وسكەمەندە قۇراستىرىلعان اۆتوكولىكتەر رەسەيدە ساتىلادى

استانا. قازاقپارات - وسكەمەندە شىعارىلاتىن اۆتوكولىكتەر رەسەيدىڭ ءسىبىر ايماعىندا ساتىلىپ، قىزمەت كورسەتۋ ورتالىقتارى جۇمىس ىستەيتىن بولادى.

قازىر بارناۋل قالاسىندا قازاقستاندىق كاسىپكەرلەرگە ارنالعان ساۋدا ءۇيىن سالۋعا جەر تەلىمى قاراستىرىلىپ جاتىر، دەپ حابارلايدى 1720.kz.

وسكەمەندە ەلىمىزدەگى ءىرى ينۆەستيتسيالىق جوبانىڭ ءبىرى جىلىنا 120 مىڭ كولىك شىعارۋعا قاۋقارلى زاۋىت قۇرىلىسى باستالدى. ەندىگى كەزەكتە قۇراستىرىلعان اۆتوكولىكتى ساتۋ نارىعىن ۇلعايتۋ جوسپارلانعان. بۇل ماقساتتا رەسەيدىڭ ءسىبىر ايماعىنداعى بىرنەشە قالادا ارنايى ساۋدا ورتالىقتارىن اشۋعا بايلانىستى كەلىسسوزدەر جۇرگىزىلدى.

- ءبىز بارناۋىلدان ءوزىمىزدىڭ ساۋدا ءۇيىمىزدى اشساق، وندا جامان بولمايدى. ەڭ نەگىزگىسى ءبىز ول جاقتان جەر الۋىمىز كەرەك. ولار بىزگە بارلىق ينفروقۇرىلىمىن تارتىپ بەرۋگە كومەك كورسەتۋلەرى كەرەك. ودان كەيىن ءبىز ونى سالامىز، - دەيدى شىعىس قازاقستان وبلىسىنىڭ اكىمى بەردىبەك ساپاربايەۆ.

رەسەيدىڭ التاي ولكەسى گۋبەرناتورى الەكساندر كارليننىڭ ايتۋىنشا، كەلەر جىلدان باستاپ ورتاق ەكونوميكالىق كەڭىستىكتىڭ قۇرىلۋى دا ونىڭ قۇرامىنداعى مەملەكەتتەرگە ساۋدا- ەكونوميكالىق بايلانىستى ارتتىرۋعا زور مۇمكىندىك بەرەدى.

- ءبىرىنشى قاڭتاردان باستاپ ءبىزدىڭ ەلدەر ورتاق ەكونوميكالىق كەڭىستىككە وتەدى. مەن بۇل كەلىسىم ءبىزدىڭ ەكونوميكالىق قارىم- قاتىناستى دامىتۋعا قوسىمشا مۇمكىندىكتەر بەرەرىنە سەنىمدىمىن. ءبىز بۇل بايلانىستى ارتتىرا بەرەمىز، - دەيدى ر ف التاي ولكەسى گۋبەرناتورى الەكساندر كارلين.

كورشى مەملەكەتتە اشىلاتىن ساۋدا ورتالىقتارىندا قازاقستاندا شىعارىلعان اۆتوكولىكتەر عانا ەمەس، باسقا دا ونىمدەرىمىز ساۋدالاناتىن بولادى.