عالىمدار قازاقستاندىق «ەۋرازيا» جوباسىن مارسقا ادام قوندىرعانمەن بىردەي قارايدى
بۇگىن پارلامەنت ءماجىلىسىنىڭ ەكولوگيا جانە تابيعاتتى پايدالانۋ كوميتەتىنىڭ كەڭەيتىلگەن وتىرىسىندا ەنەرگەتيكا ءمينيسترى ۆلاديمير شكولنيك وسىلاي ءمالىم ەتتى.
«ءوڭىر ارالىق فورۋم بارىسىندا «ەۋرازيا» جوباسى قازاقستان مەن رەسەي پرەزيدەنتتەرىنە تانىستىرىلعان بولاتىن. گەولوگتاردىڭ مالىمەتتەرى بويىنشا، كاسپي ماڭىنداعى ويپاتتى ايماقتاردا مۇنايدىڭ ءىرى كەن ورىندارى بار. بۇل شامامەن بىرنەشە ميلليارد تونناعا بولجانىپ وتىر. ونىڭ ىشىندە پەرسپەكتيۆالىق كەن ورنىنىڭ 70 پايىزعا جۋىق اۋماعى قازاقستاننىڭ، 30 پايىزى رەسەيدىڭ اۋماعىندا جاتۋى ىقتيمال» ، - دەدى ۆلاديمير شكولنيك.
ونىڭ سوزىنە قاراعاندا، قازاقستاندىق اۋماقتىڭ 15 مىڭ مەتىردەن استام تەرەڭدىگىندە كومىرسۋتەك شيكىزاتىنىڭ الەمدەگى ەڭ كوپ قورى شوعىرلانۋى مۇمكىن. وسىعان وراي، قازىرگى تاڭدا جوبانىڭ عىلىمي- زەرتتەۋ جۇمىستارى ءجۇرىپ جاتىر.
«ءبىز بۇل جوبانىڭ جۇمىسىنا الەمنىڭ ءىرى كومپانيالارى قىزىعۋشىلىق تانىتىپ، ارالاسادى دەپ ويلايمىز. الدىن الا تۇجىرىمداما جوباسى جاسالدى. جالپى عالىمدار بۇل «ەۋرازيا» جوباسىن مارسقا ادام قوندىرعانمەن بىردەي قارايدى. ويتكەنى، جوبانىڭ بىرەگەيلىگى، كۇردەلىلىگى، وركەنيەتىمىز ءۇشىن جاڭالىعى سوعان تەڭ، ءبىزدىڭ جەر شارىن وسىنشاما تەرەڭدىككە ەشكىم دە زەرتتەمەگەن»، - دەدى ۆ. شكولنيك.
الدىن الا مالىمەتتەر بويىنشا، اعىمداعى جىلدىڭ 9 ايىندا ەلىمىزدە مۇناي ءوندىرۋ 60 ميلليون توننانى قۇرادى. بۇل وتكەن جىلدىڭ وسى كەزەڭىمەن سالىستىرعاندا 99,2 پايىزدى قۇرايدى.
«بىلتىرعى جىلى ءبىز جالپى العاندا 81,8 ميلليون توننا مۇناي وندىرگەنبىز. بيىل بۇدان 2 ميلليون تونناعا ارتىق وندىرەمىز دەپ جوسپارلاعان ەدىك. الايدا، قاشاعانداعى ىركىلىستەردىڭ سالدارىنان بۇعان قول جەتكىزۋ مۇمكىن بولمايىن دەپ تۇر. دەگەنمەن، ۇكىمەت ءبىزدىڭ الدىمىزعا بىلتىرعى دەڭگەيگە شىعۋ تۋرالى مىندەت جۇكتەدى. ءبىز وسى باعىتتا ارنايى جوسپار قۇردىق»، - دەيدى ۆ. شكولنيك.
ونىڭ ايتۋىنشا، ەسەپتى كەزەڭدە قازاقستانداعى مۇناي وڭدەۋ زاۋىتتارى 10,99 ميلليون توننا مۇناي وڭدەگەن، بۇل بىلتىرعى جىلعى كورسەتكىشكە قاراعاندا 101 پايىزدى قۇرايدى. سونىمەن قاتار، 9 ايدا ەلىمىزدەن 47,4 ميلليون توننا مۇناي ەكسپورتتالعان.
اۆتور: قانات مامەتقازى ۇلى
