندە قالىپتاسقان كۇيشىلىك- انشىلىك ءداستۇردىڭ ءبىر تارماعى بولىپ سانالاتىن بايان- ولگەي ايماعىنىڭ مۋزىكالىق مۇراسى اسا باي جانە وزىندىك ەرەكشە ۇنىمەن، ورىنداۋشىلىق مانەرىمەن ەرەكشەلەنەدى. وسى ءوڭىردىڭ مۋزىكالىق مۇراسى بولاشاقتا زەرتتەپ، زەردەلەۋدى ءالى دە قاجەت ەتەدى» ، - دەيدى كۇيشى، زەرتتەۋشى مۇرات ءابۋعازى.
ايتا كەتەيىك ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ فولكلورلىق كابينەتىنىڭ مەڭگەرۋشىسى، پروفەسسور قايىرعازى تولەننىڭ قاتىسۋىمەن جينالعان ماتەريالدار نەگىزىندە بىرنەشە جيناق جارىق كوردى. اتاپ ايتقاندا، 2008 - جىلى «ارمان» دەگەن اتپەن موڭعوليا مادەنيەتىنىڭ وزات قىزمەتكەرى، سازگەر، كۇيشى سەيىت جۇماحان ۇلىنىڭ 30 دان استام ءتول كۇيلەرى، 2009 -جىلى «تەلقوڭىر» پارتيتۋرالار جيناعى جانە 2010 - جىلى «تەلقوڭىر» اتتى 2 كۇيتاباعى تىڭدارمان قولىنا ءتيدى ( 40 دومبىرا جانە 30 سىبىزعى كۇيلەرى) .
«الاش ايناسى»
