قازاق ونەرىنىڭ ساڭىلاقتارى: الىبەك دىنىشيەۆ

استانا. قازاقپارات - الىبەك مۇسا ۇلى دىنىشيەۆ -  ءانشى (تەنور) . قازاقستاننىڭ جانە س س ر و- نىڭ حالىق ءارتيسى. كوپتەگەن حالىقارالىق فەستيۆالدەر مەن سايىستاردىڭ لاۋرەاتى.

 1951 - جىلدىڭ 7 - شىلدەسىندە الماتىدا تۋدى. اناسى كاميلا -  ك س ر و حالىق ءارتىسى ريشات پەن قاز ك س ر حالىق ءارتىسى ءمۇسىلىم ابدۋلليندەردىڭ تۋعان قارىنداسى. اكەسى مۇسا بوكەنباي ۇلى دىنىشيەۆتىڭ اتا تەگى باتىس قازاقستان وبلىسىنىڭ كازتالوۆكا وڭىرىنەن. ول ءبىلىمدى جۋرناليست بولاتىن، قىزمەتىن «لەنينشىل جاس» گازەتىندە باستاعاندى. مۇساكەڭ «مادەنيەت» جۋرنالىنىڭ نەگىزىن قالاپ، ۇزاق جىلدار جۋرنالدىڭ باس رەداكتورلىعىن اتقارىپ، رەسپۋبليكامىزدا مادەنيەت سالالارىنىڭ دامۋ جولىن، دارىندى ادامداردىڭ ەڭبەكتەرىمەن قازاق قاۋىمىن كەڭىنەن تانىستىرا ءتۇستى. جۋرنال وقىرماندارىنىڭ تارتىمدى، قالاۋلى باسپا سوزىنە اينالدى. ول ءبوينيدىڭ «وۆود» رومانىن قازاقشاعا اۋداردى، ءبىراز مەزگىل قاز ك س ر- ءنىڭ مادەنيەت ءمينيسترىنىڭ ورىنباسارى قىزمەتىن اتقاردى.

 اتا- اناسى الىبەكتى امىرە قاشاۋبايەۆ اتىنداعى مۋزىكالىق مەكتەپكە وقۋعا بەردى. ول مەكتەپ ءۇيى بۇگىنگى الىبەك دىنىشيەۆتىڭ تەاترى ورنالاسقان ءبىر قاباتتى عيمارات.   وسىندا ول اككاردەون اسپابىندا ويناۋدى يگەرۋگە كىرىستى. سونىمەن قاتار ءوزى وقيتىن (جالپى ءبىلىم بەرەتىن) №33 مەكتەپتىڭ كوركەم ۇيىرمەسىندە ءان ايتۋعا ماشىقتاندى، ال جارىستاردا ءبىرىنشى ورىنداردى جەڭىپ الىپ ءجۇردى. ول 8-سىنىپتى اياقتاعاسىن مۋزىكالىق مەكتەپتەن پ. ي. چايكوۆسكي اتىنداعى مۋزىكالىق ۋچيليشەگە ءتۇستى.

 1970 - جىلى ونى بىتىرگەسىن ريشات ءابدۋلليننىڭ كەڭەسى بويىشا قۇرمانعازى اتىنداعى قۇ كونسەرۆاتوريانىڭ ۆوكال فاكۋلتەتىنە قابىلداندى. ەندى ناعىز كاسىبي انشىلىككە دايىندالۋ باستالدى. ونىڭ مۇنداعى ۇستازى -  ن. ا. ءشارىپوۆا.  1976 - جىلى الىبەك دىنىشيەۆ كونسەرۆاتورياداعى وقۋىن ءتامامداعاسىن جامبىل اتىنداعى قازاق فيلارمونياسىندا انشىلىككە كىرىستى. ول 1977 - جىلى برازيليانىڭ استاناسى ريو- دە- جانەيرو قالاسىندا وتكەن ۆوكوليستەردىڭ حالىقارالىق كونكۋرسىنا قاتىستى.

 1978 - جىلدان - اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ ءسوليسى.  1978 - جىلى وعان قازك س ر- نىڭ ەڭبەك سىڭىرگەن ءارتىسى اتاعى، ال كەلەسى جىلى بۇكىل وداقتىق لەنين كومسومولى سىيلىعى تاپسىرىلدى. الىبەك دىنىشيەۆ كەڭەس وداعىنىڭ كوپتەگەن ايماقتارىمەن قاتار چەحوسلوۆاكيا، الجير، پەرۋ، كۋبا، پورتۋگاليا، فينليانديا، شۆەتسيا، موروككو، يراك، بولگاريا جانە تاعى دا بىرنەشە ەلدەردە كونتسەرتتىك ساپارمەن بولىپ قايتتى.   1997 - جىلى ءا. دىنىشيەۆ "الىبەك دىنىشيەۆتىڭ ۆوكال اكادەمياسىن" قۇردى.  

 دىنىشيەۆتىڭ ورىنداۋ ونەرى نازىكتىلىگىمەن، داۋسىنىڭ سۇلۋلىعىمەن، ايرىقشا ليريزممەن ەرەكشەلەنەدى. ونىڭ رەپەرتۋارىندا لەنسكيدىڭ (پ. ي. چايكوۆسكيدىڭ "ەۆگەني ونەگينى") ۆلاديميردىڭ (ا. پ. ءبوروديننىڭ "كنياز يگورى") ، ايداردىڭ (ا. جۇبانوۆ جانە ل. حاميديدىڭ "ابايى") اريالارى، قازاقتىڭ حالىق اندەرى، قازاق كومپوزيتورلارىنىڭ شىعارمالارى، اندەرى مەن رومانستارى، شەتەل كومپوزيتورلارىنىڭ شىعارمالارى بار.