انشىلەر جالاڭاشتانۋعا نەگە قۇمار؟

استانا .قازاقپارات - بۇگىندە ساحنا تورىندە ونەرىن ورلەتىپ جۇرگەن انشىلەرىمىزدىڭ كيىم كيىسىنە قارنىڭ اشاتىنى راس. ساحنا دەگەننىڭ ءوزى اراب تىلىنەن اۋدارعاندا «كيەلى، قاستەرلى» دەگەن ماعىنانى بىلدىرەدى ەكەن.

ەندەشە وسى كيەلى ونەر ورداسىنىڭ ءتورىن سىيلامايتىن تالانت يەلەرىنىڭ ورەسىزدىگىنە نەگە اشىنباسسىڭ؟ حالىق ەڭ اۋەلى ءانشىنىڭ تالانتىنا باس يەدى، ودان كەيىن كيىم كيىسىنە دە باستى نازار اۋدارادى. انشىلەردىڭ باسىم بولىگى ساحنا مادەنيەتىنە ءمان بەرە بەرمەيدى.

ادامنىڭ كوركىن اشاتىن شۇبەرەككە مۇرىن شۇيىرە قاراسا وندا ءوزىنىڭ قادىرىن ءوزى تۇسىرگەنى. كەيىنگى تولقىن انشىلەرىمىز شەتەلدىك ستيلگە قۇمارتىپ ءجۇر. جاراسىپ تۇرسا ايتار ءسوز جوق. جىرتىق دجينسى، سپورتتىق اياقكيىم، ءتىپتى مايكىمەن دە شىعا بەرەتىن بولدى. كەيدە جالاڭاش شىقپاعانىنا، مايكىنىڭ ۇستىنەن گالستۋك تاعىپ الماعانىنا شۇكىر دەۋگە تۋرا كەلەدى. بۇل بىرىنشىدەن ءانشىنىڭ بەدەلىن تۇسىرسە، ەكىنشىدەن كورەرمەندى سىيلاماعاندىقتىڭ بەلگىسى. توپ- توپ بولىپ ءان شىرقايتىن قىزدارىمىز جارتىلاي جالاڭاش شىعادى. ولار ءوز ونەرلەرىن كورسەتۋگە ەمەس، ءتانىنىڭ سۇلۋلىعىن العا تارتۋ ءۇشىن شىعاتىنداي. ەتەكتەرىنە جارتى مەتر شۇبەرەك جەتپەي قالعانداي، يىق تا جالاڭاش، ارقا دا دا جالاڭاش. ولارعا كيەلى ساحنانى قورلاماسا ەكەن دەگىڭ كەلەدى. وزدەرىنە ۇناسا ءوز ورتالارىندا، مەيرامحانادا، ديسكوتەكادا ءان شىرقاسىن. حالىقتىڭ قۇرمەت تۇتاتىن كيەلى ونەر ورداسىن قورلاماسا ەكەن دۇرىسى.

