تاڭعالدىرعان تويلار
ولاردىڭ اراسىندا ۇرپاقتان-ۇرپاققا تاراپ، اتا-داستۇرلەرىنە ساي اتالىپ وتىلەتىندەرى بولەك اڭگىمە، وزدەرى تۇراتىن مەملەكەتتىڭ بارشا تۇرعىندارىنا دا ورتاق مەرەكە بارشىلىق.
ماسەلەن «تاۋەلسىزدىك كۇنى»، «اسكەر كۇنى»، «بوستاندىق كۇنى»، «تۋ كۇنى» دەپ جالعاسا بەرەدى.
وسىنداي ىزگىلىكتەن تۋعان تويلاردىڭ قاتارىن ءىشى پىسقان قاۋىمنىڭ ويلاپ تاپقان مەرەكەلەرى دە تولىقتىرا تۇسۋدە. مادەنيەتىن قالىپتاستىرۋمەن قاتار، رۋحاني قۇندىلىق قاتارىندا سانالاتىن قۋانىشتى وقيعالاردى ءار حالىق جاتسىنباي قابىلدايدى.
الايدا ءبىز ءسوز ەتكەلى وتىرعان كەيبىر مەرەكەسىماقتار كوپ كىسىنى ويعا قالدىرادى. تامسانۋ ەمەس، تاڭداي قاعۋ، تاڭعالۋ ەمەس، تىكسىنىپ قالۋ سەكىلدى جاعدايلار دا جاعىمسىزدىقتان تۋىندايدى. ايتالىق، ءبىرقاتار افريكا ەلدەرىندە ۇل ەر جەتكەن سوڭ، ونىڭ ناعىز ەركەك بولىپ جەتىلىپ كەلە جاتقانىن بايقاۋ ماقساتىندا ۇلكەن سىناقتان ۇيىمداستىرىلادى.
وسىنداي اتاۋلى كۇندى قازاق جۇرتىنا قالاي ەنگىزۋگە بولادى؟ مۇنى ەشكىم جۇرەگىمەن قابىلداي الماسى انىق. ءبىراق قىزىق ءۇشىن مەرەكەنى تاماشالاۋى مۇمكىن...
سوڭعى كەزدەرى وتكىزىلەتىن سالتاناتتىڭ بارلىعى دەرلىك جاپپاي قىدىرۋعا ۇلاسادى. ءبىر-ەكى جەردە ساۋدا- ساتتىق، ەندى ءبىر جەردە كونتسەرت بولىپ جاتادى. بۇرىنعىداي سالتاناتتى جيىندار، كوشەلەردە ۇراندار ۇستاپ شەرۋگە شىعۋ ۇمىت بولدى.
شەرۋ قازىر تەك ءتۇرلى نارازىلىق شارالارى كەزىندە عانا ۇيىمداستىرىلادى. بۇگىنگى ءىس-شارالار ادامداردىڭ باس قوسىپ، ءوزارا قاۋقىلداسىپ، داستارقان باسىندا كەزدەسىپ، وتكەن-كەتكەندى ەسكە الۋىمەن شەكتەلەدى جانە بۇل وزدەرى ءۇشىن قىزىقتى كورىنەتىن سەكىلدى. ءدال وسىنداي كورىنىستەرگە كوڭىلى تولمايتىندار تاپقان مەرەكەلەر بىرتىندەپ ەل ارالاپ بارادى. كۇندەردىڭ كۇنىندە ءبىزدىڭ ەلىمىزدە دە جىن-شايتان كۇنىن اتاپ وتەتىن بەلسەندى توپ پايدا بولسا، وعان ەش تاڭعالماڭىز.
ەندى الەمگە قايتا ورالايىق:
حالىقارالىق پيراتتار كۇنى. بۇل - قارنى توق، قايعىسى جوق امەريكادا ويلاپ تابىلعان، ينتەرنەت ارقىلى الەمدى شارلاعان مەرەكە. بۇل كۇنى - 19 قىركۇيەكتە الەمنىڭ ءار شالعايىندا تۇراتىن جۇرتتىڭ ءبىر بولىگى باندان كيىپ، ءبىر كوزىن قارا شۇبەرەكپەن بايلاپ، قولىنا ءدۇربى ۇستاپ، جەلكەندى كەمەلەرگە مىنەدى. ءتىپتى سويلەگەن سوزدەرى دە تەڭىز قاراقشىلارى قولدانعان قۇپيا سوزدەرمەن ايتىلادى.
