ەلباسىنىڭ ۇلت، ءتىل، تاۋەلسىزدىك تۋرالى سوزدەرىن بيلبوردقا جازىپ، كوشەلەرگە ورناتۋ كەرەك - ن. ءسادىر
ونىڭ ويىنشا، ەلىمىزدە كەن ورىندارى از ەمەس. ءبىراق ولاردىڭ قورى قانشا باي بولسا دا، ۋاقىت وتە كەلە سارقىلادى. سوندىقتان بۇل جاعدايدا وندىرىسكە بايلانىسقا شوعىرلانعان جۇرتتى جۇمىسپەن قامتۋ ماسەلەسى تۋىندايدى. وسى ورايدا ەلباسىنىڭ «جەزقازعان - بەينەۋ» جانە «ارقالىق - شۇباركول» تەمىرجولدارىن سالۋ تۋرالى شەشىم قابىلداپ جانە ونىڭ جۇزەگە اسىرىپ، تۇساۋىن كەسۋى، ءسويتىپ، سول ماڭداعى ەل- جۇرتتىڭ وركەندەۋىنە جاعداي تۋعىزۋى - قۋانتارلىق جاعداي.
سوڭعى كەزدە رەسەيدىڭ ۇلكەن لاۋازىمدى شەنەۋنىكتەرىنىڭ اۋزىنان شىعىپ قالىپ جۇرگەن «قازاقتا بۇرىن مەملەكەت بولماعان» سەكىلدى ساندىراعى ءبارىمىزدىڭ نامىسىمىزعا ءتيىپ جاتىر. ەندى وسى جالعان پىكىرگە پرەزيدەنتتىڭ ۇلىتاۋدا بەرگەن «ءبىزدىڭ ەلدىگىمىز، قازاق جۇرتىنىڭ ارعى ءتۇبى عۇنداردان باستالادى. عۇنداردان كەيىن كوك تۇرىكتەرگە جالعاسادى. ودان كەيىن التىن وردا ورنىعادى. ءسويتىپ، حاندىق داۋىرگە ۇلاسىپ، كەيىن بىرتىندەپ تاۋەلسىزدىككە كەلىپ تىرەلەدى. وسىنداي ۇلكەن تاريحىمىز بار. جاستارىمىز مۇنى ءبىلۋى كەرەك» دەگەن سوزىمەن جاۋاپ بەرۋگە بولادى.
«كەزىندەگى ورىستاندىرۋ ساياساتى تۋرالى وسى سۇحباتىندا ەلباسى ن. نازاربايەۆتىڭ بىلدىرگەن باتىل پىكىرلەرى كوڭىلدەن شىقتى: «ءبىز، جالپى، دىننەن دە، تىلدەن دە ايىرىلا جازداعان ەلمىز. كەڭەس وداعى كەزىندە تىكەلەي ورىستاندىرۋ ساياساتى جۇرگىزىلدى. قازاقتىڭ ءتىلى ءبىر شوعىر قازاقتاردىڭ ءتىلى بولىپ قالدى» .
بىزگە ورىس يمپەرياسىنىڭ تىزەسىن باتىپ كەتكەن كەز كوپ بولعان. سول ورىستىڭ ءتىلىن ۇيرەنەمىز دەپ قازاق ءتىلىنىڭ قولدانىسى ازايدى دەگەن ماسەلەگە تىرەلەدى عوي. ءوزىم مەملەكەت باسشىسىنىڭ بۇل سوزدەرىن بولاشاقتا ءبىزدىڭ تىلىمىزگە ەشكىمنىڭ تىزە باتىرماۋىنا جول بەرمەۋ كەرەك دەگەن تۇرعىدا قابىلدايمىن.
جالپى، وسى سۇحباتتا ايتقان كەيبىر پىكىرلەرىن، مىسالى: «ءتىلدى قولدانىپ، باتىل سويلەۋىمىز كەرەك. ءتىلدىڭ مايىن تامىزىپ سويلەپ، باسقا جۇرتقا ۇلگى كورسەتۋىمىز كەرەك» ، «قازاقستاننىڭ ەكونوميكالىق وداقتان شىعىپ كەتۋگە قۇقى بار. مەن ءبىر رەت ايتتىم، تاعى قايتالاپ ايتام، تاۋەلسىزدىككە نۇقسان كەلتىرەتىن بولسا، ونداي ۇيىمداردا قازاقستان ەشۋاقىتتا بولمايدى. ءبىزدىڭ ەڭ جوعارى باعالايتىن بايلىعىمىز - تاۋەلسىزدىك. اتا- بابامىزدىڭ قانىمەن، تەرىمەن كەلگەن تاۋەلسىزدىكتى ءبىز ەشكىمگە بەرە المايمىز. ونى قاسىق قانىمىز قالعانشا قورعاۋىمىز كەرەك. سوندىقتان، بۇل جونىنەن ەشقانداي كۇدىك بولماسىن» دەگەن سوزدەرىن بيلبوردقا جازىپ، كوشەلەرگە ءىلىپ قويۋ كەرەك.
كەيبىر باق، اسىرەسە، شەتەلدىك باسپا ءسوز ەلباسىنىڭ وسى سۇحباتتا ايتقان كەي سوزدەرىن وزدەرىنە ىڭعايلى قىلىپ، ورتاسىنان ويىپ الىپ جاتقانى جاعىمسىز اسەر قالدىردى. وسىنىڭ ءوزى ءبىزدىڭ ەگەمەن بولعانىمىزدى قالامايتىن كۇشتەر ءالى دە بار دەگەن وي تۇيۋگە يتەرمەلەيدى. نەسى بار، بۇنداي قاۋىپ بويىمىزدى جيناقى ۇستاۋعا، ازاماتتىق تۇعىرنامامىزدى ايقىن دا بەلسەندى بىلدىرۋگە باستايدى»، - دەدى ن. ءسادىر.
اۆتور: ەلجان ەرالى
