يران كاسىپكەرلەرى قازاقستاندا سۋ جانە جەل ەلەكتر ستانسالارىن سالۋعا دايىن
مارتەبەلى مەيماندارمەن كەزدەسۋ بارىسىندا اسقار يسابەك ۇلى يران شەجىرەلى تاريحى، كونە مادەنيەتى بار، بۇگىندە ەكونوميكاسى قارقىندى دامىپ كەلە جاتقان مەملەكەت ەكەندىگىنە نازار اۋداردى. قوس ەل باسشىلارىنىڭ ارقاسىندا قازاقستان مەن يران اراسىنداعى مادەني-ەكونوميكالىق بايلانىستار جىل ارتىپ بەكەمدەي تۇسكەندىگىنە توقتالىپ، وڭىرىمىزدە يراندىق كاسىپكەرلەردىڭ قاتىسۋىمەن جول سالۋ سالاسى مەن ساۋدا-ساتتىقتاعى جوبالار تابىستى ىسكە اسىپ جاتقاندىعىن ايتىپ ءوتتى.
قۇرىلىستارى ءجۇرىپ جاتقان «باتىس ەۋروپا - باتىس قىتاي»، وزبەكستان رەسپۋبليكاسىنىڭ شەكاراسى - شىمكەنت قالاسى حالىقارالىق كولىك دالىزدەرى ازيا مەن ەۋروپا اراسىنداعى ارىپتەستىك بايلانىستاردى ورناتۋعا سەپتىگىن تيگىزەتىنىن، وبلىس اكىمدىگى تاراپىنان ءوڭىردىڭ مۇمكىندىكتەرى تارازىلانىپ، شەتەل ينۆەستورلارىمەن بىرلەسە اتقارىلاتىن جوبالار ايقىندالعانىن مالىمدەدى. يران يسلام رەسپۋبليكاسىندا بالىق شارۋاشىلىعى جاقسى جولعا قويىلعاندىعىنا كوڭىل ءبولىپ، يراندىق كاسىپكەرلەردى وبلىسىمىزدا بالىق شارۋاشىلىعىن دامىتۋعا شاقىردى. قازىرگى تاڭدا وبلىس اكىمدىگى شەتەلدىك كاسىپكەرلەرمەن جالپى قۇنى 2 ميلليارد ا ق ش دوللارىن قۇرايتىن جوبالاردى ىسكە اسىرۋ بويىنشا كەلىسىمگە كەلگەندىگىن ايتىپ، يراندىق كاسىپكەرلەرمەن دە بىرلەسە جۇمىس اتقارۋعا دايىن ەكەندىگىن جەتكىزدى.
يران يسلام رەسپۋبليكاسىنىڭ ەلشىسى مودجتابا سابەري مىرزا ەكى ەل اراسىنداعى ىنتىماقتاستىق ارتىپ وتىرعانىن ايتىپ، قازاقستان مەن يراننىڭ مەملەكەت باسشىلارى قوس ەل اراسىنداعى ارىپتەستىك بايلانىستاردى نىعايتۋ مىندەتىن قويعاندىعىن اتاپ ءوتتى. وسى ورايدا وڭتۇستىك قازاقستان وبلىسى ازيا مەن ەۋروپا اراسىنداعى قاقپا ەكەندىگىن ايتا وتىرىپ، وڭىرىمىزگە جاساپ وتىرعان تۇڭعىش جۇمىس ساپارى ناتيجەلى بولاتىنىنا سەنىم ءبىلدىردى.
يراندىق كاسىپكەرلەر شاعىن سۋ جانە جەل ەلەكتر ستانسالارىن سالۋعا، تۋريستىك قىزمەتتەر ۇسىنۋعا دايىن ەكەندىكتەرىن ايتا وتىرىپ، بالىق شارۋاشىلىعى سالاسىنداعى جوبالاردى دا بىرلەسە اتقارۋعا ىقپال ەتەتىنىن مالىمدەدى. سونداي-اق، عىلىم مەن مادەنيەت سالاسىنداعى بايلانىستاردى دا نىعايتىپ، يرانننىڭ يسفاحان، حوراسان وڭىرلەرىندە وڭتۇستىك قازاقستان وبلىسىنىڭ مادەنيەت كۇندەرىن وتكىزۋگە، وعان ونەر يەلەرىمەن قاتار بيزنەس وكىلدەرىن دە قاتىسۋعا شاقىردى. كەزدەسۋ جيىنىن قورىتىندىلاعان وبلىس اكىمى مارتەبەلى مەيمانعا ءوز العىسىن بىلدىرە وتىرىپ، ايتىلعان ۇسىنىستار بويىنشا ناقتىلى جۇمىستار اتقارىلاتىنىنا سەنىم ءبىلدىردى.
