ەلىمىزدە قايىرىمدى ادامدار سانى ارتىپ كەلەدى
ەلىمىزدە داستۇرگە اينالعان «التىن جۇرەك» سىيلىعىمەن ماراپاتتاۋ، مىنە، وسىمەن سەگىزىنشى جىل ۇيىمداستىرعالى تۇر. بۇل سىيلىقتىڭ باستى ماقساتى - قازاقستاندا قايىرىمدىلىقپەن اينالىساتىن ازاماتتاردىڭ بار ەكەندىگىن كورسەتۋ.
بۇگىندە قايىرىمدىلىق ىستەردى ماراپاتتاۋمەن اينالىساتىن «التىن جۇرەك» سىيلىعى ەلىمىزدە العاشقى جانە ازىرشە جالعىز جۇلدە ەكەنى ءمالىم.
«باۋىرجان» قوعامدىق قورىنىڭ ۇيىمداستىرۋشىلارى جىل بويى «قازىرگىنىڭ باتىرلارىن» ىزدەۋمەن اينالىسادى.
بۇل جىلى اتالعان جۇلدەگە ءجۇز شاقتى قاتىسۋشى تىركەلۋگە ىنتالاندى. قازاننىڭ 3- كۇنى ولاردىڭ ىشىنەن ءاربىر نوميناتسياعا 3 ۇمىتكەردەن ىرىكتەلدى.
پرەسس-كونفەرەنسيادا جۇلدىز وماربەكوۆا («التىن جۇرەك» سىيلىعىنىڭ نەگىزدەۋشىسى)، ەلميرا جومارتوۆا («التىن جۇرەك» ۇيىمداستىرۋ القاسىنىڭ ءتورايىمى)، گۇلزيرا امانتۇرلينا («ەلداني» قايىرىمدىلىق قورىنىڭ باستىعى، «التىن جۇرەك - 2014» ساراپشىلىق كەڭەسىنىڭ مۇشەسى)، تۇياق ەسحوجينا («نۇر» قايىرىمدىلىق وتباسىلىق بالالار ءۇيىنىڭ ديرەكتورى)، ەركىن راقىشيەۆ (رەجيسسەر، «التىن جۇرەك» قوعامدىق كەڭەسىنىڭ مۇشەسى)، بۇل سىيلىقتىڭ مەيىرىمدىلىككە، ىزگىلىككە سەنىم ەكەنىن اتاپ ءوتتى. ەلىمىزدەگى قايىرىمدىلىقپەن اينالىساتىن ادامداردى ماراپاتتاۋ باسقالارىن ىنتالاندىرۋ، شاقىرۋ بولسا، ماراپاتتالىپ وتىرعان ادامعا جاساعان ىستەرىنىڭ جەمىسى رەتىندەگى سىيلىق. سونىمەن قاتار، جۇلدەنى ۇتىپ العان ۇمىتكەردىڭ ءومىرى، قوعامداعى ورنى ەرەكشە مانگە يە بولادى. وسى سىيلىق يەگەرلەرىنىڭ ايتۋى بويىنشا، جۇلدە - ۇلكەن جاۋاپكەرشىلىكتى تالاپ ەتەدى، «مەيىرىمدى ادام» اتاعىنا كىر كەلتىرمەۋگە تىرىسۋعا يتەرمەلەيدى. ياعني، جۇلدەگەر بۇقارا الدىندا ماڭگىلىككە «التىن جۇرەكتى ادام» رەتىندە قالاتىنى ءسوزسىز جانە سوعان لايىق بولىپ ءجۇرۋ كەرەك.
جۇلدەگە ىرىكتەۋ مەحانيزمى 3 ساتىدا وتەدى. ۇيىمداستىرۋ كوميتەتى قاتىسۋشىلاردىڭ وتىنىشتەرىن، قوسىمشا ماتەريالدارىن مۇقيات قاراستىرادى. ءاربىر ۇمىتكەردىڭ قايىرىمدىلىق قىزمەتىنىڭ ساراپشىلىق كەڭەس ءار نوميناتسيا بويىنشا بارلىق قاتىسۋشىنىڭ اراسىنان ءۇش ۇمىتكەردى تاڭدايدى. ال قوعامدىق كەڭەس - ىرىكتەۋدىڭ سوڭعى ساتىسى، مۇندا ساياسات، قوعام قايراتكەرلەرى، جازۋشىلار، ارتىستەر، عالىمدار، ياعني قوعامدا تانىمال ءارى قۇرمەتكە يە تاڭداۋلىلارى جەڭىمپازعا داۋىس بەرەدى. بۇل جىلى جاڭا وزگەرىس ەنگىزىلدى - رەسمي سايتتا داۋىس بەرۋ مۇمكىندىگى پايدا بولدى.
جەڭىمپازدار 11 نوميناتسيا بويىنشا انىقتالادى: «جەتىم بالالارعا كورسەتكەن قامقورلىعى ءۇشىن»، «ءبىلىمدى دامىتۋعا قوسقان ۇلەسى ءۇشىن»، «مۇگەدەك جاندارعا كورسەتكەن قامقورلىعى ءۇشىن»، «سپورتتى دامىتىپ، ونى قولداعانى ءۇشىن، «ارداگەرلەرگە كورسەتكەن قۇرمەتى ءۇشىن»، «جىل مەتسەناتى»، «اقپاراتتىق قولداۋشى»، «جىلدىڭ قايىرىمدى ادامى»، «جىل ۇيىمى»، «دەنساۋلىق ساقتاۋ سالاسىنا قولداۋ كورسەتكەنى ءۇشىن»، «قازاقستاننىڭ وركەندەۋىنە قوسقان ۇلەسى ءۇشىن».
VIII ۇلتتىق قوعامدىق «التىن جۇرەك» سىيلىعىن ماراپاتتاۋ سالتاناتى 27 - قازان كۇنى ساعات 19.00 دە اباي اتىنداعى مەملەكەتتىك اكادەميالىق وپەرا جانە بالەت تەاترىندا وتەدى.
ارنايى Massaget.kz ءۇشىن: فاريزا ءابىلوۆا
