رەداكتوردىڭ ورىنباسارلىعىن «نيۋ يورك تايمستىڭ» باس قۇرىلتايشىسىنان كەم كورمەيمىز

استانا. قازاقپارات - وتكەندە قاراعاندىلىق ءبىر گازەتكە تەلەفون شالدىم.

جارناما بەرمەكشى ەدىك. سايتتارىندا جوق، ينتەرنەتتى اقتارىپ ءبىر تەلەفون تاۋىپ الىپ، حابارلاسسام ءبىر قىز الدى. حاتشى سياقتى.

ماسەلەنى ءتۇسىندىردىم. «ول تۋرالى جاۋاپتى حاتشىعا زۆونداڭىز» دەپ تۇتقانى تاستاي سالدى. حاتشىعا قايتا تەلەفون شالىپ، جاۋاپتى حاتشىسىنىڭ تەلەفونىن قيناعانداي بولىپ ءجۇرىپ ارەڭ الدىم. جاۋاپتى حاتشىسى جارناما بولىمىنە سىلتەپ، ءبىر تەلەفوندى بەردى.

تەرىپ، الەۋ دەگەن سوڭ، امانداسىپ، ءمان-جايدى ايتتىم. ءسوزىمدى بىتىرگەنىم سول ەدى، كوكەم دىكىڭدەپ الا جونەلدى. «مەن باس رەداكتوردىڭ ورىنباسارىمىن، مۇنداي ماسەلەمەن ماعان حابارلاسپا. جارناما ءبولىمى دەگەن بار، مەن باس رەداكتوردىڭ ورىنباسارىمىن، سولارمەن سويلەس»، -  دەدى ەنتىگىپ. «وندا جارناما ءبولىمىنىڭ ءنومىرىن ايتىپ جىبەرىڭىزشى»، -  دەدىم. تالاعى تارس ايىرىلدى. «مەن باس رەداكتوردىڭ ورىنباسارىمىن...» دەگەن اڭگىمەلەر تاعى كەتتى. ورىنباسارلىعىن "نيۋ يورك تايمستىڭ" باس قۇرىلتايشىسىنان كەم كورمەي كۇمپيىپ وتىرعان اعامنان پايدا جوق، جاۋاپتى حاتشىعا قايتا حابارلاسىپ، جارناما ءبولىمىنىڭ ءنومىرىن الۋعا تۋرا كەلدى.

ايتايىن دەگەنىم، بىزدە جۋرناليستيكادا ءالى كاسىپكەرلىك كوزقاراس جوق. ءبىر جارناما بەرۋ ءۇشىن بىرنەشە نومىرگە حابارلاسىپ، ايعاي ەستىپ، ءبىراز ۋاقىت جوعالتۋعا تۋرا كەلدى. جاڭاعى ورىنباسارلىعىن پاتشالىققا بالاپ وتىرعان كوكەمنىڭ ورىندا ءبىر تۇرىك بولسا (سالىستىرمالى تۇردە ايتىپ وتىرمىن)، ءلاپپاي دەپ بارىپ، جارناما بولىمىنە قوسىپ، نەمەسە ءوزى-اق ماسەلەنى شەشىپ تاستايتىن ەدى.

بىزدە ءالى كەڭەستىك كوزقاراس. ول گازەتتىڭ باس رەداكتورىنىڭ ورىنباسارى، بولدى وعان جالىنىشتى داۋىسپەن سويلەۋىڭ كەرەك. ول بەدەلدى كىسى دە (ءوزى ىشتەي سولاي ويلايدى). وعان جارناما سياقتى ۇساق-تۇيەكپەن زۆونداماۋ كەرەك. مەن جارناما بەرۋشىمىن. ول جارنامالىق ورىندى ساتۋشى.

سالىستىرمالى تۇردە ايتساق، بۇل - ءونىم ءوندىرۋشى. ءونىمىن ساتتى. مەن ساتىپ الدىم. ءونىمدى ساتۋعا بۇكىل رەداكسيا مۇددەلى بولۋى كەرەك. ساتىپ الۋشى حابارلاسسا، قوساتىن جەرگە قوسىپ، ءنومىرىن بەرىپ، اقپاراتتى سايراپ بەرىپ تۇرسا. ال، جاڭاعىداي تۇسىنىكتەرمەن، «مەملەكەت بەرۋى كەرەك» دەپ وتىرا بەرگەنىمىز بەرگەن.

ترۋبكانى قويعان سوڭ، جاڭاعى باسشىنىڭ قاراماعىنداعى ارىپتەستەرىمدى ايادىم. ءاي، اناۋ جۇمىس اراسىندا جىگىتتەرگە قورا سالعىزىپ، قىزدارعا ءۇيىن تازالاتىپ، ارقاسىنا ماسساج جاساتىپ قوياتىن شىعار.

ادۆوكاتتارعا نەمەسە ىلىك ىزدەپ وتىراتىندارعا ەسكەرتۋ: بولعان وقيعانى عانا باياندادىم. قاراعاندىلىق جۋرناليستەردى ايىپتاپ وتىرعام جوق. قازاق جۋرناليستيكاسى تۋرالى ءتىپتى ەشتەمە ايتپادىم. جۋرناليستەردى جامانداپ نەمەسە سىناپ-مىنەپ وتىرعام جوق. وسىنداي كەمشىلىكتى كوردىم، تۇزەلسە، ءبارىمىز ءوندىرىپ وتىرعانىمىزدى ساتا الساق، سونىڭ ارقاسىندا بار بولساق، باي بولساق دەگەن نيەتپەن جازدىم.

ەربول ازانبەك

Facebook-تەگى جەكە پاراقشاسىنان