پارلامەنت ەۋرازيالىق ەكونوميكالىق وداق تۋرالى شارتتى راتيفيكاتسيالادى
ەۋرازيالىق ەكونوميكالىق وداق تۋرالى شارتقا قازاقستان، رەسەي جانە بەلارۋس ەلدەرىنىڭ پرەزيدەنتتەرى اعىمداعى جىلدىڭ 29 - مامىرىندا استانادا قول قويعان بولاتىن.
شارتقا سايكەس، قازاقستان، رەسەي مەن بەلارۋس مەملەكەتتەرىڭ ەۋرازيالىق ەكونوميكالىق وداقتى قۇرادى. زاڭ ەۋرازيالىق ەكونوميكالىق وداققا مۇشە مەملەكەتتەر حالقىنىڭ ءومىر ءسۇرۋ دەڭگەيىن ارتتىرۋ مۇددەسىندە مەملەكەتتەر ەكونوميكاسىنىڭ تۇراقتى دامۋى ءۇشىن جاعداي جاساۋعا باعىتتالادى. سونىمەن قاتار، زاڭ شەڭبەرىندە تاۋارلاردىڭ، كورسەتىلەتىن قىزمەتتەردىڭ، كاپيتال مەن جۇمىس كۇشىنىڭ ەركىن قوزعالىسىنا قاتىستى ءبىرىڭعاي ساياسات جۇرگىزۋ قامتاماسىز ەتىلەدى. بۇدان بولەك، شارتتا تاۋارلاردىڭ، كورسەتىلەتىن قىزمەتتەردىڭ، رەسۋرستاردىڭ ءبىرىڭعاي دامۋىن قالىپتاستىرۋعا ۇمتىلۋ كوزدەلىپ، جاھاندىق ەكونوميكا جاعدايىندا ۇلتتىق ەكونوميكالاردى جانداندىرۋ، ولاردىڭ باسەكەگە قابىلەتتىلىگىن ارتتىرۋ قاراستىرىلادى. بۇل رەتتە ەاەو حالىقارالىق قۇقىق سۋبەكتىلەرىنە يە، وڭىرلىك ەكونوميكالىق ينتەگراتسيانىڭ حالىقارالىق ۇيىمى بولىپ تابىلادى.
شارتتى راتيفيكاتسيالاۋ ەكونوميكالىق ىقپالداستىقتى ودان ءارى تەرەڭدەتۋگە جانە ەۋرازيالىق ەكونوميكالىق وداققا مۇشە مەملەكەتتەردىڭ ىنتىماقتاستىعىنا سەپتىگىن تيگىزەدى. وتكىزۋ نارىعىن كەڭەيتۋ مەن ينۆەستيتسيالىق تارتىمدىلىقتى ارتتىرۋ نەگىزىندە قازاقستانعا قايتا وڭدەۋ وندىرىستەرىن دامىتۋعا، گازتاسىمالى، تەمىرجول، اۆتوموبيل ينفراقۇرىلىمىنا قولجەتىمدىلىكتى قامتاماسىز ەتۋگە، ەۋرازيالىق ەكونوميكالىق وداققا مۇشە مەملەكەتتەر نارىعىنا وتاندىق تاۋارلاردىڭ شىعۋىنا كەدەرگىلەردى جويۋعا مۇمكىندىك بەرەدى. سونىمەن قاتار، ەكسپورتتاۋشىلاردىڭ ارىپتەس ەلدەردىڭ كولىك ينفراقۇرىلىمىنا قول جەتكىزۋ ءۇشىن قولايلى جاعداي جاسالاتىن بولادى. مۇنىڭ ءوزى كولىكتىك شىعىنداردى ازايتۋعا جانە ءۇشىنشى ەلدەر نارىعىندا قازاقستاندىق ءونىمنىڭ باسەكەگە قابىلەتتىلىگىن ارتتىرۋعا مۇمكىندىك بەرەدى.
شارتقا سايكەس، ە ا ە و ءوز قىزمەتىندە تاراپتاردىڭ ەگەمەندىگى مەن ولاردىڭ اۋماقتىڭ تۇتاستىعى قاعيداتتارىن قوسا العاندا، حالىقارالىق قۇقىقتىڭ جالپىعا بىردەي تانىلعان قاعيداتتارىن قۇرمەتتەۋ، مۇشە ەلدەردىڭ ساياسي قۇرىلىمىنىڭ ەرەكشەلىكتەرىن قۇرمەتتەۋ، تاراپتاردىڭ ءوزارا ءتيىمدى ىنتىماقتاستىعىن، تەڭ قۇقىلىعىن جانە ۇلتتىق مۇددەلەرىنىڭ ەسكەرىلۋىن قامتاماسىز ەتۋ، نارىقتىق ەكونوميكا جانە ادال باسەكەلەستىك قاعيداتتارىن ساقتاۋ نەگىزىندە جۇزەگە اسىراتىن بولادى.
«شارتتىڭ ءمانى تەك قانا ەكونوميكالىق ىنتىماقتاستىق ماسەلەلەرى بولىپ تابىلادى. ەگەمەندىك، تەڭدىك، تەڭ قۇقىلىق جانە مەملەكەتتىڭ ۇلتتىق مۇددەلەرىن ەسكەرۋ پرينتسيپتەرى قامتاماسىز ەتىلدى. شارتتىڭ بارلىق دەڭگەيدەگى ماڭىزدى ستراتەگيالىق شەشىمدەرى قابىلدانعان كەزدە كونسەنسۋستىڭ ناقتى تەتىگى قامتىلاتىن بولادى. بۇل ءبىر مەملەكەتتىڭ باسىمدىقتا بولاتىن مۇمكىندىكتەرىنە جول بەرمەيدى» ، - دەيدى زاڭ جونىندە بايانداعان ۇلتتىق ەكونوميكا ءمينيسترى ەربولات دوسايەۆ.
ال پارلامەنت سەناتىنىڭ ءتوراعاسى زاڭدى ەۋرازيالىق ينتەگراتسيانى ىلگەرىلەتۋ جونىندەگى ەلباسى ن. نازاربايەۆتىڭ كەمەڭگەر باستاماسىن ءىس جۇزىندە دالەلدەگەن تاريحي قۇجات رەتىندە اتاپ ءوتتى. «ەۋرازيالىق ەكونوميكالىق وداق - بۇل تەرەڭ ەكونوميكالىق ىنتىماقتاستىقتى كوزدەيتىن اسا ۇلكەن جوبا. وداق شەڭبەرىندە ورتاق نارىق قۇرىلىپ، ينۆەستيتسيالار تارتۋدا جاڭا ءوندىرىس ورىندارىن اشۋدا، ەڭ باستىسى حالىقتىڭ ءال اۋقاتىن ارتتىرۋدا تىڭ مۇمكىندىكتەر تۋىندايتىنىنا سەنىم مول» ، - دەدى سپيكەر ق. توقايەۆ.
پارلامەنت قابىلداعان زاڭ مەملەكەت باسشىسىنىڭ قول قويۋىنا جولدانادى.
اۆتور: قانات مامەتقازى ۇلى