بەت-الپەت چەمپيوناتى. اعىلشىندار ۇيىمداستىراتىن مەرەكە ەگرەمونتە قالاسىندا ءوتىپ تۇرادى. ءتىپتى مۇنىڭ تاريحى 1297 - جىلدان باستالادى دەۋشىلەر دە بار. بۇل بايقاۋدا اتى اڭىزعا اينالعان پيتەر دجەكسون دەگەننىڭ ەسىمىن ءار اعىلشىن بالاسى بىلەدى. قورقىنىشتى ءارى كۇلكىلى بەت-الپەتتى كورۋگە ميلليونداعان ادام جينالادى.
مايمىلدار ءۇشىن ءمازىر. بۇل تايلاندتا لوپبۋري پروۆينسياسىندا جىلدا وتكىزىلەدى. مەرەكەگە شاقىرىلعان 600 دەي مايمىل مولىنان جايىلعان تۇسكى اسقا شاقىرىلادى. رام قۇدايدىڭ قۇرمەتىنە جايىلاتىن داستارقانعا كوزدىڭ جاۋىن الاتىن كوكونىستەر قويىلادى.
ءيا، مەرەكەدەن ءمان كەتە باستاعان ءداۋىر تۋعانداي. قايسى ءبىر شارالار ادامدى اداستىرۋدىڭ جولى سەكىلدى كورىنەدى. مىسالى، جاقىندا «بەي-جاي بولما، مۇزدى سۋ قۇيىن» دەپ اتالاتىن فلەش-موپ ءوتتى. ارعى تەگى امەريكا قۇراما شتاتتارىنان باستالعان فلەش-موبتىڭ قازاقتار ءۇشىن نەگە قىزىق بولعانى تۇسىنىكسىز. مۇنى قايىرىمدىلىق ماقساتتا وتكىزگەندەردى تۇسىنۋگە دە تۇراتىن شارا ەمەس.
سەن مىقتى بولساڭ، قايىرىمدىلىقتى كەز كەلگەن ۋاقىتتا جاسا. سولاي ىستەپ جۇرگەندەر دە جەتكىلىكتى. جوعارىدا ءسوز ەتكەن توسىن وقيعا 29 جاسىندا مۇگەدەك بولعان بيد برەيدس دەگەن امەريكالىق ازاماتتىڭ قايىرىمدىلىق جاساۋعا ەل نازارىن اۋدارۋ ءۇشىن ىستەگەن ارەكەتى ەكەنىن ەكىنىڭ ءبىرى بىلمەيدى. قايىرىمنان گورى قاتىگەزدىگى باسىم قوعامدا مۇگەدەكتىڭ ءوزى الاقان جايسا، ول جاقتان نە جاقسىلىق كۇتۋگە بولادى؟
ايتپاقشى، ءبىر كەزدەرى ءۇي جانۋارلارىن قورعاۋشى ءبىر-ەكى قىزدىڭ شەشىنىپ تاستاپ، رەسپۋبليكا الاڭىندا جۇرت نازارىن اۋدارعانىن دا ەشكىم ۇمىتا قويعان جوق. بۇل از دەسەڭىز، «ۆالەنتين كۇنى» دەگەن شىقتى. اقىرى كوشەلەردە قۇشاقتاسۋ تۇگىلى، سۇلىكشە سورىساتىنداردىڭ كوبەيگەنىنە كۋا بولا باستادىق. ەڭ اقىرى نە بولدى؟ الماتىدا كوشە بويىنداعى ورىندىقتا، تال تۇستە جىنىستىق قاتىناسقا تۇسكەن قازاق قىزى مەن جىگىتىنىڭ سۋرەتى ينتەرنەت ارقىلى ەلگە جايىلدى.
