تۇرسىنبەك قاباتوۆ ۇلكەن-كىشىنى تۇگەل «ءازىل الاڭى» بايقاۋىنا قاتىسۋعا شاقىردى
ايگىلى شوۋمەن ەندى تاسادا قالىپ قويعان تالانتتاردى ۇلكەن ساحناعا شىعارماق نيەتتە.
جۇرتتى ادەمى كۇلدىرۋگە ءالى كەلەتىن قىز-جىگىتتەردى ىزدەۋگە ونىڭ ءوزى كىرىستى.
بۇل ءۇشىن ارنايى كاستينگ ۇيىمداستىرىپ، جۇزدەن جۇيرىكتەردى تاڭداپ الماقشى.
وسى ونەر سايىسىنىڭ تەلەۆيزيالىق نۇسقاسى جۋىردا ءبىزدىڭ تەلەارنادا «ءازىل الاڭى» دەگەن اتپەن كورسەتىلەتىن بولادى.
تۇرسىنبەك قاباتوۆ، شوۋمەن:
- جوبا تەاتر اشىلماس بۇرىن ويدا بولعان. «ءازىل الاڭىن» وتكىزۋ. جاسقا قارامايدى. ءازىل جانرىندا، پاروديا، مونولوگ، ءازىلدى انمەن جەتكىزە الاتىندار، ءازىلدى بيمەن جەتكىزە الاتىندار. سولاردىڭ بارلىعىن شاقىرامىز. جالپى، ەڭ سوڭىندا، تۇبىنە كەلگەندە كۇلدىرسە بولدى عوي. ويتكەنى بىزدە قازىر وسى جانر كەنجە قالىپ بارا جاتىر.
بۇل - ەلىمىزدەگى ءازىل-سىقاق جانرىندا ۇيىمداستىرىلعان العاشقى بايقاۋ. كاستينگ الدىمەن 6- قازاندا الماتىداعى عابيت مۇسىرەپوۆ اتىنداعى جاستار تەاترىندا، 8 - قازاندا استاناداعى بەيبىتشىلىك جانە كەلىسىم سارايىندا وتەدى.
ونەر جۇلدىزدارىنان تۇراتىن قازىلار القاسى الدىمەن دارىنى ەرەكشە الپىس ادامدى ىرىكتەپ الادى. ءارى قاراي ءار باعدارلامادا ون ادام ونەر كورسەتەدى دە، وزىق شىققان بەس ونەرپاز كەلەسى اينالىمعا وتەدى. جۇلدەلى ورىنعا ktk تەلەارناسىنىڭ ارنايى سىيلىقتارى بار. سونداي-اق، قاباتوۆ جەڭىمپازداردى «ءازىل الاڭىنان» «ءازىل الەمىنە» قوسامىن دەپ ۋادە بەرىپ وتىر.
ياعني، ەرەكشە ونەرىمەن تاڭقالدىرعان جاستاردى تەاترعا شاقىرادى، ءتىپتى كينوعا تۇسۋگە ۇسىنىس جاساماق.
ktk
