بريۋسسەلدە ەلباسى مەن بەلگيا كورولىنىڭ كەزدەسۋى ءوتىپ جاتىر
اڭگىمە بارىسىندا ەكىجاقتى ىنتىماقتاستىقتىڭ ساياسي جانە مادەني-گۋمانيتارلىق سالاداعى نەگىزگى اسپەكتىلەرى ءسوز بولدى. تاراپتار سونداي-اق ەلدەرىمىزدىڭ اراسىندا ءتۇرلى سالاداعى ءوزارا ءىس-قيمىل دەڭگەيى ءوسىپ كەلە جاتقانىنا توقتالا وتىرىپ، ىنتىماقتاستىقتى بۇدان ءارى دامىتۋ ءۇشىن ءبىرقاتار پەرسپەكتيۆالى باعىتتاردىڭ بار ەكەنىن اتاپ ءوتتى، دەپ حابارلادى اقوردانىڭ باسپا ءسوز قىزمەتىنەن.
بەلگيا كورولى فيليپپ 1960-جىلى 15- ساۋىردە دۇنيەگە كەلگەن. ول - البەرت Ⅱمەن پاولا پاتشايىمنىڭ ۇلكەن ۇلى.
فيليپپ ورتا مەكتەپتى بىتىرگەن سوڭ، 1981-جىلى كورولدىك اسكەري اكادەميانى ءتامامداپ، ۇشقىش-سىناقشى جانە دەسانتشى ماماندىعىن الدى. ول ءۇشىنشى دەسانتشىلار باتالونىنىڭ بولىمىنە جەتەكشىلىك ەتىپ، بەلگيا اسكەري-تەڭىز فلوتىنىڭ ءبىرىنشى رانگالى كاپيتانى شەنىن الدى. وسىدان كەيىن وقۋىنا قايتا ورالدى، بريتانيانىڭ وكسفورد ۋنيۆەرسيتەتىنىڭ ترينيتي كوللەجىندە تاجىريبەدەن ءوتىپ، ستەنفورد ۋنيۆەرسيتەتىندە ءبىلىمىن جالعاستىردى. 1988-جىلى حانزادا فيليپپ ستەنفورد ۋنيۆەرسيتەتىنىڭ ماگيسترى اتاعىن الدى.
1993-جىلى اكەسى البەرت Ⅱتاققا وتىرعاننان كەيىن، ول 33 جاسىندا تاق مۇراگەرى اتاندى. سول جىلى بەلگيا ۇكىمەتىنىڭ شەشىمىمەن فيليپپ حانزادا 1962-جىلدان بەرى اكەسى باسقارىپ كەلگەن سىرتقى ساۋدا جونىندەگى بەلگيا بيۋروسىنىڭ قۇرمەتتى پرەزيدەنتى لاۋازىمىن يەلەندى.
1966-جىلى بەلگيانىڭ تۇراقتى دامۋى فەدەرالدى كەڭەسىنىڭ ءتوراعاسى، ال 1997-جىلى قۇرمەتتى ءتوراعاسى بولدى. 2003-جىلدان بەرى دامۋشى ەلدەرگە ارنالعان بەلگيالىق ينۆەستيتسيالىق كومپانيانىڭ قۇرمەتتى ءتوراعاسى. 2004-جىلدان باستاپ، ول ەۋروپالىق ريم كلۋبى بولىمشەسىنىڭ جانە حالىقارالىق بەلدەۋ قورىنىڭ قۇرمەتتى ءتوراعاسى.
فيليپپ حانزادا شەت ەلدەردە بەلگيالىق 85 كە جۋىق ەكونوميكالىق ميسسياعا (ونىڭ ىشىندە قازاقستان دا بار) جەتەكشىلىك ەتتى.
1999-جىلى فيليپپ ماتيلدا د'ۋدەكەم د'اكوزبەن نەكەلەستى. ولاردىڭ وتباسىندا 4 بالا بار.
