سەناتورلار ارىپتەسى يران ءامىروۆتى ءبىر مينۋت ۇنسىزدىكپەن ەسكە الدى

استانا. قازاقپارات - بۇگىن پارلامەنت سەناتىنىڭ جالپى وتىرىسىندا پالاتا سپيكەرى قاسىم-جومارت توقايەۆ دەپۋتات يران ءامىروۆتىڭ مەزگىلسىز قايتىس بولعانىنا كوڭىل ايتىپ، ارىپتەستەرى سەناتوردى ءبىر مينۋت ۇنسىزدىكپەن ەسكە الدى.

«ارىپتەسىمىز سەنات دەپۋتاتى ءامىروۆ يران ءامىر ۇلى مەزگىلسىز قايتىس بولدى. يران ءامىر ۇلى كاسىبي زاڭگەر، سەناتور رەتىندە ءبىزدىڭ ۇجىمىمىزدا بەلسەندى، ءتيىمدى جۇمىس ىستەدى. سەناتتىڭ عانا ەمەس، جالپى پارلامەنتتىڭ قىزمەتىنە ەلەۋلى ۇلەس قوستى. ول مەملەكەتتىك قىزمەتكە ابدەن بەرىلگەن ەدى. يران ءامىر ۇلىنىڭ ەسىمى ءبىزدىڭ جادىمىزدا ماڭگى ساقتالادى»، - دەگەن سپيكەر قاسىم-جومارت توقايەۆ سەناتور ءامىروۆ يران ءامىر ۇلىن مينۋتتىق ۇنسىزدىكپەن ەسكە الۋدى ۇسىندى.

ەسكە سالا كەتەيىك، يران ءامىروۆ 1944-جىلى 15- قىركۇيەكتە  قىزىلوردا وبلىسى جالاعاش اۋدانىندا قاراكەتكەن ستانساسىندا تۋعان. ۇزاق جىلدار بويى ەلىمىزدىڭ سوت سالاسىندا قىزمەت ەتتى. 2004-جىلدان بەرى - ق ر پارلامەنتى سەناتىنىڭ دەپۋتاتى بولعان ەدى.

اۆتور: قانات مامەتقازى ۇلى