كارىم ءماسىموۆ: قازاقستاندا ءتۇرلى ەلەكتروندى قىزمەت كورسەتۋ تيىمدىلىگى ارتتى
«قازىرگى كەزدە اقپاراتتىق تەحنولوگيالاردىڭ دامۋى ءوزىنىڭ ەلەۋلى ىقپالىن تيگىزۋدە. بۇگىندە جالپى جاھاندىق ەكونوميكانى بۇل تەحنولوگيالارسىز كوزگە ەلەستەتۋ مۇمكىن ەمەس. سونىمەن قاتار بۇل سوڭعى بۋىندى تەحنولوگيالار قارىم-قاتىناسقا ءتۇسۋ جولدارىن دا وزگەرتۋدە. قازاقستاندا كوپتەگەن ينۆەستيتسيالار وسى كوممۋنيكاتسيالىق ينفراقۇرىلىمدارعا باعىتتالۋدا جانە بۇل مىندەتتەمەلەر «اقپاراتتىق قازاقستان-2020» باعدارلاماسى اياسىندا قازاقستان پرەزيدەنتى نۇرسۇلتان نازاربايەۆتىڭ باستاماسىمەن جۇرگىزىلۋدە. بۇل باعدارلاما ساندىق تەحنولوگيالار جەتىستىكتەرىن دۇرىس قولدانۋعا باعىتتالعان»، - دەپ توقتالدى ۇكىمەت باسشىسى.
ك. ءماسىموۆ بۇگىندە قازاقستاندا بيزنەس پەن ۇكىمەت اراسىنداعى بايلانىستى جەتىلدىرۋ تۇرعىسىندا ءتيىستى شارالار اتقارىلىپ جاتقاندىعىن ايتا كەلە، ەلەكتروندىق تۇردە ءتۇرلى قىزمەتتەر كورسەتۋدىڭ تيىمدىلىگى ارتتىرىلعانىن اتاپ ءوتتى.
بيىل ب ۇ ۇ ەلەكتروندىق ۇكىمەت دامۋى بويىنشا رەيتينگتە قازاقستان 2012-جىلمەن سالىستىرعاندا 10 ساتىعا كوتەرىلىپ، 193 ەلدىڭ ىشىندە 28-ورىندا تۇراقتادى.
ايتا كەتەيىك، فورۋمعا ب ۇ ۇ باس حاتشىسىنىڭ ورىنباسارى ۋ حۋنبو، سونىمەن قاتار 70 ەلدىڭ مەملەكەتتىك قايراتكەرلەرى، عالىمدار اكت سالاسىنىڭ جەتەكشى حالىقارالىق ساراپشىلارى قاتىسۋدا.
بەلگىلى بولعانداي، وسى شارا «تۇراقتى دامۋ ماقساتىنداعى اقىلدى باسقارۋ: جەلىلىك قوعامداعى سەرىكتەستىكتىڭ جاڭا مۇمكىندىكتەرى» تاقىرىبىنا ارنالىپ وتىر.
اۆتور: رۋسلان عابباسوۆ
