اكىمدىك «ورالمانداردىڭ تۇرمىسى تومەن» دەگەن اقپاراتتى تەرىسكە شىعاردى

وسكەمەن. قازاقپارات - شىعىس قازاقستان وبلىسى كۋرچاتوۆ اكىمدىگى قالادا تۇرىپ جاتقان ورالمانداردىڭ تۇرمىسى تومەندىگى تۋرالى ب ا ق بەتتەرىندەگى اقپاراتتاردى تەرىسكە شىعاردى.

اكىمدىكتىڭ حابارلاۋىنشا، قانداستارىمىز كۋرچاتوۆ قالاسىنا 2009-جىلدىڭ سوڭىندا «نۇرلى كوش» باعدارلاماسى بويىنشا كەلە باستاعان. باعدارلاما جۇزەگە اسقان كەزدە 140 جانۇيا كوشىپ كەلدى. ولاردىڭ سانى 532 ادام، سونىڭ 224 ءى بالالار. سوڭعى كەزدەرى بۇل وتباسىلاردا 90 بالا دۇنيەگە كەلدى.

كوپ بالالى وتباسىلار ءۇشىن كوپ پاتەرلى 3 ءۇي قالپىنا كەلتىرىلدى.

قۇرىلىس جۇمىستارى اياقتالعان سوڭ، ۇيلەردى جۇمىس كوميسسياسى، كەيىن مەملەكەتتىك كوميسسيا قابىلدادى.

«ال قالا تۇرعىندارى دا سونداي ۇيلەردە تۇرادى، ولار جوندەۋ جۇمىستارىن ءوز قاراجاتتارىنا جۇرگىزەدى»، دەلىنگەن حابارلامادا.

قالاداعى پاتەرلەردىڭ كوبىنىڭ اۋماعى - 32 شارشى مەتردەن 72 شارشى مەترگە دەيىن.

ورالماندار قونىستانعان تۇرعىن ۇيلەر قالپىنا كەلتىرىلدى جانە جىلىتۋ ماۋسىمىنا دايىن. ەلەكتر ەنەرگياسى ءۇشىن تولەمەگەن تۇرعىندار عانا جارىقسىز قالعان. ەلەكتر ەنەرگياسىنان ايىرۋ ق ر «ەلەكترمەن قامتۋ» تۋرالى زاڭىنا ساي جۇرگىزىلەدى.

«وتانداستارىمىزدىڭ كوپشىلىگى كوممۋنالدىق قىزمەت ءۇشىن قارىزعا باتقانىنا قاراماستان، جىلۋ مەن سۋ بەرۋ ءالى توقتاتىلعان جوق»، دەلىنگەن حابارلامادا.

سونىمەن قاتار، ەڭبەكپەن قامتۋ جانە الەۋمەتتىك باعدارلامالار ءبولىمى ولاردى جۇمىسپەن قامتۋ باعىتىندا الەۋمەتتىك تولەمدەرگە ءوتىنىش ءبىلدىرۋ بويىنشا اقپاراتتاندىرۋ جۇمىستارىن جۇرگىزىپ كەلەدى.

بۇگىندە ورالمانداردىڭ 38 جانۇياسى الەۋمەتتىك كومەك الىپ وتىر. اعىمداعى جىلدىڭ باسىنان تولەنگەن الەۋمەتتىك كومەك سوماسى - 955626 تەڭگە. 590 ادامنىڭ 298 ءى ەڭبەككە جارامدى. ساۋدا مەن قىزمەت كورسەتۋمەن اينالىساتىن جەكە كاسىپكەرلەر سانى - 36 جانۇيا.

37 وتباسى ءوز ءوزىن ەڭبەكپەن قامتىعان. ولار مال شارۋاشىلىعى مەن وسىمدىك شارۋاشىلىعىن دامىتۋ ءۇشىن «ەڭبەكپەن قامتۋدىڭ جول كارتاسى-2020» جانە مونوقالالاردى دامىتۋ باعدارلامالارى بويىنشا نەسيە العان.

108 ادام قالا كاسىپورىندارى مەن ۇيىمدارىنداعى تۇراقتى جۇمىس ورىندارىنا ورنالاستىرىلدى.

كۋرچاتوۆ اكىمى دميتري گاريكوۆتىڭ سوزىنە قاراعاندا، ورالمانداردىڭ جۇمىس جوقتىعىنا شاعىمدانۋى نەگىزسىز. ويتكەنى، ولاردىڭ العان بىلىمىنە جانە ماماندىعىنا قاراپ جۇمىس ۇسىنىلادى. الايدا، ولاردىڭ كەيبىرى جالاقىنىڭ ازدىعىن ايتىپ، ۇسىنىلعان جۇمىستان باس تارتادى، دەلىنگەن حابارلامادا.