بۇدان اڭعارعانىمىز - كەيبىر كەزدەيسوق كەلىپ قالعان مەرەكەلەردىڭ جات اعىم مەن جات قىلىقتى، ارسىزدىق پەن يمانسىزدىقتى ناسيحاتتايتىندىعى.
جالاڭاشتار كۇنى: جاپونيادا وسى كۇندى اتاپ ءوتۋ 767 - جىلدان بەرى جالعاسىپ كەلەدى. ءبۇل ءۇشىن Saidaji شىركەۋىنە 3000 نان اسا ادام جينالىپ، ۇياتتى جەرلەرىن عانا اق ماتامەن وراپ الادى (بۇعان دا شۇكىر). ولار وسىلايشا وزدەرىنە مولشىلىق پەن تابىس تىلەيدى ەكەن. شىركەۋدە تازالانىپ العان تارلاندار شەرۋدى كوشەلەردە جالعاستىرادى.
دجەنتلمەندەر وليمپياداسى. مۇنى Chap ي Hendrick's قوعامىنىڭ مۇشەلەرى قوعامى كلۋبتاردىڭ بىرىندە اشىق الاڭدا ۇيىمداستىرادى. ماقساتى - اعىلشىن جىگىتتەرىنىڭ العىرلىق ءداستۇرىن ناسيحاتتاۋ.
زومبيلار شەرۋى. بوستونا ورتالىعىندا وتەتىن (كانادا) ۇرەي شاقىراتىن شارا ءتۇرلى قاتىسۋشىلاردىڭ بەتپەردەلەر كيۋى ارقىلى ەرەكشەلەنەدى.
مىنە، مەرەكەلەر وسىلايشا جالعاسا بەرەدى. ال ءسىز قازاق بولمىسىنا جاقىن، ۇلت رۋحىن كوتەرەتىن قانداي مەرەكەنى قولدان جاساۋدى قۇپ كورەسىز؟ ۇسىنىسىڭىز بولسا، joldas216@mail.ru ەلەكتروندى پوشتاسىنا جولداڭىزدار. ەڭ قىزىقتى ۇسىنىسقا ارنايى جۇلدە بار.
دەرەك پەن دايەك:
ءۇندىستاندا ادامداردىڭ ءبىر-بىرىنە بوياۋ شاشاتىن فەستيۆالى بار. مۇنى ءۇندى تەلەسەريالدارىنان دا بايقاعان بولارسىزدار.
بولگاريادا قىزاناقپەن اتقىلاسىپ، كوشەلەردە «قان-جوسا» ەتەتىن شارا جىلدا وتەدى.
ۇلى بريتانيانىڭ كۋپەرس حيلل قالاشىعىندا سىرمەن بىرگە سىرعاناۋ جارىسى وتەدى. بيىك جوتادان ىلديعا قاراي قۇلديلاعان دوپ پىشىندەس سىردى قۋىپ جەتسەڭ، سىر سەنىكى بولادى.
شوتلانديانىڭ ەدينبۋرگ قالاسىندا وت كۇنى ۇيىمداستىرىلادى. ءتۇرلى قۇبىجىقتاردى بەينەلەيتىن كوستيۋم كيگەن جىگىتتەر وتتى اينالا بيلەپ، قولدارىنداعى وتتىقتاردى مىڭ اينالدىرىپ، ءتۇرلى كورىنىستەر كورسەتەدى.
اۆستريانىڭ تەلفس قالاسىنداعى بەس جىلدا ءبىر رەت وتەتىن مەرەكەنى جىن-شايتاندار فەستيۆالى دەۋگە كەلەتىن شىعار. قورقىنىشتى كيىم مەن بەتپەردەلەر كيگەن قۇبىجىق كىسىلەر قالا كوشەلەرىن كەزىپ جۇرەدى. وسىلايشا، اڭىزداعى ادامداردىڭ بەينەسى ارقىلى ءوز ءداستۇرىن ناسيحاتتايدى.
دۋاناباي جولداسبەك
