نۇرسۇلتان نازاربايەۆ سامميتتەرگە قاتىسۋ ءۇشىن مينسكىگە كەلدى

 مينسك- استانا. قازاقپارات - بۇگىن مينسكىدە ت م د مەملەكەت باسشىلارى كەڭەسىنىڭ، ەۋرازەق مەملەكەت ارالىق كەڭەسى جانە جوعارى ەۋرازيالىق ەكونوميكالىق كەڭەستىڭ وتىرىستارى وتەدى. قازاقستان پرەزيدەنتى نۇرسۇلتان نازاربايەۆ سامميتتەرگە قاتىسۋ ءۇشىن بەلارۋس ەلىنە كەلدى، دەپ حابارلايدى بەلتا.

ت م د مەملەكەت باسشىلارى كەڭەسى وتىرىسىنىڭ كۇن تارتىبىندە گۋمانيتارلىق، قاۋىپسىزدىكتى قامتاماسىز ەتۋ جانە وزگە دە سالالارداعى مەملەكەت ارالىق ىنتىماقتاستىقتى دامىتۋعا باعىتتالعان 17 قۇجات جوباسىن قاراۋ جوسپارلانىپ وتىر.

ەۋرازيالىق ەكونوميكالىق قوعامداستىقتىڭ (ەۋازەق) مەملەكەتارالىق كەڭەسى وتىرىسىندا ەۋرازەق جۇمىسىنىڭ قورىتىندىسى شىعارىلىپ، ونىڭ قىزمەتىن اياقتاۋ (2015 - جىلدىڭ 1 - قاڭتارىنان) تۋرالى شارتقا قول قويىلادى دەپ كۇتىلۋدە.

 جوعارى ەۋرازيالىق ەكونوميكالىق كەڭەس وتىرىسىندا 2015 - جىلعى 1 - قاڭتاردا ەۋرازيالىق ەكونوميكالىق وداقتىڭ ىسكە قوسىلۋىنا بايلانىستى قارجىلىق- ۇيىمداستىرۋشىلىق، تەحنيكالىق اسپەكتىلەر، سونداي- اق تاۋار جانە قىزمەت تۇرلەرىن ساۋدالاۋ، كاپيتال جانە جۇمىس كۇشىنىڭ كوشۋى سەكىلدى وزەكتى ماسەلەلەر تالقىلاناتىن بولادى.

بەلارۋس پەن قازاقستان اراسىندا بەلسەندى ەكىجاقتى ديالوگ جۇرگىزىلىپ كەلەدى. جوعارى دەڭگەيدەگى جۇمىس ساپارلارى ۇدايى ءوتىپ تۇرادى. قازاقستان پرەزيدەنتىنىڭ 2012 - جىلدىڭ مامىر ايىنداعى مينسك قالاسىنا جانە بەلارۋس پرەزيدەنتىنىڭ 2013 - جىلعى قازان ايىنداعى استاناعا جاساعان رەسمي ساپارلارى ەكى ەل اراسىنداعى قارىم- قاتىناستىڭ ستراتەگيالىق سيپاتىن كورسەتەدى. ەكىجاقتى ىنتىماقتاستىقتىڭ كەلىسىم- قۇقىقتىق بازاسى 80 نەن استام حالىقارالىق شارتتار مەن قۇجاتتى قۇرايدى.

بەلارۋس سىرتقى ساۋدا كولەمىندەگى ت م د ەلدەرى اراسىنداعى ۇلەسى بويىنشا قازاقستان رەسەي مەن ۋكراينادان كەيىنگى ءۇشىنشى ورىندا. 2013 - جىلى بەلارۋستىڭ قازاقستانمەن تاۋار جانە قىزمەت سىرتقى ساۋداسى $1 ميللياردتان  استى. ەكىجاقتى تاۋار اينالىم $ 950,5 ميلليون (2012 - جىلعى كورسەتكىشتىڭ 102,7%) قۇرادى. بەلارۋستىڭ قازاقستانعا جونەلتكەن ەكسپورتى $ 868,2 ميلليون (7,6% ءوستى) ، ال قازاقستاندىق يمپورت - $82,3 ميلليون (30,8% كەمىدى) قۇرادى.

 بەلارۋس ەكسپورتىنىڭ نەگىزىن كولىك قۇرالدارى، اۋىل شارۋاشىلىعى تەحنيكاسى، ءسۇت ونىمدەرى، دوڭعالاقتار، جيھاز، قانت، اعاشتان جاسالعان بۇيىمدار، ءىرى قارا ەتى، پلاستيكتەن جاسالعان بۇيىمدار، ۆاگوندار قۇرايدى. قازاقستاننان بولات پروكاتى، وڭدەلمەگەن اليۋمينيي، بيداي، مىس سىنىعى، ارالاسقان مينەرالدىق تىڭايتقىشتار، جۇك كولىكتەرى، كونۆەيەرلىك لەنتالار، ماقتا تالشىقتارى، فوسفورلى قىشقىلدار تۇزى، مويىنتىرەكتەر جەتكىزىلدى.

 سوڭعى جىلدارى قازاقستان اۋماعىندا بەلارۋس تەحنيكاسىن قۇراستىراتىن 13 ءوندىرىس ورنى ۇيىمداستىرىلدى.