ەڭ باستىسى ساف دىنىمىزگە بەرىك بولساق
«اناۋ كىسىنىڭ بالاسى ساقالدىلاردىڭ قاتارىنا قوسىلىپ ءۇي قاراسىن كورمەي كەتىپتى»، «وتكەندە انا قاريانىڭ قىزىن كوردىم، ۇيىنەن بەزىپ، جامىلىپ، كوزىن دە تورمەن تۇمشالاپ الىپتى»، « باسقا اعىمعا قوسىلعان بالاسى اكەسىنە قۇران باعىشتاماي كومىپتى»، - دەپ العاشىندا ۇركە قارايتىن ءبىز پيعىلى جات توپتاردى كورگەندە ۇرەيلەنبەيتىن حالگە جەتتىك، كوز ۇيرەنىپ كەتتى، كوشەدەن توپ-توبىمەن جۇرگەندەرىن كۇندە كورىپ ءمىز باقپاي جاندارىنان وتە بەرەمىز.
سوڭعى كەزدە كەيبىرەۋلەردىڭ «ولار ءمايىتتى جەرلەگەندە ۇيىنەن ءيىس شىعارماق تۇگىلى جانازاسىن باعزى قازاقتاردىكىندەي ەمەس، مۇلدە وزگەشە شىعارادى ەكەن، تۇراتىن ۇيلەرىنىڭ تەرەزەسىن جاۋىپ، ۇيگە كۇن ساۋلەسىن تۇسىرمەيدى ەكەن» دەگەن اڭگىمەلەرىن ەستىپ، جاعامىزدى ۇستايمىز. قۇددى ءبىز سولاردىڭ اراسىندا ءومىر ءسۇرىپ وتىرعان حالىق سەكىلدىمىز. ءبىز ەمەس، ولار ءبىزدىڭ ارامىزدا ءجۇرىپ ءوزىنىڭ ءدىني باعىتىن ناسيحاتتاپ ءجۇر. ءيىسى قازاقتا تالاي عاسىر بويى بولىپ كورمەگەن سۇمدىققا تاۋەلسىزدىكتىڭ اۋاسىن جۇتىپ، ەركىندىكتىڭ تۇلپارىنا ەندى مىنە بەرگەندە كەزىككەنىمىزدى ايتساڭىزشى؟!
سوناۋ اتى شۋلى شىڭعىس حاننىڭ جويقىن شاپقىنشىلىعى تۇسىندا دا حالقىمىزعا ءدىني قىسىمشىلىق جاسالعان ەمەس، مادەنيەتىمىز بەن تىلىمىزگە قۇرىق ىلىنگەن جوق. بەرتىن كەلە اقتابان شۇبىرىندىدا دا ەلىمىز اۋزىنان اللانى ەش تاستاماي، «ەلىم- اي» - لاپ ءجۇرىپ امان ءوتتى.
ال بۇلار قايدان، قانداي ماقساتپەن كەلدى؟ ءبىزدى ىشىمىزدەن ءىرىتىپ، تۇبىتتەي تۇتكىلەرى كەلەتىندەي بىزدە نە جەتى اتاسىنىڭ قۇنى بار؟ قازاق دەگەن ەجەلدەن ەشكىمگە سوقتىقپاي، مالىن جايىپ، بەيبىت كوشىپ-قونىپ جۇرگەن، جەرىمىزگە كوزىن تىككەندەردىڭ تۋىن جىعىپ، دوس بولايىق دەگەننىڭ كەۋدەسىنەن يتەرمەي، وزەگىنەن تەپپەگەن حالىق ەدىك قوي؟! الدە تەك قارۋمەن عانا كۇشتى ەدىك پە؟ جوق، جوق! جەرىمىزدە ۇلى ارىستانباب، ياسساۋيدىڭ ارۋاعىنا قۇرمەت كورسەتىلىپ، اسەم كەسەنەلەر تۇرعىزىلعان ەمەس پە؟ وسىنداي عۇلامالاردىڭ وسيەتىن، ۋاعىزىن تىڭداپ، رۋحاني بايلىققا قانىققان حالقىمىزدىڭ جان دۇنيەسىن ءالسىز دەي المايمىز. جەتپىس جىل پاتشالى رەسەيدىڭ وتارى بولىپ، اتەيستىك ىلىممەن جۇردىك، ولار بارىنشا ءبىزدىڭ اتا ءدىن، ءتىل، سالتىمىزدى تۇنشىقتىرىپ، وتارلىق ەزگىنىڭ استىنا سالىپ، ۇلتتىعىمىزدى، بار قۇندىلىعىمىزدى جانىشتاپ باقتى.