ديزاينەرلەرىمىز دە قازاقتىڭ ۇلتتىق كيىمىن جالاڭاشتاپ جىبەردى. ەتەگى قىسقارعان، يىعى جالاڭاش، كەۋدەسى اشىق- شاشىق ۇلتتىق كيىمدەر قاپتاپ كەتتى. كەيدە انشىلەرىمىز، كەيدە بيشىلەرىمىز كيىپ شىققاندا ۇيالعاننان جەرگە قارايسىڭ. ارينە، بۇركەپ تاستاسىن دەگىمىز جوق. ۇلتتىق ناقىشتاعى كيىمدەرىمىزدى قور قىلماي زامانعا لايىقتاپ وندا دا شەكتەن شىعىپ كەتپەي، ادەمى ۇيلەستىرە بىلسە ۇتپاسا ۇتىلماسى حاق. بۇرىننان ونەردەن سىرتتاپ قالماي ساحنادا جۇرگەن ءانشى- اپالارىمىزدىڭ كەيدە شالبار كيىپ شىعاتىنى بار. جاراسىمسىز- اق. مۇلدە كيمەسىن دەمەيمىز. الايدا كوپشىلىكتىڭ قۇرمەتىنەن ماقۇرىم قالماسا ەكەن دەگەندەگىمىز عوي. جاس انشىلەرىمىز ءجۇرىس- تۇرىسىن جوندەپ، ساحنا مادەنيەتىن مەڭگەرىپ بولعاننان كەيىن عانا ونەرىن ورتاعا سالسا. اسىرەسە جاراسىمدى كيىنە ءبىلۋ مادەنيەتىن ۇيرەنسە قۇپتار ەدىك. كەيدە كلاسسيكالىق ۇلگىدەگى، كەيدە سپورتتىق ۇلگىدەگى كيىمدەرمەن شىعا بەرەتىن انشىلەرگە ايتار ءسوزىمىز جوق. ءار كيىمنىڭ كيەتىن ورتاسى بولادى. تالعام تارازىسى تىم تومەن ونەر يەلەرى ەڭ الدىمەن ءوزىن قۇرمەتتەپ ۇيرەنسە ەكەن. بۇگىندە اسەم انىمەن دە، كيگەن كيىمىمەن دە كورەرمەنىن باۋراپ العان انشىلەر جەتەرلىك. مىڭداعان كورەرمەن سانسىز جۇلدىزداردىڭ اراسىنان ىرىكتەپ ءۇش ءانشىنى ەرەكشە اتايدى. اسىرەسە جاراسىمدى كيىنە بىلەتىندەرىنە ريزا. ولار روزا رىمبايەۆا، ماقپال ءجۇنىسوۆا، قاراقات ءابىلدينا. ونەردىڭ بيىك شىڭىنا ورلەپ، تىڭدارماندارىن تالانتىنا تابىندىرىپ جۇرگەن ءۇش جۇلدىزىمىزدىڭ تالعامدارىنىڭ بيىكتىگىنە دە قۋانامىز.

 بىردە ۇلكەن كونتسەرتتە روزا اپامىز اپپاق كويلەك كيىپ شىقتى. وڭ جاعىنا قىزىل راۋشان گۇلى اسەمدەلىپ تىگىلگەن. اتىنا دا، زاتىنا دا ساي بولىپ تۇر. قانداي جاراسىمدى. قاراقاتتىڭ دا كيىم ۇلگىلەرى ەرەكشەلىگىمەن كوزگە ۇرادى. بىردە سۇحبات بارىسىندا قىدىرالى بولمانوۆ: «قاراقات ساحنالىق كيىمدەرىنىڭ نەگىزگى ديزاينىن ءوزى جاسايدى. كەلىپ تاپسىرىس بەرۋلەرىڭىزگە بولادى» دەپ ازىلدەپ ەدى. اسىرەسە قاراقات ۇلتتىق ناقىشتاعى كيىمدەرىمەن تالايلاردى تامسانتىپ ءجۇر. اپپاق ۇلتتىق كويلەك، باسىنا ساۋكەلە كيىپ ۇلبىرەپ شىعا كەلگەندە، وعان اسەم ءانى قوسىلىپ ءبىر جاراسىمدىلىق ورنايدى. كەيىنگى تولقىن انشىلەر وسى ءۇش جۇلدىزىمىزدان ۇلگى السا دۇرىس بولار ەدى.. .. ءسان شەبەرلەرى ءانشىنىڭ تاپسىرىسى بويىنشا جۇمىس ىستەيدى. ساحنالىق كيىمنەن قاي ءانشىنىڭ تالعامى قانداي دەڭگەيدە ەكەندىگى ءبىلىنىپ تۇرادى. سوندىقتان دا قاي ءانشى بولماسىن ەڭ الدىمەن ءوزىن سىيلاسا، تالانتىن باعالايتىن تىڭدارمانىن سىيلاسا. ءتان سۇلۋلىعىن كورسەتەتىن ورىن ساحنا ەمەس. سوندىقتان اشىقتىق پەن شاشىقتىققا قۇمار سۇلۋلارىمىز ساحنا تورىندە تايراڭداماي، دۇرىس ءستيلىن تاپسا. ەڭ اۋەلى ءوزىن- ءوزى مازاق قىلماسا ەكەن دەيسىڭ.. .

اۆتور: باقىتنۇر جۇماش

«الاش ايناسى»