كارىم ءماسىموۆ وتاندىق ماشينا جاساۋشىلارعا ونىمگە سۇرانىستى تومەندەتىپ الماۋدى تاپسىردى
«بۇگىن فورۋم بارىسىندا ماشينا جاساۋ سالاسى بويىنشا تالقىلانىپ جاتقان ماسەلەلەر وتە ماڭىزدى. سوندىقتان دا، پرەزيدەنتتىڭ تاپسىرماسى بويىنشا ۇكىمەت، ءتيىستى مينيسترلىكتەر، كومپانيالار بۇل سالاعا ايتارلىقتاي ەلەۋلى نازار اۋدارىپ وتىر»، - دەپ توقتالدى ۇكىمەت باسشىسى.
ك. ءماسىموۆ بۇگىندە الەم ەنەرگيا رەسۋرستارىنا جانە بازالىق شيكىزاتتىق ونىمدەرگە تومەن باعا كەزەڭىنە كىرىپ وتىرعاندىعىن ايتا كەلە، «وسى ورايدا بيۋدجەتتەرى ەنەرگيا رەسۋرستارى جانە بازالىق شيكىزات ونىمدەرى باعاسىنا تاۋەلدى قازاقستان مەن وزگە دە ەلدەردە مۇمكىندىكتەر تومەن بولادى»، - دەدى.
بۇل تۇرعىدا پرەمەر- مينيستر ماشينا جاساۋ سالاسى ءارقاشاندا سۇرانىس كولەمىنە تاۋەلدى ەكەنىن اتاپ ءوتتى.
«مەنىڭ ويىمشا، ءبىزدىڭ ەلدەر كەيبىر ونىمدەرگە سۇرانىستىڭ تومەندەۋى تاۋەكەلىنە دايىن بولۋى كەرەك. سوندىقتان دا، ستراتەگيالاردى ازىرلەپ، كومپانيالاردىڭ ىشىندە رەزەرۆتەردى قاراستىرىپ، ونىمدىلىكتى ارتتىرۋ مەن قوسىمشا شىعىنداردى تومەندەتۋ تۇرعىسىندا جۇمىس ىستەۋ كەرەك»، - دەدى ك. ءماسىموۆ.
«بۇگىندە دامىعان ەكونوميكالاردا بىردە- ءبىر كومپانيا بارلىعىن 100 پايىز وزىندە وندىرۋگە قاۋقارسىز. بارلىق جوعارى تەحنولوگيالىق كومپانيالار قوسىلعان قۇنداردىڭ تىزبەگىنە تۇرادى جانە ولاردا الەم بويىنشا وزگە كومپانيالارمەن سەرىكتەستىك بار. ولار ەڭ ۇزدىك ءونىمدى ءدال وسى جولمەن وندىرەدى»، - دەدى ۇكىمەت باسشىسى.
ونىڭ پايىمىنشا، قازاقستانعا اتالعان باعىتتا سەرىكتەسۋ مۇمكىندىگىنە يە بولىپ، باسقا كومپانيالارمەن جۇمىس ىستەۋ ءۇشىن ەلىمىزدىڭ ەكونوميكاسى الەمدىك ەكونوميكانىڭ ءبىر بولىگى بولۋى قاجەت.
«وسىعان بايلانىستى بۇگىندە اياقتالىپ ، قابىلدانعان جانە 1 - قاڭتاردان باستاپ كۇشىنە ەنەتىن ەۋرازيالىق ەكونوميكالىق وداقتىڭ قۇرىلۋى العاشقى ۇلكەن جوبا بولىپ تابىلادى. بۇل ءبىر جاعىنان وسى ەلدەردىڭ ىشىندەگى كووپەراتسيا، ال ەكىنشى جاعىنان قازاقستاندىق كاسىپورىندار ءۇشىن ءونىمدى وتكىزۋدىڭ نارىعىن كەڭەيتۋ مۇمكىندىگى» ، - دەدى پرەمەر- مينيستر.
سونىمەن قاتار، ك. ءماسىموۆ كەشە بريۋسسەلدە مەملەكەت باسشىسى ەۋروپالىق كوميسسيا توراعاسىمەن قازاقستان مەن ەۋروپالىق وداقتىڭ اراسىنداعى كەڭەيتىلگەن سەرىكتەستىك تۋرالى كەلىسىم بويىنشا كەلىسسوزدەردى اياقتاعاندىعىن ەسكە سالىپ ءوتتى.
«ياعني، قازاقستان ءۇشىن ەۋرازيالىق ەكونوميكالىق وداقتان بولەك، ەۋروپالىق كومپانيالارمەن سەرىكتەسۋ مۇمكىندىگى بار»، - دەدى ۇكىمەت باسشىسى.
اۆتور: رۋسلان عابباسوۆ
