استانادا حالىقارالىق اۆتوكولىك كورمەسىندە الەمدىك جانە وتاندىق برەندتەر ۇسىنىلادى
قازاقستاندا العاشقى ەلەكتروموبيلدى تانىستىرعان حالىقارالىق دارەجەدەگى ەلوردالىق اۆتوسالون بيىل ءوزىنىڭ جەلىسىن گيبريدتى اۆتوموبيلدەرمەن كەڭەيتە تۇسپەك. ءىس-شارا «جاسىل» تاقىرىپتى جالعاستىرا كەلە، قازاقستاندىق جولداردا قورشاعان ورتاعا ەڭ از شىعىنمەن يننوۆاتسيالىق تەحنولوگيالاردى ەنگىزۋدەگى ماڭىزدى قادامعا اينالماق. بۇل «بولاشاقتىڭ ەنەرگياسى» تاقىرىبىندا وتەتىن «ЕXPO-2017» حالىقارالىق مامانداندىرىلعان كورمەسىن وتكىزۋ قارساڭىنداعى اسا ماڭىزدى ماسەلە.
«AIAS-2014» ەكسپوزيتسياسىندا Mitsubishi, Renault, Jeep, Volkswagen, Maserati, SsangYong, Peugeot, Iveco, Hyundai, Lada, Skoda, Kia, Chevrolet جانە ت. ب. الەمدىك جانە وتاندىق برەندتەر ۇسىنىلادى. كەلۋشىلەر كولىك اكسەسسۋارلارى، قوسالقى بولشەكتەر، اۆتوحيميا مەن اۆتوكوسمەتيكا، تيۋنينگ، اۆتوەلەكترونيكا، اۆتونەسيەلەۋ مەن اۆتوساقتاندىرۋمەن تانىسا الادى.
كورمە 10-12- قازاندا ق ر ينۆەستيتسيالار جانە دامۋ مينيسترلىگىنىڭ، استانا قالاسى اكىمدىگىنىڭ جانە قازاقستان اۆتوكولىك بيزنەسى قاۋىمداستىعىنىڭ قولداۋىمەن جانە «ExpoGroup» حالىقارالىق كورمە كومپانياسىنىڭ ۇيىمداستىرۋىمەن «كورمە» ورتالىعىندا وتەدى، دەپ حابارلانعان ەلوردا اكىمدىگىنىڭ سايتىندا.
