قازاقستاننىڭ جەتەكشى كومپانيالارى الەمدىك دەڭگەيدەگى كومپانيالارمەن باسەكەگە شىعۋى كەرەك - ەلباسى
بۇگىن استانادا «سامۇرىق- قازىنا» ا ق ترانسفورماتسيا باعدارلاماسىنىڭ تۇساۋكەسەرىنە ارنالعان فورۋم بارىسىندا ق ر پرەزيدەنتى نۇرسۇلتان نازاربايەۆ وسىلاي مالىمدەدى.
« ەلباسى «سامۇرىق- قازىنا» قورىنىڭ ترانسفورماتسيا باعدارلاماسىمەن تانىس ەكەنىن اتاپ ءوتتى. پرەزيدەنت ءبىرقاتار كومپانيالاردىڭ بۇگىنگى دەڭگەيىن دە جوعارى باعالادى. بۇگىنگى كۇنى «قازمۇنايگاز» كومپانياسى دا، «ەير استانا» كومپانياسى دا الدىڭعى قاتاردا. «قازاقستان تەمىر جولى» كومپانياسى دا جوعارى كورسەتكىشتەرگە جاقىن، بۇلار ت م د اۋماعىندا جەتەكشى ورىنعا يە. دەگەنمەن، مۇنداعى باستى ماسەلە - ولار ەندىگى كۇنى الەمدىك وزىق كومپانيالارمەن باسەكەلەسۋى كەرەك. قازاقستاندا بۇل كومپانيالارعا باسەكەلەستىك جوق. سوندىقتان دا، وسى مىندەتتەردى ءتيىمدى جۇزەگە اسىرۋ ءۇشىن ءبىز سىزدەردى شاقىرىپ وتىرمىز»، - دەدى ن. نازاربايەۆ جيىندى اشا وتىرىپ.
بۇدان بولەك، ەلباسى «ەير استانا» كومپانياسىنا توقتالا كەلە، ونىڭ «تۇك جوق جەردەن» قۇرىلعانىن، قازاقستاندا بۇرىن- سوڭدى بولماعان اۆياكومپانيا قالىپتاسىپ، قازىر ونىڭ پوست كەڭەستىك كەڭىستىكتە كوشباسشىلىققا جەتكەنىن اتاپ ءوتتى.
«بۇل كومپانيا وزىق الەمدىك دەڭگەيگە شىعىپ، قاۋىپسىزدىك، ترانسپورەنتتىلىك، قىزمەت كورسەتۋ ساپاسى مەن ونىڭ اۋقىمى جاعىنان ازيادا جوعارى كورسەتكىشتەرگە قول جەتكىزگىسى كەلەدى. شەتەلدىك مەنەدجمەنت باسقاراتىن كومپانيانىڭ ءبىرى وسى بولسا، ەكىنشىسى - نازاربايەۆ ۆنيۋەرسيتەت. بۇل ۋنيۆەرسيتەت تە باسقارۋ مەنەدجمەنتىنىڭ ەڭ جاقسى ساپاسىن كورسەتىپ وتىر. مىنە، وسىنىڭ ءوزى شەتتەن كەلگەن تاجىريبە مەن ءبىلىمى ارقىلى كومپانيالاردىڭ جوعارى دەڭگەيگە شىعاتىنىن كورسەتىپ وتىر. سوندىقتان دا، ءبىزدىڭ ماقساتىمىز - كومپانيالاردى وسىنداي دەڭگەيگە كوتەرۋ، سوسىن تۋرا وسىنداي وزدەرىنە ۇقسايتىن الەمدىك كومپانيالارمەن باسەكەگە ءتۇسىرۋ. ءبىز بۇگىن وسىنداي مىندەتتەردى تالقىلاۋعا جينالىپ وتىرمىز» ، - دەدى مەملەكەت باسشىسى.
اۆتور: قانات مامەتقازى ۇلى