ءبىراق ءاردايىم بار نارسەگە توزىممەن قاراي بىلەتىن قايسار ۇلتىمىز قاشىپ-پىسىپ ءجۇرىپ ءوز مۇراسىن ساقتاپ قالا ءبىلدى. ءدىن، ءتىل دەپ شارق ۇرعان ارىستارىمىز اتىلعانىمەن، ولاردىڭ ۇرپاقتارى، ۇلتجاندى ازاماتتارىمىز سوڭىنا دەيىن كۇرەسە ءبىلدى. پاتشانىڭ اسكەرىنەن تىعىلىپ ءجۇرىپ نامازىن تاستاماي، ورازاسىن تۇتقان تالاي اتا-اجەلەرىمىز بولعان. ەندى تاڭىمىز ارايلاپ اتىپ، كۇنىمىز كۇلىمدەپ باتار ساتكە كەلگەندە مىناداي قاسىرەتكە دۋشار بولامىز دەپ كىم ويلاعان؟ اتا سالتىمىزدا بولماعان نارسەلەرىن، بابامىزعا تاڭسىق دۇنيەنى بويىمىزعا دارىتۋعا نەگە سونشا اۋەستەندىڭ، قازاعىم؟ ! دۇنيەدەن وزعان اكە-شەشەسىنە قۇران باعىشاتامايتىن، تابىتتى جەرگە تىگىنەن سالىپ جەرلەيتىندى قاي قازاقتان كورىپ ەدىڭ؟ قازاق دەگەن ەرتەدەن قوناق كەلگەندە جالعىز اتىن مىنگىزىپ، جالعىز شاپانىن جاۋىپ جىبەرگەن حالىق.
ال قازىرگى ءوزىن شىن مۇسىلمانعا تەڭەپ، باسقانىڭ جەتەگىمەن جات اعىمنىڭ شارتىن ورىنداپ، جولىنان اداسىپ جۇرگەن قانداستارىمىز ۇيىنە قوناق كىرگىزبەي، تۋعان-تۋىسىمەن ارالاسپاي، اتا-اناسىمەن ءبىر داستارحاننان اس ىشپەي ءجۇر. مۇنىڭ قاي جەرى دۇرىس؟ كىمنىڭ امىرىمەن جۇرگەندەرى ءبىر اللاعا عانا ايان. يسلام ءدىنىنىڭ بۇرىس اعىمدارىنا اتا دىنگە باس ۇرامىن دەپ اداسىپ وت باسقان، ءوز باعىتىن تابا الماي قاتەلەسىپ قوسىلعاندار قانشاما؟ ال زاتى قازاق بولا تۇرا باسقا ءدىندى جاعالاپ، ونىڭ تۋرا جولدان تايىنعاندارىنا ىلەسكەن قانداستارىمىز ساف تازا دىنىنەن بەزىنىپ، نەگە وزگەنىڭ ءدىنىن ۇيرەنۋگە قۇمارتا قالدى ەكەن؟
ءدىني ساۋاتىمىز جوقتىڭ قاسى بولىپ ورىستانىپ بارا جاتقانىمىزدا ازاتتىقتىڭ كوك تۋى جەلبىرەدى. ەندى بار قۇندىلىعىمىزدى قايتا ورالتامىز، الەمگە «قازاق» اتىن پاش ەتەمىز دەپ بوركىمىزدى اسپانعا لاقتىرىپ، اتوي سالىپ جۇرگەن شاقتا تەزىرەك رۋحاني بايلىعىمىزدى تۇگەندەپ، بويىمىزعا ءسىڭىرۋىمىز كەرەك پە ەدى؟ وتكەندى دە كىنالاۋعا حاقىمىز جوق. سوندىقتان ەلىمىزدە قۇددى ءوز جەرىندە جۇرگەندەي تايراڭداپ، الشاڭ باسىپ جۇرگەن، قاي ۇلتقا، قاي دىنگە جاتاتىنى بەلگىسىز، بىرەۋدىڭ بۇيرىعىمەن كەلىپ، ءوز ميسسياسىن ورىنداپ، حالقىمىزعا ىرىتكى سالىپ جۇرگەندەرمەن بىرلەسە كۇرەسۋىمىز كەرەك. بىرەۋدىڭ ازعىرۋىنان قۇردىمعا كەتكەن ەل بولمايىن دەسەڭ بۇگىننەن باستاپ جاراتقانعا يمان كەلتىر، پايعامبارىمىزدىڭ (س. ع. س. ) ءومىرىن وقىپ، ايەلدەرىنىڭ (اللا ولارعا رازى بولسىن) ءىس-ارەكەتىنەن، يسلامنىڭ دامۋىنا قوسقان ۇلەسىنەن ۇلگى الىپ، بەس ۋاقىت نامازىڭدى قازا قىلماي، ايلاردىڭ ەڭ قاسيەتتىسى رامازاندا وتىز كۇن اۋزىڭدى بەكىت، زامانداس!
ءبارىمىز بىردەي ءوز دىنىمىزگە بەرىك بولساق قانا ارام نيەتتى كەلىمسەكتەر دە ءيت سياقتى يەسىنە ورالار. قانشا ەكونوميكالىق قۋاتتى بولساق تا، رۋحاني السىزدىك ءبىزدى ادۋىندى جاۋدىڭ وڭاي جەمتىگىنە اينالدىرادى.
وسىنى جادىڭدا ماڭگىگە ۇستاعايسىڭ، قۇرمەتتى ەگەمەن ەلدىڭ ازات ۇلانى - قازاق ازاماتى!
zhasqalam
