بۇگىنگى مىندەت بۇرىنعىدان بەتەر اۋىر، بۇرىنعىدان بەتەر ماڭىزدى - مەملەكەت باسشىسى

استانا. قازاقپارات - بۇگىنگى مىندەت بۇرىنعىدان بەتەر اۋىر، بۇرىنعىدان بەتەر ماڭىزدى. استانادا «سامۇرىق-قازىنا» ا ق ترانسفورماتسيا باعدارلاماسىنىڭ تۇساۋكەسەرىنە ارنالعان فورۋم بارىسىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.

جيىن بارىسىندا ەلباسى ءسوز سويلەپ، ولارىمەن بولىسكەن مەيماندارعا العىسىن جەتكىزدى. «قازاقستان - كەڭەس وداعى ىدىراعاننان كەيىن ءوز جولىمەن جۇرە باستاعان جاس مەملەكەت، ءبىز جاقىندا تاۋەلسىزدىگىمىزدىڭ 23 جىلىعىن اتاپ وتەمىز. ءبىز وسى جىلداردا ايتارلىقتاي جۇمىس اتقاردىق. 1994-1995-جىلدارداعى 2100 پايىزدىق ينفلياتسيانى ەڭسەردىك، تاقىر جەردەن مەملەكەت تۇرعىزدىق، ونىڭ ىشكى-سىرتقى ساياساتىن قالىپتاستىرىپ، قاۋىپسىزدىگىن قامتامسىز ەتتىك. ەلدىڭ احۋالىن ەڭ تومەنگى دەڭگەيدەن 16 ەسەگە جەتكىزدىك، قازاقستاندىقتاردىڭ تابىسى 12 ەسەگە ءوستى.

بۇگىنگى كۇنى ءبىز مۇلدە باسقا قازاقستاندى قالىپتاستىردىق، مۇلدەم جاڭا ۇرپاقتار ءوستى. ءتىپتى، الەمنىڭ ەڭ جاقسى كۋرورتتارىندا دەمالاتىنداردىڭ اراسىندا دا قازاقستاندىقتار بار. «بولاشاق» بويىنشا عانا ەمەس، باسقا دا جولدارمەن الەمنىڭ ەڭ جاقسى ۋنيۆەرسيتەتتەرىندە وقيتىندار دا قازاقستاندىقتار»، - دەدى ن. نازاربايەۆ.

بۇل رەتتە ەلباسى وسى كورسەتكىشتەردىڭ ءبارى جەڭىل بولماعانىن اتاپ ءوتتى. سونىمەن قاتار، پرەزيدەنت وتكەن جولداردىڭ ەشقايسىسى وڭاي بولماعانىن، داعدارىستاردى ەڭسەرۋدە دە كوپتەگەن قيىندىقتار كەزدەسكەنىنە توقتالدى.

«مەن بۇنىڭ بارلىعىن نە ءۇشىن ايتىپ وتىرمىن؟ الدا قويىلعان مىندەتتەردىڭ بارلىعى - بۇرىنعىدان بەتەر اۋىر. بۇرىنعىدان بەتەر ماڭىزدى. نەگە؟ ويتكەنى، ءبىز دامۋ ساتىسىنان وتتىك، ونى ەڭسەردىك، بۇعان ماقتانۋعا دا بولادى. الايدا، الەمنىڭ وزىق وتىز ەلىنىڭ قاتارىنا كىرمەك بولساق، وندا وڭاي بولمايتىنى انىق.  5 جىلدىڭ ىشىندە قوردىڭ جيىنتىق اكتيۆى 2 ەسە ءوسۋى ءتيىس. دەمەك، 200 ميلليارد ا ق ش دوللارىنا جەتۋى قاجەت»، - دەدى ن. نازاربايەۆ.

اۆتور: قانات مامەتقازى ۇلى