قازاقستاندا ءدىني قاقتىعىستار تۋىنداتاتىن ەش نەگىز جوق - ا. كليۋشيەۆ

استانا. قازاقپارات - ەۋرازيالىق مەنتاليتەتتىڭ ارقاسىندا قازاقستاندا ءدىني قايشىلىقتار، قاقتىعىستار تۋىنداتاتىن ەشقانداي نەگىز جوق. مۇنداي پىكىردى استانادا «بۇگىنگى قازاقستاننىڭ ءدىني الۋاندىعى» تاقىرىبىنداعى جيىندا قازاقستاننىڭ ءدىني بىرلەستىكتەر قاۋىمداستىعىنىڭ ديرەكتورى الەكساندر كليۋشيەۆ ءبىلدىردى.

«قازىرگى تاڭدا قازاقستانداعى ەۋرازياشىلدىق مەنتاليتەتتىڭ تولەرانتتىلىعى ارقاسىندا ءدىني قاقتىعىستار ءۇشىن ەشقانداي دا سالماقتى العىشارتتار جوق ەكەندىگىن ايتۋىمىزعا بولادى. ارينە، يراكتاعى، سيرياداعى سوڭعى جاعدايلار بەلگىلى ءبىر قاۋىپتەردىڭ دە بار ەكەنىن ايعاقتايدى. دەگەنمەن، وسىنىڭ ءوزى ءبىزدىڭ قاۋىمداستىقتىڭ قىزمەتىندەگى جاۋاپكەرشىلىكتى ودان سايىن ارتتىرا تۇسىرمەك»، - دەدى ا. كليۋشيەۆ.

ونىڭ ايتۋىنشا، قازاقستاندا تولەرانتتىلىق رۋحىنداعى ءتۇرلى باعىتتاعى ديالوگتى دامىتۋدىڭ، ادامدار اراسىنداعى ىزگى ءوزارا قارىم قاتىناستى نىعايتۋدىڭ ماڭىزى زور.

«جالپى، بارلىق كونفەسسيالاردىڭ سىندارلى سۇحبات جاساپ تۇرۋى - قازاقستاندا عانا ەمەس، كەز كەلگەن الەم ەلدەرىندە تۇراقتىلىقتىڭ ساقتالۋى مەن بەيبىتشىلىكتى نىعايتۋعا اپارار ەڭ باستى جولداردىڭ ءبىرى»، - دەدى قاۋىمداستىق باسشىسى.

اۆتور: قانات مامەتقازى ۇلى